Ojibiama8agani8i8ag
Ebaro (Hébreux)
ka inakanezi8adj a8iagog
Enadjimomagag oo mazinaigan
Ka8in kikendag8asinon a8enen maia kagi ojitodj oo ojibiigani. Kikendag8an dac e Coda8inni8igobanen aa a8iag, egi madji teb8eta8agobanen Jesosan. Okitci paiete kikendanaban 8egoneni ka ojibiigadenig Kije Manidon nitam Omazinaiganikag, taji ka iji mikodjigadenig nitam onakomo8ini.
Ii 8izon “Ebaro” (Hébreux), “Coda8inni” ikidomagan. Coda8innig dac kagi madji teb8eta8a8adjin Jesosan kagi ojibiama8agani8i8agobanen oo ojibiigani. Ki inagani8i8ag ega kidji ana8endjige8adj kidji teb8etamo8adj, misa8adj e kitci kodagito8agobanen oteb8etamo8ini8a odji.
Ooma dac ojibiiganikag, kitci mikodjigade8an ka kitci apitendag8agin kegonan Kije Manidon nitam onakomo8inikag. Mikodjigade8an dac ca8endjige8ini kagi ikidogobanen Kije Manido kidji minadjin Abanaaman (Abraham), Inakonige8inan kagi minadjin odanicinabeman, a8esizan acitc ca8endjige8inan kagi pagidinigetama8agani8idj Kije Manido, aiamie ogimag acitc aiamie ogima ma8adji ka niganizidj omikimo8ini8an, acitc kitcit8a nibagan nijin ka iji pakeigag.
Nitam nakomo8ini kagi ojitogobanen Kije Manido, ogi minagoban Moisan, e anonadjin kidji 8a8idama8andjin kakina Israel a8iagon. Panima a8iagog kidji pagidinigetama8a8adjin Kije Manidon a8esizan, kidji gi kasiigadenigin opatado8ini8an. Mi ejita8apan aiamie ogimag, kidji pagidinige8adj a8iagon odji. “Kicpin ega abadag misk8i, e nag8ag iidi kegon egi nibomagag, ka8in kasiamagesi Kije Manido patado8inan” (9.22).
Oo8e dac ojibiigan 8abadai8emagan adi epitci na8adj min8acinig Kije Manido odocki nakomo8in apitc8in nitam onakomo8in. Apitc mega Jesos ka nibodj tcibaiatigokag, ki pagidenimidizo eta abidinaj, kagige kidji mikimomaganig opagidinige8in. Nogom dac ka8in aja mamakadj kiga pagidinigetama8asi8anan Kije Manido a8esizan acitc ca8endjige8inan. Abidinaj mega Jesos “8in o8ia8 ogi pagidendan, kagige kidji mikimomaganig opagidinige8in, acitc dac ii odji, kipaiekideeigonan Kije Manido” (10.10). Jesos dac egi todag iidi, kigagi nazika8anan Kije Manido, ega e cag8enimo8ak.
Aa8e kagi ojitodj oo ojibiigani, ogi k8ag8e sogideecka8an ini8e ka nabo8adjigendjin, e mikomadjin a8iagon 8eckadj kagi pimadizinipanin, adi kagi iji teb8etaminipanin. Ogi inan dac kidji kagikina8abamandjin. Ogi inan acitc kidji mik8enimandjin Jesosan, adi ka apitci cacibendamindjin apitc ka kodagitondjin. Ki ikido dac: “Jesos mega, aa aiamie ogima ma8adji ka niganizidj ka aia8aiak kidji 8idokago8ak, mizi8e onisidotan adi eji kodagito8ak acitc adi eji cagoziak. Ke8in mega mizi8e ki iji 8ik8adjiagani8i kidji patadidj, tabickotc kina8it ka iji 8ik8adjiigo8ak, ka8in dac 8ikad odji patadisi. Ka8in dac cag8enimokedan, acitc nazika8adan Kije Manido ka 8i ca8enimigo8ak, e kitci apacenimo8ageiak. Kiga kidimagenimigonan dac acitc kiga ca8enimigonan kidji gi 8idokago8ak apitc maia nda8enimaiak” (4.15-16).
1
Og8izisan odabadjian Kije Manido kidji aiamiigo8ak
1 8eckadj ako, niganadjimo8innin odabadjiabanin Kije Manido kidji aiamiadjin kikitci anicinabeminabanin, mane8inaj acitc mane8eg e iji aiamiapanin. 2 Nogom dac, Og8izisan ogi abadjian kidji aiamiigo8ak. Mi iidi eji aiamiigo8ak nogom, aja e ani peconag8anig kidji ponaki8anig. Og8izisan ogi abadjian kidji kijendag akini, acitc ogi onabaman Og8izisan mizi8e kegoni kidji tibendamindjin. 3 Mi maia tabickotc epitci icpendagozindjin Og8izisan tabickotc 8in, acitc mi maia 8in tabickotc ejinagozindjin. Onagadjitoni Og8izisan kakina kegoni, e abadjitondjin ini ka kitci macka8izimaganigin odikido8inan. Ogi todan kidji kasiama8agani8indjin a8iagon opatado8ini, mina8adj dac Kije Manidon ka kitci macka8izindjin okitcinikinikag ki iji abi 8ak8ig.
Na8adj Kije Manido Og8izisan apitendagozi8an
apitc8in ajenig
apitc8in ajenig
4 Aa dac Kije Manido Og8izisan na8adj ki ani kitci apitendagozi8an apitc8in ajenig. 8in tibina8e Kije Manido kagi iji icpendagoziadjin iidi, e minadjin 8izoni na8adj e kitci apitendag8anig apitc8in ajenig o8izoni8a. 5 Ka8in mega 8ikad Kije Manido ododji inasin pejig ajenin adi kagi inadjin Og8izisan:
“Kin Nig8izis.
Teb8e ninikag kidiji odadaminan ogajigag.”Psaume 2.7
Ka8in kek8an 8ikad ki ikidosi iidi eji mikomadjin pejig ajenin:
“Ninikag kada iji odadami,
acitc 8in, mi aa ke Og8izisian.”2 Samuel 7.14; 1 Chroniques 17.13
6 Apitc dac Kije Manido kagi pidjinija8adjin ooma 8akidakamig nitam ka nta8igindjin Og8izisan, ki ikido:
“Kakinagotc Kije Manido odajeniman
inendagozi8an kidji icpenimandjin ini.”Deutéronome 32.43
7 8adan dac oo ka ikidodj Kije Manido e mikomadjin ajenin:
“Nidanokitagog ajenig tabickotc ako ka nodig,
acitc mi maia ka kitci 8a8asakoneseg
epitci kitci teci8ag ndotaoji8adj.”Psaume 104.4
8 Anic dac 8adan oo ka inadjin Kije Manido Og8izisan:
“Kikije Manido8inan! Kagige kiga ogima8inan.
Kitci k8aiak kitibenimag kidanicinabemag.
9 Kisagiton k8aiakozi8in acitc kicigendan madjido8in.
Midac 8edji ki onabaminan, nin Kikije Manidom,
acitc 8edji ki ijiinan kidji icpendagozian,
e ato8an pimide kictig8anikag.
Kigi minin mina8azi8in,
na8adj e apiteniminan apitc8in ki8idji8aganag.”Psaume 45.7-8(6-7)
10 Kije Manido acitc ogi inan oo8eni Og8izisan:
“Tebendjigean! Kin ockadok kagi kijendaman aki,
kin kagi ojito8an 8ak8i.
11 Nigodin dac kitci kaiezigotc ka8in kada nag8asinon
kakina ii ka kijendaman,
kin dac 8in, apanigotc kiga te.
8ak8i acitc aki kada ani ketea8an,
tabickotc kegojican ka ani kitci keteagin.
12 Mi maia tabickotc pizika8aganickic ka tidibeiginaman
kidji 8ebinaman ejinag8agin,
kek8an kegojickijan ka meckodonigadegin.
Kin dac 8in, ka8in 8ikad kiga pakanagozisi
acitc kagige kiga pimadizinan.”Psaume 102.26-28(25-27)
13 Ka8in 8ikad Kije Manido ododji inasin pejig ajenin adi kagi inadjin Og8izisan:
“Nikitcinikikag iji pi nda abin,
pinici kidji cagodjiag8a ka madjenimik8a,
kinikag kidji iji tabasendizo8adj.”Psaume 110.1
14 Adi dac enabadizi8adj ajenig? Manidog igi, ka anokita8a8adjin Kije Manidon, ka anonagani8i8adj kidji nda 8idjia8adjin ini8e a8iagon ke ag8acimagani8indjin.