8
Mi aa Jesos aiamie ogima ma8adji ka niganizidj ka 8idokago8ak
1 8adan oo8e ma8adji ka kitci apitendag8ag kegon ka ikido8ag. Kidaia8anan aiamie ogima ma8adji ka niganizidj kidji 8idokago8ak, Kije Manidon ka kitci macka8izindjin okitcinikinikag 8ak8ig ka tanabidj. 2 8eckadj ako, kitcit8a nibaganikag taji mikimobanig aiamie ogimag, kagi ojitonigobanen a8iagon. Jesos dac 8in 8ak8ig odanokita8an Kije Manidon, taji ma8adji ka iji kitcit8a8anig, 8in ka Tibendjigedj kagi ojitogobanen.
3 Kakina pepejig aiamie ogima ma8adji ka niganizidj inanonagani8i kidji pagidinigetama8adjin Kije Manidon ca8endjiganan acitc a8esizan. Panima dac ke8in Jesos ki aiag kegoni kidji pagidinigedj. 4 Pekic dac, kicpin Jesos ooma 8akidakamig tepan, ka8in mamakadj kada aiamie ogima8isiban, aja mega te8ag aiamie ogimag e pagidinigetama8a8adjin Kije Manidon ca8endjiganan, maiagotc adi kagi ikidomaganigin Coda8inni Inakonige8inan. 5 Ii dac ka todamo8adj ooma 8akidakamig, mi maia pejig8an ka todjigadeg 8ak8ig eji k8ag8e todamo8adj. Mi maia pejig8an ka iji8ebizipan Mois 8eckadj. Apitc 8a ojitogobanen kitcit8a nibagani, Kije Manidon ogi igon:
“Mi maia pejig8an ke ijito8an
adi kagi iji 8abadainan kidji ijito8an 8edi pik8adinakag.”Exode 25.40
6 Anic dac, na8adj Jesos omikimo8in kitci apitendag8ani apitc8in kodagiag aiamie ogimag omikimo8ini8a. Jesos ogi iji8idama8an Kije Manidon odocki nakomo8ini odanicinabemini. Ii dac ocki nakomo8in na8adj kitci apitendag8ani apitc8in nitam Kije Manido onakomo8in, acitc dac Kije Manido ki ikido na8adj kidji kitci mino toda8adjin odanicinabeman odocki nakomo8inikag.
Kije Manido ki ikido kidji ojitodj ocki nakomo8ini
7 Ka8in mamakadj ocki nakomo8in kidagi ojitamagosimin ki minosegiban 8e8enda nitam nakomo8in. Ka8in dac odji minosesinon nitam nakomo8in, 8 acitc Kije Manido ogi kanonan odanicinabeman egi patadindjin, e inadjin:
“Aja pecodj ocki nakomo8in niga ojitama8ag
Israel a8iagog acitc Coda a8iagog.
9 Ka8in tabickotc kada ijinag8asinon
nitam ka ijinag8agiban nakomo8in
kagi ojitama8ag8abanig 8eckadj okitci anicinabemi8abanin
apitc ka 8idoka8ag8a kidji nagadamo8adj
Idjip (Égypte) akini.
Ogi pigobidona8a ii nakomo8ini.
Midac ii odji 8edji ki k8ekigaba8ita8ag8a.
10 8adan oo ke ijinag8anig ocki nakomo8ini
ke ojitama8ag8a kakina Israel a8iagog.
Omidonendjigani8akag niga iji ata8anan nidinakonige8inan,
acitc odei8akag niga iji ojibiam8anan.
Ninikag kada iji Okije Manidomi8ag
acitc nin niga odanicinabemi8age.
11 Ka8in pejig ii e taci8adj
mamakadj oga aiamiasi8an o8idji8aganan kek8an o8idjiki8en
kidji kikinoama8adjin kidji kikenimijindjin.
Aja mega kakina niga kikenimigog,
ka kitci tabasendagozidj pinici ka kitci apitendagozidj.
12 Niga kasiama8ag mega kagi iji patadi8adj,
acitc niga 8anike8an adi kagi iji panaage8adj.”Jérémie 31.31-34
Mi ka ikidodj Kije Manido.
13 E mikodag dac Kije Manido ocki nakomo8ini, ogi ijiton kidji ani keteanig nitam onakomo8in. Kegon dac ka keteag acitc ega kiabadj ka abadag, aja peconag8an kidji poni tag8ag.