2
Kagikina8abamik Jesos
1 Jesos Christikag e iji mama8iseieg, teb8e kikitci odji sogigaba8im. E kikendameg e sagiigo8eg, teb8e kidodji sogideem. Teb8e ki8idjiogo8a Mino Manido. Teb8e kisagiidim acitc ki8idokodadim kakina pepejig e tacieg. 2 Iji inadiziok dac kidji gi odji kitci min8endamiijieg, pejig8an e inendameg, kakina e sagiidieg pepejig e tacieg, e mama8ino8eg kakina ka tacieg, acitc e mino 8idji8idieg kakina. 3 Ka8in kegon inakamigizikegon kina8a eta tibina8e kidji mik8enimidizo8eg acitc kidji kitenimo8eg. Tiegodj, inenimikog kodagiag a8iagog na8adj e apitendagozi8adj apitc8in kina8a, e tabasendizo8eg. 4 Kida todana8a adi eji min8acinig kodagiag a8iagog odji. Ka8in 8in eta a8iag kada k8ag8e mino todadizosiban.
5 Inendamok acitc todamok ka inendamogobanen acitc ka todamogobanen Jesos Christ.
6 8edjidagotc tabickotc ka ijinagozindjin Kije Manidon ijinagozi.
Anic dac ka8in ododji apitendasin
panima tabickotc ka ijinagozindjin Kije Manidon
kidji iji apitenimagani8idj.
7 Tiegodj, ogi nagadan kakina ka ijinagozipan,
e pi anicinabe8iidizodj,
maia tabickotc a8ian ka ijinagozindjin e ijinagozidj,
acitc ki pi anokitage8inni8i.
8 Ki pagidenimidizo kidji tabasendizodj
acitc kabe ogi ndota8an Kije Manidon,
8a8adj pinici kidji nibodj tcibaiatigokag.
9 Misa dac ogi odji kitci apitendagoziigon Kije Manidon,
e minigodjin na8adj kidji manadjiagani8idj
apitc8in kakina kodag kegoni.
Ogi minigon 8izoni na8adj e apitendag8anig
apitc8in kakinagotc kodag 8izoni.
10 Midac e nodjigadenig Jesos o8izon,
kakina 8ak8ig acitc akig acitc anamakig ka te8adj
ke odji nibak8i8adj,
11 acitc kakinagotc a8iag kidji 8idamagedj:
“Teb8e Tebendjigedj Jesos Christ.”
Midac ke odji icpenimagani8idj Kije Manido, Jesos Odadaman.
8e8enda pimadiziok
12 Ni8idji8aganag ka kitci sagiinagok! E kikendameg adi Jesos ka iji ndota8adjin Kije Manidon, kekina8a panima kida ndota8a8a Kije Manido. Apitc meg8adj kina8akag eji paba tajikeiaban, kinadota8a8aban. Na8adj dac kiabadj nogom kida ndota8a8a, misa8adj nin e na8inagozian. Kigi ag8acimigo8a Kije Manido, midac panima nogom kida kitci nak8im 8e8enda kidji inadizieg adi ka iji nda8endag, e kitci kitcit8a8enimeg. 13 Kije Manido mega taji mikimo kipimadizi8ini8akag, kidji 8i todameg ka iji nda8endag acitc kidji kackito8eg ii kidji todameg.
14 8egonenigotc e ijitaieg, ka8in migodjimokegon acitc ka8in kaganondikegon, 15 kidji gi odji k8aiakozieg acitc kidji gi odji paiekideeieg. Kije Manido dac odabinodjijiman kiga ijinagozim, ega e madji inakamigizieg. A8iagog ka 8agackizi8adj acitc ka madji inadizi8adj ki8idji tajikema8ag. Meg8adj dac e taji 8idji8eg8a, tabickotc 8anagocag ka 8asakone8adj ka iji kacki tibikanig kida ijinagozim, 16 e tibadjimota8eg8a min8adjimo8ini ka migi8emaganig kagige pimadizi8ini. Kicpin iidi todameg, kigagi kitci min8adjiminom apitc odjitcisenig Jesos Christ kidji koki tag8icig. Kada paietenag8an mega ega ceck8at egi kitci mikimo8an kakina adi epitcian.
17 Ka iji teb8etameg acitc ka iji anokita8eg Kije Manido, mi maia tabickotc pagidinige8inan ka pagidinigetama8eg Kije Manido ejinag8agin. Ne8ad niga nisigo, Jesos omin8adjimo8in egi paba 8idamageian, nimisk8i dac mi maia tabickotc pagidinige8in kidji ijinag8ag, ka pagidinigetama8ag Kije Manido kigi kipagidinige8ini8an. Kicpin ijiseg ii, niga min8endan, e 8idji modjigendamominagok kina8a kakina. 18 Kekina8a kida min8endana8a acitc kida 8idji modjigendamomijim.
Timote (Timothée) acitc Epaponit (Épaphrodite)
19 Kicpin Jesos ka Tibendjigedj nda8endag, aja pecodj ni8i ijinija8a Timote kina8akag. Nikikendan mega apitc koki pi nda 8abamijidj, niga sogideeckag apitc 8idamaojidj adi eji8ebizieg. 20 Timote mega 8in eta inendam tabickotc nin ka inendaman, teb8e e nda8endag kidji 8idokago8eg. 21 Kakina dac kodagiag a8iagog 8ina8a eta kidji k8ag8e mino todadizo8adj odiji mik8endana8a. Ka8in opabiziskendasina8a adi Jesos Christan ka iji nda8endamindjin kidji todamo8adj. 22 Timote dac 8in, kikikendana8a adi ka iji mino inadizidj. Ma8asag nigi mikidananan min8adjimo8in e kagik8eiag, tabickotc pejig nabe ka 8idjiigodjin og8izisan ejinagoziag. 23 Ni8i ijinija8a dac kina8akag, teci8ag apitc ick8a tibakonigo8an. 24 Niketcinamendan acitc, kicpin ka Tibendjigedj iji nda8endag, kenin 8ibadj kidji pi nda 8abaminagok.
25 Kidjiki8enan Epaponit (Épaphrodite) ka ijinikazodj, aa8e ka pidjinijaamaojieg kidji 8idokaojidj, teb8e ma8asag nigi kitci mikimomin acitc ma8asag nigi kitci nak8imin e anokita8agidj Jesos. Nidinendan nogom kada min8aciniban kidji koki ki8enija8ag kina8akag. 26 Okitci nda8endan mega kidji 8abamigo8eg, acitc okitci animendan e kikendag egi nodageieg e akozipan. 27 Teb8e ki kitci akozi, 8a8adj kegat ki nibo. Kije Manidon dac ogi kidimagenimigon, acitc ka8in 8in eta, kenin nigi kidimagenimig. Ogi kigean ega a8acamej nin kidji kackendaman. 28 Nikitci nda8endan dac nogom kina8akag kidji koki ijinija8ag. Midac apitc koki 8abameg, kiga kitci modjigendana8a. Nin dac, nigagi poni animendan. 29 Midac apitc tag8icig, kitci modjigendamok e odisigo8eg, osa ke8in Jesosikag ka Tibendjigendjin iji tibendagozi. Kida manadjia8ag kakina ka anokita8a8adjin Jesosan tabickotc 8in ka todag. 30 Ogi nanizaniton mega opimadizi8in acitc kegat ki nibo e anokita8adjin Jesos Christan. Nigi 8idokag, tabickotc kekina8a ke iji 8idokaojiegoban kicpin ki teiegoban ooma.