4
Igi8e 8ak8ig ka te8adj
odicpenima8an Kije Manidon
odicpenima8an Kije Manidon
1 Ick8a dac ii, mina8adj kiabadj nigi ijinan kegon, nigi 8abadan ick8adem e ceteg 8ak8ig.
Kiabadj nigi noda8a aa kagi aiamiijipan, mi maia ka podadjigadeg nodag8atcigan enitagozipan. Nigi inig: “Pijan ooma icpimig, kidji 8abadainan adi ke iji8ebag.” 2 Teci8ag Mino Manido nigi pidigeckag. Kegapitc nigi 8abadan kitci ogima8i tesabi8agan 8ak8ig, a8iag dac iima taji abiban. 3 Kitci minonagoziban aa a8iag, mi maia asinig ka mamazina8abikizi8adj “jaspe” acitc “sardoine” ka ijinikazo8adj ejinagozipan, ka kitci oja8ack8abikizi8adj acitc ka kitci misk8abikizi8adj. 8igobisagan 8akaagodeban kitci ogima8i tesabi8aganikag. Kitci min8acinoban ii 8igobisagan, tabickotc asini ka kitci minojicidj ka oja8ack8abikizidj, “emeraude” ka ijinikazodj, ejinag8agiban. 4 Nijidana acitc ni8in (24) kitci ogima tesabi8aganan 8ajagametebanin ii kitci ogima8i tesabi8aganikag, acitc nijidana acitc ni8in kitci anicinabeg taji abibanig. 8abiginoobanig, acitc oza8iconia sizok8epizonan okigickana8abanin. 5 8a8asakoneseban ii kitci ogima8i tesabi8agan, acitc kegon kitci nodag8anoban acitc inimikig kitci nodagozibanig. Nigan kitci ogima8i tesabi8aganikag, nij8atcin mitigon ka piskanegin 8anak8atig cacigapiasakonesebanin. Mi igi8e manidog ka anokita8a8adjin Kije Manidon ka apitendagozi8adj. 6 Acitc nigan kitci ogima8i tesabi8aganikag pejig kegon kitci tcakideban tabickotc kitcigami. Mi maia 8aseantcigan epitci cabonag8agiban.
Ni8ibanig kagi kijenimagani8i8adj e 8ajagamebi8adj tcigidj ka iji atenigiban ii kitci ogima8i tesabi8agani. Nodjimobanig acitc mizi8e ockijigobanig, nigan acitc odakanag. 7 Nitam aa mi maia micibiji ejinagozipan, eko niji8adj dac mi maia mictozoc ejinagozipan, eko nisi8adj dac mi maia a8iag ka pidjinabidj ejinagozipan, acitc dac eko nio8adj mi maia migizi e pimisedj ejinagozipan. 8 Kakina pepejig nigod8as8agebanig, acitc dac ockijigo8an mizi8egokenibanin omig8ana8akag. Kabe kijik acitc kabe tibik, ka8in 8ikad poni nigamosi8ag oo8eni:
“Kitcit8a8endagozi, kitcit8a8endagozi, kitcit8a8endagozi
Kije Manido ka Tibendjigedj ma8adji ka kitci macka8izidj,
8in kagige ka pi pimadizidj,
nogom ka pimadizidj,
acitc ke pi tag8icig.”
9 Mi iidi eji icpenima8adjin Kije Manidon, ka taji abindjin okitci ogima8i tesabi8aganikag, kagige ka pimadizindjin. Odicpenima8an acitc mig8etc odina8an. 10 Tasin iidi e todamo8adj, ka nijidana acitc nio8agobanen kitci anicinabeg nibak8i8ag nigan ini8e ka abindjin kitci ogima8i tesabi8aganikag, kagige ka pimadizindjin, odicpenima8an dac. Okitcikonana8an odoza8iconia sizok8epizoni8an kidji gi pagidinamo8adjin nigan kitci ogima8i tesabi8aganikag, e ikido8adj:
11 “Kin ka Tibeniminak acitc Nikije Manidominan.
Kakina kigi kijendan.
Osa mega kigi inendan kidji tag8ag kegon 8edji tag8ag.
Midac ii 8edji inendagozian kidji manadjiigo8an,
kin mega kidapitci icpendagozinan,
kidapitci kitcit8a8endagozinan,
acitc kidapitci macka8izi.”