18
Ick8a nici8anadan Babilon (Babylone) kitci odena
1 Ick8a dac ii, nigi 8abama kodag ajeni 8ak8ig e pi odosedj. Kitci macka8iziban, acitc ominonagozi8in kitci tcakideniban mizi8e akikag. 2 Ki kitci pibagi:
“Aja ick8a nici8anadan!
Aja ick8a nici8anadan ka kitci inendag8ag Babilon odena!
Midac aja iima eji tajike8adj madji manidog.
Pinecijag ega ka am8agani8i8adj
acitc ega ka min8enimagani8i8adj
mi iima e te8adj.
3 Madji a8iagog iima ka tajike8apan
ogi kackia8abanin a8iagon kakinagotc ka inakanezindjin
kidji madjakamigizindjin ke8ina8a.
Mi maia tabickotc mina8apanin cominaboni
kidji ki8ack8ebindjin ejinagozi8apan.
Ogi kackia8abanin ogiman mizi8e akig
kidji 8idji madjakamigizimigo8adjin.
Ada8e8innig adigotc 8edji8adj ki ani kitci 8anadizi8ag,
osa mega apanigotc kiabadj igi8e a8iagog
Babilon ka iji tajike8adj
o8i odapinana8abanin kegonan ka kitci inendamo8apanin.”
Mi iidi ka ikidodj aa ajeni.
4 Mina8adj dac kodag a8iag nigi noda8a 8ak8ig e odji anim8edj:
“Kina8a, nidanicinabemag!
Sagaamok ii odena,
ega kidji acidagimigo8eg opatado8ini8akag
igi8e iima ka iji tajike8adj,
acitc ega kidji acidakonigo8eg apitc odji kodagito8adj.
5 Ka apitci kitci nta patadi8adj,
pinici kegat 8ak8ig kidji oditatenigin opatado8ini8an
ki ijinagozi8ag,
acitc ka8in Kije Manido ododji 8anikadasinan
ka iji madji inakamigizindjin.
6 Kiga toda8a8ag igi8e a8iagog adi kagi todago8eg.
Nijinanaj a8acamej inigik kiga ki8e minag
kakina kegoni kagi iji todago8eg.
Adi kagi iji kodagiigo8eg,
mi maia tabickotc ki siginamago8egoban
ka macka8agaminig cominaboni ejinag8ag.
Nijinanaj dac inigik macka8agaminamok
apitc kicponebado8egon odonagani8an.
7 Kitci apitenimidizobanig igi a8iagog,
acitc 8anadizi8inikag iji pimadizibanig.
Inigik iidi ka iji pimadizi8adj,
mi nogom inigik ke apitci animendjige8adj kidji kodagito8adj.
Mi maia ik8e ejinagozi8adj igi a8iagog,
ka kitci min8adjimidizodj e ikidodj:
Mi maia tabickotc ogimak8e enabian ooma.
Ka8in ka pejigodj ik8e nidijinagozisi,
acitc ka8in 8ikad niga kikendasin
adi enendag8ag e pejigonani8ag egi 8aniagani8idj a8iag.
8 Ii dac ka inendamo8adj,
kada kitci okoseni8an okodagito8ini8an.
Akozi8in, kackendamo8in egi nibonani8ag, acitc ka8askade8in,
kakina mama8 kada pijamagani8an ododenami8akag.
Kada ick8adeni acitc ododenami8a.
Kitci macka8izi mega Kije Manido ka Tibendjigedj
acitc 8in otibakonan.”
9 Ogimag mizi8e akig ka odji8adj tajikebanig 8anadizi8inikag iima odenakag, acitc omin8endana8aban e madji inakamigizi8apan iima. Apitc dac 8abadamo8adj ickodeni e sagabatenig, kada ma8i8ag acitc kada kitci kackendamog. 10 8asag kada iji tajigaba8i8ag. Oga kotana8a mega ke8ina8a kidji kodagito8adj. Kada ikido8ag:
“Kotadendag8an!
Kitci micaban Babilon odena acitc kitci apitendag8anoban.
Mi eta pejigotibaigan ki apitcimagan kidji nici8anadjiomagag.”
11 Ada8e8innig mizi8ekamig kada odji ma8i8ag acitc kada kitci kackendamog, e ick8adenig ii odenani. Ka8in mega a8ian ogagi kicpinadosini odada8ani8an. 12 Mi ini kegonan ka ada8e8apan: oza8iconia, 8abiconia, anodjigotc asinicecag ka kitci sanagizi8adj, ka cab8ateigagin kegojican, ka misk8egagin acitc ka mamazina8agin ka sanagagin kegojican, sinibani kegojican, kakinagotc ka minomag8akozidj mitig, kegonan kagi ojitcigadegin tcidjibickiji odeckanan odonikag ka odji sagak8amondjin kagi abadazindjin, kek8an mitig ka kitci min8ak8ag kagi abadag, kek8an pi8abik kek8an asini, 13 nibicibag ka minomag8ag, ka minomateg aiamie pig8i, pimide ka minomag8ag acitc kakinagotc ejinag8ag ka minomag8ag, cominabo, pimide, kapane, anominag, mictozog, mantcenicag, pebejigogack8eg, odabanijican ka pimidabibat8a8adjin pebejigogack8eg, acitc anokitage8innig ka tibenimagani8i8adj. 14 Igi8e ada8e8innig dac kada ikido8ag:
“Kin Babilon,
kakina kegonan ka sagito8anin ki ick8a nici8anadanon.
Ki8anadizi8in acitc kegonan ka kitci min8acigin
apanigotc kigi 8anadjitamago.
Ka8in 8ikad mina8adj kiga aiasinan.”
15 Ki kitci coniake8ag ada8e8innig iima odenakag. 8asag dac kada iji tajigaba8i8ag, e kotamo8adj ke8ina8a kidji kodagito8adj. Midac kada ma8i8ag acitc kada kitci kackendamog. 16 Kada ikido8ag:
“Kotadendag8an! Ick8a nici8anadan ii kitci odena!
Mi tabickotc ogimak8e ejinag8agiban,
e abadjitopanin mino kegojican ka cab8ateiganigin,
acitc ka misk8eganigin
acitc ka mamazina8anigin ka sanaganigin kegojican,
oza8iconian e 8a8ejio8agepan
acitc mane asinicecan ka sanagizindjin.
17 Mi eta pejigotibaigan inigik ki apitcimagan
kidji nici8anadjiomagag ii 8anadizi8in!”
ki ikido8ag.
A8iagog ka pimibideto8apanin kitci tcimanan, acitc igi8e ka pimaci8adj, acitc ada8e8innig ka paba ada8e8apan tcimanikag, acitc igi8e kakina ka pozi8apan tcimanikag, 8asag ki iji tajigaba8i8ag. 18 Apitc kagi 8abadamo8adj ickodeni e kotadabatenig e sasagabigakonenig odenani, ki pabibagi8ag: “Ka8in kodag odena tag8asinon epitci kitci apitendag8ag tabickotc oo8e odena!” 19 Ki ma8i8ag acitc ki kitci kackendamog, acitc minigonacini ogi iji8ebinana8a octig8ani8akag kidji nag8anig epitci kackendamo8adj. Ki pabibagi8ag:
“Kotadendag8an! Ick8a nici8anadan ii kitci odena!
Mi oo8e odena kakina igi8e ka otcimani8adj
ka odji ani 8anadizi8adj,
e pimi8ido8adjin ka kitci sanaganigin ada8anan
pakan 8edi ka odjimaganigin.
Mi eta pejigotibaigan ki apitcimagan kidji nici8anadjiomagag!”
ki ikido8ag.
20 Kina8a 8ak8ig ka teieg, modjigendamok egi ick8a nici8anadag ii odena! Kina8a Kije Manido odanicinabeman, kina8a Jesos Odanodaganan acitc kina8a niganadjimo8innig, modjigendamok! Kije Manido mega ogi tibakonan adi kagi todago8eg.
21 Ick8a dac ii, pejig ajeni ka kitci macka8izidj ogi a8i odapinan kitci asinin. Kitcigamig dac ogi iji pakobi8ebinan ekidodj:
“Mi iidi ke apitci sogi8ebinigadeg Babilon kitci odena.
Ka8in 8ikad mina8adj kada nag8asinon.
22 A8iagog ka nodag8atcige8adj ajeni nodag8atciganan,
acitc igi8e ka nigamo8adj,
acitc ka podadamo8adjin kakinagotc
ka podadjigadenigin nodag8atciganan,
ka8in 8ikad mina8adj kada noda8agani8isi8ag
8edi Babilon odenag.
Ka8in kada nagozisi8ag ka mikimo8adj iima odenag.
Ka8in kada teb8e8etomagasinon anomini kibickaigan.
23 Ka8in 8ikad mina8adj kada 8asakonesinon 8edi.
Ka8in kada teb8e8idasi nabe kagi niba8idj acitc okokomiman
iima odenag.
Misa dac kada nici8anadjiomagan ii odena.
Osa mega ada8e8innig iima ka te8apan,
8ina8a ma8adji kitci apitendagozibanig mizi8ekamig,
acitc a8iagog iima ka tajike8apan,
e mandoke8adj, ogi 8agackibina8an a8iagon mizi8ekamig.
24 Iima odenakag ki nisagani8ibanig niganadjimo8innig
acitc Kije Manido odanicinabeman.
Mi mega iima ka odjiseg kidji nisagani8i8apan
mane a8iagog mizi8ekamig.
Mi ke odji nici8anadag Babilon kitci odena.”
Mi ka ikidodj ajeni.