ሃዕሮ ወኣድ መጻፈ ዎኔ ያህይ 1

ያህይ ከተቦሃ

ዎኔ ሶህኑተ

ኣጉስ

ዎዕኔ አሳባች ያህይ ሶህኑት ለሙ ቡዕለ እኮ ጠዉ ዮስ። ሁኩንን ካን አነበባእሩ መገኒንለከ ቤቶሃስ መሲህ ኢስን ሜጦመት ሄኦሰተ ጠረኝሲሃለከ ከ ሜጦመተ ቤሶተ አታለኖ ክህብ ትምርቲች አገዕርቶታት። ህከ ወክት ኬዕዮ ክዝብ ትምርቱ አሜተኖሁ ከን ኣዱንያ ጠዊች እኮቤቺሃ መገን ቤቱ ኢስ ሆሮን መንቹ እሆተ አታለኖበአ የኖሃን እቅ። ሁኩ አስተማረት «ጡሙ ዩ ኣዱንያ ጠዊሃ ጨነቀሙ አጉሩ ዩሃን» ይታ እቅ። ከኒንን በርግት «ጡመ ጠወ አኡለከ ዎሎ መኒሃ ኢተተ ለሊሱ ጡሞን ሜጡ ደቀንሹ ዮስበአ» ይታ እቅ።

ከተቦሲሁ ከ ትምርት ቶጉ ግብ መሲህ ኢስ መነ ጡምሶተ ይ መንቹ እኮኡ፤ ኢሳን አመዕንታእሩለከ መገኑ ኢትታእሩ ጉዕሙንኩ ገገዉንኩሰ ኢተቀሙ ሀስሰኖሰ የን ኩሎኡ።

መጻፉስ አፎሃ

ኣጉስ (1፥1-4)

ኑርለከ ቱንስቹ (1፥5—2፥29)

መገን ኦሱተለከ እልቢስ ኦሱተ (3፥1-24)

ሀንቅለከ ክዝብ (4፥1-6)

ኢተት ግደ እሁስ (4፥7-21)

ድሉ ዮስ አመዕነቱ (5፥1-21)

ሄእ ላገተ

1 ክልቀቲች ብርተ ዮ ሄእ ላገተኔ ሞጮጭኖሚሃ፥ እሌንተኔ ለዕኖሚሃ፥ አጥራመንት ለዕኖሚሃለከ አንጋንከኔ አንፎሚሃ ኩልናንክዕኔ። 2 ኩ ሄኡ ለልዮኡ፤ ነኡን ለዕኖም፤ መሰከርናም፤ ከኒች ብርተ አናከኔ መገን ቤቾን ዮኢሃለከ ኔሳሃ ለሌኢሃ ዘላለሚሃ ሄአኖ ሄእተኔሃ ኩልናንክዕኔ። 3 ኒን ሜጡበ ሜጦመት ሄኦህዕኔተ ለዕኖሚሃለከ ሞጮጭኖሚሃ ክዕኔንከ ኩልናንክዕኔ፤ ኒ ሜጦመት አነ መገኒንትለከ ቤትንከስ መሲህ ኢስን ሜጡባት። 4 ሙንዲኑኔ ዊመ እኮተ ካን ከተንባንክዕኔ። *

መገኑ ኑር እሁስ

5 ኢሲች ሞጮጭኖሚሁለከ ክዕኔሃ ኩልናም ሶህኑት ተኒት «መገኑ ኑር እኮቤቺሃ እስቤቾን ቱንስቹ ሆሮን ዮበአ» ይታእተ። 6 ህካን እኮቤቺሃ «መገኒን ሜጦመት ዮኔ» ይነን ቱንስች ኣዜን ሄዕኖም ጎሬ ክዝምባሚት ቤሉ ሀንቅን ሄዕኖምበአ ዩሃን። 7 ጠዉ እኮጎሬ እስ ኑሬን ሄዕዮገን ነኡ ኑሬን ሄዕኖም ጎሬ ገገዉንኩኔ ሜጦመት ሄኣኔ፤ ህትን ቤትስ ኢስ ቄጉ ጩብች ጉዕሚችን ነጠ አአኖኔ።

8 ህካን እኮቤቺሃ ነኡ «ጩቡ ዮኔበአ» ይኖምጎሬ ገዉኔ ሉስንሳሚት ቤሉ ሀንቁ ኒ ኣዜን ዮበአ። 9 ህትን ጩብኔ መገኒሃ ኩልኖሚች መገኑ አመዕነሞሃለከ ፈየ እኮቤቺሃ ጩብኔ ጉዕመንከ «ፈቁን» የኖ፤ ህትን ጩብችኔ ጉዕሚችን ነጠ አአኖኔ። 10 ነኡን «ጩብ አዕኖምበአ» ይናሚሃ እንኮምጎሬ መገኑ ክዝበኘ አዕናምት፤ ህትን መገን ላገንት ኒ ኣዜን ዮበአ።

1:1 ያህ. 1፥1።

1:2 ያህ. 1፥14።

*1:4 ሙንዲኑኔ፦ መት-መቱ ሉህ ክታበት «ሙንዲኑክዕኔ» ይታአ።

1:7 ያህ. 13፥34።