1 አነ መገንለከ ቀርቾሃ መሲህ ኢስረ እኮሀኑኡተ ተሰሎንቄን ዮ መገን አመዕናኖ ዱእ ምኒ መኒሃ ጳዉሎሴች፥ ሲላሴችለከ ጢሞትዎሴች ሶሀንቶእተ ሶህኑ፤ ኣስቱትለከ ወገሬቱ ክዕኔሃ እሁን። ሶቀ. 17፥1።

2 ነኡ ዱአ አዕናም ወክት ጉዕመንከ ክዕኔተ ቃንገን ክዕኔተኔሃ መገኑ ገለትጭናም። 3 አናኔ መገን ብሬን አመዕነቲን አቴንተ ሆጉተ ኢታን ጠረኝቴን አኡክዕኔለከ ቀርቹሃኔ መሲህ ኢሳን ዮህዕኔ ተብሴክዕኔ ጠረኝመተ ጉዕመ ወክት ቃንጋም። 4 መገኒን ኢተንቴንተ አመኦሶ! መገኑ ዶዕሬህዕኔገ ደንጋም። 5 ነኡ እንጂለ ክዕኔቤቹ ኤንቦሚሁ ጠለዕል ላጋን እሁዕነ ወልቃንለከ ጠሊለ አያን እንጂል ሀንቅ አመዕኒንት፤ ህትን ክዕኔን ሜጡበ ሄዕኖም ወክት ክዕኔተ ሀዕልኖተ ሀት እንክ ሄዕኖም ጎር አዕኑ ገውንኩክዕኔ ደጌነንተ። 6 ልግብ ኦርሸት እልቶህዕኔ ጎሬሁ ጠሊለ አያኒን ደገንቶ ሙንዲኖን ላገስ ቶጌንታአ፤ ኔሳለከ ቀርቹ አጉዴንታአ። ሶቀ. 17፥5-9። 7 ህካን እኮቤቺሃ አዕኑ መቄዶናንለከ አካይ ባዶን ዮ አመዕናኖተ ጉዕሚንከ ጡመ ምሳልተ እኬንተሰ። 8 ቀርች ላገት ክዕኔች ፉልት ሞጮጨንቶኢሁ መቄዶንለከ አካይ ባዶን ጠለዕል እሁዕነ መገኖን ዮህዕኔ አመዕነቱ ጉዕመ ቤቾን ሞጮጨሞቤቺሃ ከን ጠዊሃ ነኡ መቱርቹሃ ጠወኡ ሀስሰኖኔበአ። 9 ክዕኔቤቹ አሜንቶም ወክት ጡመገ ቶጌነንተገለከ አዕኑ ሽርክክዕኔ ጌኝአቴን ሀንቅለከ ሄአኖ መገኑ ካደሚሃ ሀት እኬን ፈንቀልቴንተ ጎር እሰ ገውንኩሰ ኩልታአ። 10 ህትን መገኑ ሬሆች ኬሾሲሃ፥ አሜታ መገን ኡሙዕሬች ጡምሰኖኔሃ፥ ቤቱስ ኢስ ሰሜች አሜተኖገ ሀት እኬን አገርቴነንተ ጎሬ ኩልታአ።