6
1 ነኡ መገኒን ሜጡበ አዕናምረ እንኮምቤቺሃ መገኒች ቶጌንተ ኣስቱተ ተሰ አቴነንተበእገ ኡጭናንክዕኔ። 2 መሰንትስ መገኑ
«አን ኢታም ወክቴን ሞጮጬንስ!
ጡም በርንከ ሀዕሌንኬ» የኖቤቺሃ
«እስ ኢተኖ ወክቱ ቴሶት፤ ጡሜኖ በሩ ቴሶት።»ኢሳ. 49፥8።
3 ኒ ሆጉት ህንቀንታበእገ ይን መ ጠዋን አዬሁ ጉፉቹ እንካምበአ። 4 እሁን ቤሉ አዕናም ጠዋን ጉዕማንን ገውኔ መገን ካዲመገ ሆንጠህንሳም፤ ሁኩንን አበ ኦርሻን፥ ሻዞን፥ ጭንቃን፥ 5 ገረፈሚን፥ ኡሱረሚን፥ ረብሻን፥ ሆጎ በትኜን፥ ግሰኛተ ሆጊንለከ ጎሪንት። ሶቀ. 16፥23። 6 ህትን ነጢማን፥ ኤንኬዕኒን፥ አደቢን፥ ጎደበ ላፍማን፥ ጠሊለ አያኒን፥ ሀንቅ ኢታን፥ 7 ሀንቅ ጠወ ጠወኢንለከ መገን ዎልቃን ሄዕኖም፤ ፈይመ በገዝ ኦዳተ ጉረለከ መኬ አንጋን አፊኒት። 8 ኬዕምኚንለከ ሆፍኚን፥ ገለትጨሚንለከ ቦሮረሚን ሄዕኖም፤ ሀንቀኛኑተ እንከን ክዝበኛኖገ ዎለአሞም፤ 9 ደገማምረ እንከን ደገምበረ እንኮም፤ ሬቶ ዬነን ፎሊን ዮምረ እንክ ደገማም፤ ኦሌመኔጎሬሁ ሬኖምበአ፤ 10 ሻዙት ኢልቶኔጎሬ ጉዕመ ወክትንከ ሙንደዕናም፤ ቡጥቻኑተ እንኮምጎሬሁ ልግብ መነ ቀባጣመተ አዕናም፤ መቱርቹሁ ዮኔበእረ እንኮምጎሬሁ ጉዕሙርቹንኩ ኒሃን።
11 ቆሮንቶስ ከተማን ዮንተ መኑ! ነኡ መቱርቹሃ ፌንሱዕነ ኩልኖንክዕኔ፤ ቀልብኔ አልባሽን ፈኖንክዕኔ። 12 አዕኑ ኢተክዕኔ ኔሳሃ ከንቴንታኔ ቤሉ ነኡ ኢተኔ ክዕኔሃ ከሞምበአ። 13 ጠዉ እኮጎሬ አዕኑ እለኤ እኬንተቤቺሃ ያንክዕኔ፤ ነኡ ቀልብኔ ጠወ ማንጡዕነ ኩልኖንክዕኔገን አዕኑሁ ቀልብክዕኔ ጠወ ማጦኑዕነ ኩሌኔ።
አመዕንበ መኒን ሜጡ እሁ ገበእባሃ እሁስ
14 አመዕንበ መኒን ገበእበ ዎቄን ጠመደንቶኖቼ፤ መሰንትስ ፈይመትለከ ጩቡ ሀት እክ ደቀንቶተ አታልታአ? ህትን ኑሩለከ ቱንስቹ ሀት እክ ሜጡበ ሄኦተ አታልታአ? 15 ህትን መስሂሃለከ እልብሲሃ *እልቢሱ፦ ግሪክ አፎን «ቤልያል» ህከረንገ «ቤልያር» ዕብራይስጥ አፎን «ቤልዐል» ዬኖስ። ፍሳረንትስ «ከልበ እኮሃ» ህከረንገ «ሕጉ ዮስበኢሃ» ዩ እሀን ሻይጣኒሃ ኣሰሞስየ ሱዕመ። ም ደቀንሹ ዮሰ? ህትን አመዕኔኢሁለከ አመዕንቡሁ ሚን ደቀንታአ? 16 መገን ምኑ ሽርኬን ም ደቀንሹ ዮኡ? መሰንትስ መገኑ
«አን እሳን ሜጡበ ሄኣም፤
በላንከሰ ፈንቀላማም፤
መገኑሰን እሃም፤
እሰን ኡመቲኤ እካአ»
ይ ጠወዕዮገን ነኡ ጉዕመንከ አታለኖ መገንያ ምኒ። ሌዌ 26፥12፤ ሕዝ. 37፥27፤ 1 ቆሮ. 3፥16፤ 6፥19። 17 ህካን እኮቤቺሃ ቀርቹ
«እሰ ኣዚች ፉልቴን አደ እኬ፤
ንጃሾሃ መርቹሃ ኡልቶኖቼ፤
አንን ኢረ አዕይ ቶጋንክዕኔ፤ ኢሳ. 52፥11።
18 ህትን አን አነክዕኔ እሃም፤
አዕኑ ኤሳሃ ጎነለከ ሜኣ እለተ እኬነንተ
የኖ ጉዕመንከ አታለኖ ቀርቹ» ዬእ። 2 ሳሙ. 7፥14፤ 1 ዱዱ. 17፥13፤ ኢሳ. 43፥6፤ ኤር. 31፥9።