2
ቀርቾን አመዕኔን ጡምተኔሃ
1 አይደጎ ነኡ ሞጮጭኖም ጠዊች ኤተሩ ዋልን ኡምባምበእገ አገዕሩ ሀስሰኖኔ። 2 መላይከ አዲን ኩለንቶ ላገት ሀንቂተ እኮጎሬ ህተ ላገተ ቶጉ ግበኖ መንቹ ሀስሰኖ ሃሊን ቀጠአመኖሃ እኮጎሬ 3 ነኡ ህከ ሎረ ጡሙ ሀምቦምጎሬ ሀት እንክ ፉሸእኖተ አታልናም? ከ ጡሙኔ ወዕና ኩሎኔሁ ቀርቹ ገዋስ፤ ህካን ጠረኝስ ኩልቶኔሩ እሲች ሞጮጭቶእሃ መነ። 4 ህትን መገኑሁ ህከን ጡምተኔሃ መላተ፥ አበ አጀብሲሰኖ ሆጎን፥ አደደ ገረምሲጬኖ ጠዊን፥ እስ ሀሾ ሃሊን ኣሴ ጠሊለ አያን ኣስቶን መሰከሮኡ።
መን ዘሬተ ጡምሳንቹ ኢሰ እሁስ
5 ነኡ «ከ ኤተሩ አሜታአ» ይን ጠወዕናም ኣዱንያ አል መገኑ መላይከስ ጠቅቶተ ኣስዮበአ። 6 መጻፍ ኣዜን መቶ ቤቾን መቱ መንቹ
«አት እሱ ሰው ይቶተ መኑ መርቾሃን?
ህትን ጨነቀንቶስተ መን እለት መርቾሃን? 7 እሱንከ መላይካች ቀዎ ወክቲሃ ሆፍሶንትስ፤
ኬዕምኝለከ ገለት ዘዉደሃ ዎርቶንትስ፤
አንገክ ሆጎ አሌንን መክሶንትስ፤ *መት-መቱ ፍሳረት «አንገክ ሆጎን ዳኛ አቶንት» የኖሃ በርግታአ።
8 መገኑ ጉዕመርቹንከ ሹምነቲችስ ዎሮን አቶንት» ህት ይ መሰከሮኡ። መዝ. 8፥4-6።
ጉዕመርቹንከ ደኞመስ ኣዜን አአኖረ፤ ዳኞማስ ኣዜን አኡዕነ ፌሾርቹ መቱርቹሁ ዮበአ። እኮጎሬ ቴሱ ጉዕሙርቹንኩ እስ ሹምነት ኣዜን እሁስ ለዕኖምበአ። 9 ጠው እኮጎሬ መገን ኣስቶን ጉዕማንከ መንተኔ ሬሁተ ለዕኖተ ቀዎ ወክቴን መላይካች ዎሮ አዲን እክ ለሌ ኢስ ሬሆ ኦርሸተ ቶጎቤቺሃ ኬዕምኝለከ ገለት ዘውደ ዎሮሃ ለዕናም። እስ መገን ኣስቶን ጉዕምኔተኔሃ ሬዮኡ። 10 መገኑ ጉዕመርቹንከ ከለቆ፤ ጉዕሙርቹንኩ ህትን ሄኦተ አዕዮ፤ ኢሰ ኦርሸ ኣዜን ህግሲን ጉዕመርቺሃ በቀዕዮሃ እሀኖገ አኡ እሲሃ ገበአኑሃን፤ መነ ጡምቤቹ አዎንሰኖሁለከ ልግብ ኦሱተ መገን ኬዕምኝ ቤቀንታገ አአኖሁ ኢሳት።
11 መነ ጠሊላኑተ አአኖሳሁለከ እሶን ጠሊላኑተ እኮ መኑ መቶ አንተ ኦሱ፤ ህከን መሳን ኢስ እሰንተ «አመኤ ኦሶ» ይ ገኦተ ሙለኖበአ። 12 ህካን እኮቤቺሃ አን መገኒሃ
«ሱዕመክ አመኤ ኦሶተ ኩላም፤
አመዕናኖ ጭምት በላን ኬሳሃ ገለትጫንኬ» የኖ።
13 ህትን «አመዕነቱኤ እስ አሌን አኣም»ኢሳ. 8፥17-18።
ህትን «አንለከ መገኑ ኣሴኤ ኦሱት ሁኩዕኑን» የኖ።
14 ኦሱት ማሉለከ ቄጉ ዮእረ እኮገን ኢስሁ እሰገን መንቹ እኮ፤ ሁኩንን ሬሆንከስ ሬሆ አሌን ወልቀት ዮስ እልቢስ ቤሶታት። 15 ህትን ሄአኖ ዘማኔን ጉዕማንን ሬሆገ ዋጄኖ ሮሶመ ኣዜን ጠገንቶረ ጉዕመንከ ዎዝሃት። 16 ሀንቅ እሀኖረ ኢስ ሀሾ መላይከተ ሀዕሎተ እሁዕነ እብራሂም ዘርተ ሀዕሎታት። 17 ህካን እኮቤቺሃ ማርቱተ አአኖለከ አመዕነሞ ሎረ ቂስቹ እክ መገኒሃ አኦተለከ መን ጩብ አጉሮተ መ ጠዋኒ አመስ ኦሱተ አጉዱ ገበዕዮስ። 18 እስ ገዉንኩስ ፌተነም ኦርሸተ ቶጎቤቺሃለከ ፌተነሞቤቺሃ ፌተናን ኣጋእረ ሀዕሎተ አታለኖ።