ያቁብ ከተቦ ሶህኑተ
ኣጉስ
ኩ ያቁብ ሶህኑት በሬተ በሬተ ደግለለኖ ትዛዝ አፎሃ እሀን ከተበሞንኩ ኣዱንያ አሌን ጉዕማንን ብንይቶ ቶነ ለሞንከ ዘሬተ ጉዕሚንካት። ከተቦስ መንቹ ሀይመስ ሆጎ አሌን ሆስሶተለከ አመዕናኖተ ሀስሰኖ ሃሊንን ሄኡ ሀሲሰኖሃ እሁስ ለሊሽ ከተቦኡ፤ ህትን ቀባጦለከ ቡጥመተኔሃ፥ ፌተነለከ አመዕናኖተ ሀስሰኖ ጡመ ሄእተኔሃ፥ ምቀኞመተ፥ አመዕነትለከ ጡመ ሆጎተኔሃ፥ አረቤ ጡምመለከ ሂልመተኔሃ፥ ደግተኔሃ፥ መት-መቲን ብተምተኔሃ፥ ለዕዬኤ ለዕዬኤ ይተኔሃለከ ገው ሆፍስተኔሃ፥ ዎሎ መን አሌን ፈረድተኔሃ፥ ገዎን ድከእተኔሃ፥ አደብተኔሃለከ ዱእተኔሃ አመዕናኑተ እሁ ሀስሰኖሃ ግዳጀ መቲን መቲን ከተቦኡ።
ሶህኑስ አመዕናኖ ሄኦን አመዕነቱ ሆጎን ለሊሴኖሃ እሁስ ኩልታእተ።
መጻፉስ አፎሃ
ኣጉስ (1፥1)
አመዕነቱለከ ሀይመተ (1፥2-8)
ቡጥመተለከ ቀባጡተ (1፥9-11)
ፌተነተ (1፥12-18)
መገን ላገተ ሞጮጩለከ ሆጎን ሆስሱ (1፥19-27)
አደዶመተ ከለቁ ሀስሰኖበእገ ኣሴመ ሸዘነተ (2፥1-13)
አመዕነቱለከ ሆጉተ (2፥14-26)
አመዕናንቹለከ አረቤስተኔሃ (3፥1-18)
አመዕናንቹለከ ኣዱንያ አል (4፥1—5፥6)
አደደ ጠውሃ ኣሰንቶ ሸዘነተ (5፥7-20)
1
1 መገንለከ ቀርቾ መሲህ ኢስ ካድንቹ እኮም ያቁቢች ኣዱንያ አሌን ጉዕማንን ብንይቶ ቶነ ለሞሃንከ እስራኤል ዘሬተ ሶሀንቶእተ ሶህኑ፤ ማቶ. 13፥55፤ ማር. 6፥3፤ ሶቀ. 15፥13፤ ገላ. 1፥19።
ወገሬቱ ክዕኔሃ እሁን።
አመዕነቱለከ ሀይመተ
2 አመኤ ኦሶ! አደዱ ኦርሸት ኢልቶህዕኔ ወክት ሙንደዕዬ። 3 አመዕነቶንከክዕኔ ኢልታ ኦርሸ መሳን ፈረኬነንተገ ደጌነንተ። 4 አታዕሊን ኡሩክዕኔ መቱርቹሁ ጤዕይዩዕናን ኩሌኖህዕኔርቹ ዮህዕኔበእሩለከ ዊመ እኮኖተ አበቀአኖህዕኔሃ እሁን። 5 ክዕኔኤች አዬሃ ሀይመት ሆፈኦስጎር ህንቁዕነ መረርሲጭ ጉዕሚንከ ኣሰኖ መገኑ ኡጩን፤ እሲንከ ኣሰመኖስ። 6 ጠዉ እኮጎሬ መኑ ሸኩዕናን አመዕነቲን ዱአ አኡን፤ ቀልቤንከስ ሸከኖ መንቹ ቦብሪን ሀምበለም ሌንቄቀኖ ዊ ሁለ አጉደኖ። 7 ህትኔ መንቹ ቀርቺች መቱርቹሃ ደአኖሃ አጉዱንከስ። 8 መሰንትስ ሸከኖ መንቹ ዎቃንከስ ከበሃ ካጳ እሀኖቤቺሃት።
ቡጥችለከ ቀባጣሞ መንች ሙንዲኑተ
9 ዮስርቾን ህንቀሞ መንቹ መገኑ ሎርሰኖስቤቺሃ ሙንደኡን። 10 ቀባጣሙ እክ ገውስ ሆፍሾ መንቹ ገውስ ሆፍሲንከስ ተሽ ዩንስ፤ መሰንትስ እስ ገውንኩስ ባዳ ቦብሎገ ግግሉ ፈቀኖበአ። 11 አሩ አበ ቡሰን ፉለኖ ወክት ህከ ባዳ ቦብሉተ ሞሸኖ፤ ቦብሉንትስ ግግልታአ፤ ህትን ቦብሎስ ደኑንኩ በአኖ፤ ህትን ቀባጡተ ደጎተ ይ ከበለከ ካጵ እሀን ሬሀኖ። ኢሳ. 40፥6-7።
መን አሌን ኢልታ ፌተነተኔሃ
12 ኦርሸት ኢልቶስ ወክት ጠረኝ ኡረኖ መንቹ ማሰአሞእሃ፤ መሰንትስ ኦርሻን ጠረኝ ኡሬቤቺሃ መገኑ ኢትታስሀኑኡተ ኣሶተ ተቢሳሃ አዕዮ ሄእ አክሊልገ አዕይ ቶገኖ። 13 አዪሁ ፌተነመኖ ወክት «መገኑ ፌተኞኤ» ሆሮ ዩንከ፤ መሰንትስ መገኑ ሂለ ጠዊን ፌተነመኖበአ፤ ህትን ገዉንኩስ አዬኒ ፌተነኖበአ። 14 ጠዉ እኮጎሬ አዪሁ ፌተነመኖሁ ገይስ ሂለ ሄዕላቻን መሰገሚትለከ ጣንሰምት። 15 ህከኒች ኤተሮን ሂሉ ሄዕላቸት ላፈ እክ ጩብ እልታአ፤ ህትን ጩቡንኩ ነጵ ሬሁተ ኤበኖ።
16 ኢተንቴንተ አመኤ ኦሶ! ሉሶኖቼ። 17 ጡሙ ኣስቱትለከ ፈቁ ዮበእ በረከት ጉዕሙንኩ አሜተኖሁ ሰሜቺት፤ ሁኩን አሜተኖሁ ኑር አነ እኮለከ ዶረምበ ህከረንገ ሀሌገ ዘህበ መገን አዲች ድርታአ። 18 ክልቀቲችስ ሀንገፈ እንኮተ መገኑ ገይስ ሃሽኣቶገለከ ሀንቅስ ላጋን እሎኔ።
ሞጮጬማሃ ሆጎ አሌን ሆስሱ
19 ኢተንቴንተ አመኤ ኦሶ! ካን ደጌ፤ መኑ ጉዕሙንኩ ሞጮጪሃ ደዕለኖሃ እሁን፤ ጠዉ እኮጎሬ ጠወኢሃለከ ኡሙዕርሃ ደዕለኖሃ እሁንከ። 20 መሰንትስ መን ኡሙዕርት መገን ፈይመተ ኤባበአ። 21 ህካን እኮቤቺሃ ንጃስለከ ሂልመተ ጉዕመንከ ኡጅቴን ቀልቤንከክዕኔ ካሰሞ ነቢሳክዕኔ ፌሲሃ አታልታ ላገተ ገዉ ሆፍሲን ቶጌ።
22 መገን ላገተ ዊንሽቴነንተረ እኬ ቤሉ ገዉክዕኔ ሉሲሴነን ጠለዕል ሞጮጭቴነንተረ እኮኖቼ። 23 ላገስ ሞጮጭ ሆጎን ሆስስባሁ ለአቃንቺን ገዉስ ለአኖ መንቹ አጉደኖ። 24 መሰንትስ ሁኩ መንቹ ገዉስ ለአቀንቺን ለዕይ አብል ፉሎገን መ አጉደኖጎር ደዕልን ሀበኖ። 25 ጠዉ እኮጎሬ ነጠ ፉሸኖ መገን ሕገ ለዕይ ህከኔን ጠረኘኖሁለከ እሱንከ ሞጮጭ ሀቡዕነ ሆጎ አሌን ሆስሰኖሁ ሆጎንከስ ጉዕማንን ማሰአሞሃ እሀኖ።
26 አረብስ አገዕሩዕናን «መገኑ አመዕንዮም» የኖሁ ጉዕሙንኩ ገዉስ ሉስሰኖ፤ ህትን አመዕነቱንኩስ ተሰሃን። 27 አነ መገን ብሬን ነጠለከ ንጀሱ ዮበእ አመዕነቱ ከኔት፤ ሁኩንን ህዬሸ ኦሱተለከ ምንሰ አኑ ሬዮ ሜንቱ ኦርጨንቶ ወክት ሀዕሉሃለከ ህትን ከን ኣዱንያ አል ንጃሲች አገዕሩሃን።