ጳዉሎስ ፍልሞኔሃ
ከተቦ ሶህኑተ
ኣጉስ
ፊልሞን ኤንኬዕነሞሃ አመዕናንቹ እቅ፤ ቆላስያሲ ዱእ ምኒ መንቹ እሁስ መሌኖስ፤ ፍልሞን ኦኔሲሞሴ ዬኖ ሮስቹ ሄዕዮስ እቅ፤ ሁኩ ሮስቹንኩ ቀርቹስ ለገዕይ ኦሮዕዮ ወክት ኡሱር ምኔን ሄዕዮ ጳዉሎሴን ደቀሞ፤ ጳዉሎሴ መሳን ኦኔሲሞስ አመዕናንቹ እኮ፤ ጳዉሎስ ሶኮ ሶህኑት ፍልሞን እስቤቹ አሜተን ሄዕዮ ሮስቺንከስ ሀራዕረሞተ ቃግሳስተ፤ ጳዉሎስ ኦኔሲሞሴ ፍልሞኔን ሀራርሶተ ፈንቀሽ ሶሆተ ፍልሞን ሮስችገ አዕይ ቶጎተ እሁዕነ መሲህ ኢስ ሱዕሚን አመስቤቲገ አዕይ ቶጎተ ሶኮ። ት ሶኮ ሶህኑት አመዕኔ መኑ ኢታንለከ አጉሪን ሄኦተ ጡመተ ምሳል።
መጻፉስ አፎሃ
ኣጉስ (1-3)
ጳዉሎስ ፍልሞነ ገለትጩስ (4-7)
ጳዉሎስ ኦኔሲሞሴ ቶጎተ ፍልሞኒሃ ሆንጠህሾ ኡጭቱተ (8-22)
መጨረሸስ (23-25)
1
1 መሲህ ኢስተኔሃ ኡሱረኛ እኮም ኢች ጳዉሎሴችለከ አመኔቤቲች ጢማቶሴች ኢተሞ አመኔቤቱለከ ሆጎኔ ጃለ እኮ ፍልሞኒሃ 2 አመኔቤቶተ አፍብያሃ፥ ኒን ሜጡበ መሲህ ኢስ ዎታደረ እኮ አርክጳሴለከ ህትን ምኔክ ጭምይቶ አመዕናኖተ፤ *ምኔንከክ ጭምይታ አመዕናኖተ፦ የኖሁ ግርክ አፎን «ምኔንከክ ጭምይታ መንተኔሃ» የኖ። ቆላ. 4፥17።
3 አንችኔ መገኒችለከ ቀርቾ መሲህ ኢሲች ኣስቱትለከ ወገሬቱ ክዕኔሃ እሁን።
ፍልሞኔ ኢተተለከ አመዕነቱ
4 ዱአ አኣም ወክት ኬሳሃ ሰውየን መገኑኤ ጉዕመ ወክት ገለትጫሚት። 5 ቀርቾ ኢሳን ዮሄ አመዕነቱለከ ኢተተ ህትን አመዕናኖተ ዬሄ ኢተክ ሞጮጭዮም። 6 ኔሳሃ ሜጡ አዕዮኔ አመዕነቱ መሲህ ኢሲን ዮኔ ጡመ ጠወ ጉዕመንከ ብዝ አት አጥራመታንትገ አኦሄተ አን ኬሳሃ ዱአ አኣም። 7 ኢ አመቤቶ! ኪ መሳን አመዕናኖ ቀልብ ብዝ አዕይ ጠረኝሾቤቺሃ ኢተክ አበ ሙንዲኑተለከ ጠረኝመተ ኣቶኤ።
ጳዉሎስ አናስሞሴተኔሃ ሆንጠህሾ ዱአ
8 ህካን እኮቤቺሃ አኡ ሀስሰኖኤሃ አእ ይ ኬሳሃ አዘዞተ መሲህ ኢሲን መለል ጠወኦተ አታላም እቅ። 9 እኮጎሬ ካን አኣምሀኒች መሲህ ኢስተኔሃ ኡሱረኛ እኮም አን ባሊቆም ጳዉሎስ ኢታን ኡጩ መጠሮም። 10 አን ኡሱር ምኔን ሄአን ቤቱእ እኮ ኦናሲሞሴተኔሃ ኬሳሃ ኡጫንኬ። ቆላ. 4፥9። 11 አናሲሞስ ከኒች ብርተ ደግለሎሄበ እቅ፤ ቴሱ እኮጎር ኬሳሃ እኮ ኤሳሃ ደግለለኖኤ።
12 ህትን እሱንከ ኪቤቹ ፈንቀሽ ሶኮም፤ እሱ ኪቤቹ ፈንቀሽ ሶሃም ወክት ገዉኤ አዕይ ኢታምሀንገ አዕይ ወለኣም። 13 ተሽት ላገ መሳን ከኔ ኡሱረሞምሀኔን ኪቤቾን እክ ሀዕሎኤተ እስ ኢን ሜጡበ እኮ እቅ ተሽ የኖኤ እቅ። 14 ጠዉ እኮጎሬ አት አታንት ጡመ ሆጉተ ግዳጂን እሁዕነ ኢታን እሆተ ኬሳሃ ጠዕሙዕነ መቱርቹሃ አኦተ ሀሾምበአ።
15 አናስሞስ ቀዎ ወክቲሃ ኪች አደ እኮጎሬሁ ከ ኤተሩ ልግብ ወክት ኪን ሜጡበ ሄኦተ አታለኖ። 16 ከኒች ኤተሮን ኪን ሜጡበ ሄአኖሁ ሮስችገ እሁዕነ ሮስቺች በተዕዮሃ እክ ኢተሞ አመቤትጋት፤ እስ ኤሳሃ ኢታም አመኤሃ ቤቱ፤ ጠዉ እኮጎሬ እስ ኤሳሃ ኢታም አመኤቤቱ እኮች በትሽን ኬሳሃ ደግለሸቀሜኖ ሄኦንለከ ቀርቺን ሀት ኢተሞ አመክቤቱ እሀኖበአ?
17 ቴሱ ኤሳሃ አመክቤትገ አት ዎለኦንቴኤች ኢገ አት ቶግስ። 18 ኢልሾሄ ብድሉ ዮ ጎሬ ህከረንገ ኤዶ ዮስጎሬ ኢ አሌን ዎለእ። 19 አን ጳዉሎስ «ኤዳስ ባታም» ይ ገይኤ አንጋን ከተቦም፤ እኮጎሬ ኪ ሄእተኔሃ አት ገዉክ እኮንት እቃ ኢ ኤዶሁ ዮሄሃ እሁክ ቃግሱ ሀስሰኖበአ። 20 ቴሱ ኢ አመቤቶ! ቀርች ሱዕሚን ከ ጡመርቹ አቶኤተ ኡጫንኬ፤ ሀዕይ ቀልብኤ መሲህ ኢሲን ፎሎጨኖገ አኤኤ።
21 ካን አን ከተቦንኬሃ አታንትገ አመዕናም፤ ሆሮን አን ጠዕሜምሀኒች በትስ አታንትገ ደጋም። 22 ህትን መገኑ ዱአክዕኔ ሞጮጭ ክዕኔቤቹ አሜታምገ አአኖኤገ ተብሳሃ አኣምቤቺሃ ኤሳሃ ፎሎጫም ቤቹ ቅጥ አኤኤ።
ጎፍሜ ወገሬትተኔሃ
23 ኢን ሜጡበ መሲህ ኢስተኔሃ ኡሱረሞ ኤጳፍረ «ወገሬት ዮንተንዶ?» የኖሄት። ቆላ. 1፥7፤ 4፥12። 24 ህትን ሆጎእ ጃለተ ማርቆስ፥ አርስጥሮኮስ፥ ዴማስለከ ሉቃስ «ወገሬት ዮንትንዶ?» ይታሄት። ሶቀ. 12፥12፤ 25፤ 13፥13፤ 15፥37-39፤ 19፥29፤ 27፥2፤ ቆላ. 4፥10-14፤ 2 ጢሞ. 4፥10፥11።
25 ቀርቾ መሲህ ኢስ ኣስቱት ክዕኔን ሜጡበ እኩን።