ጳዉሎስ ፍልጵስዩስ መኒሃ
ከተቦ ሶህኑተ
ኣጉስ
ጳዉሎስ ከ ሶህኑተ ከተቦሁ መቄዶንያ ዬኖ ሮም መንግስት ገሽ ኣዜን ዮ ፍልጵስዩሳን ሄኣ መገን አመዕናኖ ዱእ ምኒሃት፤ ሁኩ ዱእ ምኑ ጳዉሎስ አውሮፕ ባዶን ዎዕናሃ ኡርሾእታን፤ ሶህኑስ ከተበንቶኢሁ ጳዉሎስ ኡሱር ምኔን ሄዕዮ ወክት ዎሎ አመዕናኖን ግበሙ ኢሌስ ወክትለከ ፍልጵስዩስ መገን አመዕናኖ ዱእ ምነ በላን ኬዕዮ ክዝብ ትምርት መሳን ቀልቡስ አበ ሻዦ ወክትዪት። እሁን ቤሉ ጳዉሎስ መሲህ ኢሳን ዮሲ አመዕነቱ አበ እኮቤቺሃ ከን ሶህኖን በትሽ ለለኖሁ ሙንዲኖተለከ ዊመ አመዕነቱ።
ጳዉሎስ ከ ሶህኑተ ከተቦ ዎኔ መሰት ኦርሸስ ወክት ሽልማት ሶኮሲሃ እኮቤቺሃ ፍልጵስዩስ አመዕናኑተ ገለትጮታት፤ እስለከ እሰ አሌን አደዱ ኦርሸት ኢልቶሳሃ እኮጎሬ መለሉለከ ዊሙ አመዕነቱ ሄኦሰተ ከን ገንባቴን ጠረኝሰኖሰ። ቦኑ አጉርት መሲህ ኢስገ ገዉ ሆፍሳረ እኮተ አበ ቃግሰኖሰ፤ መሲህ ኢስ አያኒን ሜጡበ እሂን ደእቶ ሄኡ መገን ኣስቶች አሜቾኢሃለከ አመዕነቲን ደእቶእሃ ቤሉ ሕገ አገሪን ደገሞእሃበአ የን ቃግሰኖሰ፤ መሲህ ኢሲን ሜጡበ እክ ሄኣሀኑኡ ጉዕሚንከ መገኑ ኣሰኖሰ ወገሬትለከ ሙንዲኑተ ከተበኖሰ።
ኩ ሶህኑት ደገንታኢሁ ሙንዲኑተ፥ አመዕነሙ፥ ሜጡበ እሁለከ አመዕነት ሄኢን ጠረኙ በትሽ ለሊሶንከሲት፤ በርግን አሳቤቹ ጳዉሎስ ፍልጵስዩስ መገን አመዕናኖ ዱእ ምኒሃ ዮስ አበ ኢተተ ለሊሰኖ።
መጻፉስ አፎሃ
ኣጉስ (1፥1-11)
ጳውሎሴሃ ሀለኘስ ሀለት (1፥12-26)
አመዕነት ሄእ ምሳልተ (1፥27—2፥18)
ጢሞትዎሴለከ ኤጳፍሮዲቱሲሃ ያደተ (2፥19-30)
አመዕነቱ ግባሀኑኡሃ ኩለሞሰ ጠረኘ ጠወ (3፥1—4፥9)
ጳዎሎስ ፍልጵስዩስ አመዕናኖተ ሆንጠህሾ ገለትለከ ሸዘነተ (4፥10-20)
መጨረሸስ (4፥21-23)
1
1 ኩ ሶህኑት መሲህ ኢስ ካዲመተ እኮ ጳዉሎሴችለከ ጥማቶሴች ሶሀንቶእተ ሶህኑ፤ ሶሃሞንኩ «ፍልጵስዩስ» ዬኖ ከተማን ሄኣ አመዕናኖ ጭምት አዎንሳኖሃ፥ ድያቆናከተለከ *ድያቆነ ሆጉት፦ ምኒ አኑ ሬዮ ሜንቱ ካደሙሃን። መሲህ ኢሳን አመዕንት ጠሊላኑተ እኮሀኑኡሃ ጉዕሚንካት። ሶቀ. 16፥12።
2 አናኔ መገኒቺ ቀርቹሃኔ መሲህ ኢሲች ኣስቱትለከ ወገሬቱ ክዕኔሃ እሁን።
ጳዉሎሴ ገለት ዱአ
3 አን ክዕኔተ ቃጋም ወክት ጉዕመንከ መገኑኤ ገለትጫሚት። 4 አን ክዕኔተኔሃ ዱአ አኣም ወክት ጉዕመንከ ሙንዲኖን ዱአ አኣሚት። 5 ወዕኔ በሬች ጀመር ከበሬ ኢለ ተሽት ላገተ ኢን ሜጡበ እኬን አቴንተቤቺሃ መገኑ ገለትጫም። 6 ከ ጡመ ሆጉተ ክዕኔን አኦተ ጀመሮ መገኑ መሲህ ኢስ አሜተኖ በር ሹሎተ ኢለ አገረኖገ አመዕናም። 7 ቴሱ ኡሱር ምኔን ዮም ወክትለከ ኡሱረምችኤ ብርተ እንጂል ሀንቂሃ ከዕመቀሞተለከ እሱንከ ጠረኝሲሃ አኣም ወክት መገኑ ኣስቶንከስ ኣሴኤ ዕድሊን ጉዕሙንኩክዕኔ ቤቀማኑተ እኬንተቤቺሃ አዕኑ ጉዕመ ወክት ቀልቤንከኤ ዮንተ። ህካን እኮቤቺሃ ክዕኔተኔሃ ሞጮጨመኖኤሁ ሀንቅሃን። 8 መሲህ ኢስ ኢታን ጉዕመንከክዕኔ ሄንከ ሱናሚት ጎሬ መገኑ ደገኖ።
9 ኢተክዕኔ ኤንኬዕኑለከ ሀይመተ ሰውዩ ዊሞሀ እክ ነጰን መረኖገ ዱአ አኣም። 10 እስን ጡመ ጠወ አጥራመቴን ደጎኖተለከ መሲህ ፈንቀል አሜተኖ በር ነጣኑተለከ ሙልሲሰኖ ጠዉ ዮህዕኔበእረ እኬን ደገንቶኖታት። 11 ህትን መሲህ ኢሲን ደገመኖ ፈይመ ላልቺን ዊንቴን መገኒሃ ኬዕምኝለከ ገለት ደግሲሴነንታሃ እኬነንተ።
ጳውሎሴ ኡሱረሙ እንጂሉ አልባዕሎተ መሰተ እሁስ
12 አመኤ ኦሶ! ኢ አሌን ኢሌ ጠዉ ጉዕሙንኩ እንጂሉ አበ አልባዕለኖገ አኡስ ደጎኖተ ሀሳም። 13 ህካን እኮቤቺሃ አን ኡሱረሞሚሁ መሲህተኔሃ እሁስ ሮም ዎም ምኒ ዘበኛኑትለከ ዎሉ ህከኔ ዮ መኑ ጉዕሙንኩ ደጋአ። ሶቀ. 28፥30። 14 ቀርቾን አመዕንቶ አመኦሶች ልግቡሰ ኢ ኡሱረምተኔሃ ቀርቾን አመዕነንት መገን ላገተ ዎዕኔች በትስ ዋጅቱዕነ መለልት ዱዱብስታኢት።
15 እኮጎሬ መት-መቱ መኑ መሲህተኔሃ ዱዱብስታኢሁ አቄሻንትለከ ዎሉሰ ጢቄኒት፤ ጠዉ እኮጎሬ ዎሉስ መኑ መሲህተኔሃ ጡመ ቀልቢን ዱዱብስታኢት። 16 እሰ ተሽት ላገተ ፈየ ቀልቢን ዱዱብስታኢሁ ኢታች ኬዕዮሀኒንት፤ መሰንትስ አን ኡሱረሞሚሁ ተሽት ላገተ ሀንቂን ሰበኮተ አጰማምገ ደጋቤቺሃት። 17 ጠዉ እኮጎሬ አቄሻንለከ ጢቄን መሲህ ዱዱብስታኢሁ ሀንቂን እሁዕነ ገዉሰ ኢቲንለከ ኡሱረምኤ አሌን ዎልት ኦርሸተ በርግታኢሃ አጉጆሰቤቺሃት።
18 መሃ እኮጎሬ ሀካንስ እኮጎሬ ጉዕማንከ ዎቄን አመሰሊን እኮ ሀንቂን እኮ እቃ መሲህተኔሃ ዱዱብሰመኖቤቺሃ ሙንደኣም። 19 ከኒች ኤተሪሃ ሙንደኣም፤ መሰንትስ ክዕኔ ዱኢንለከ መሲህ ኢስ ጠሊለ አያኒ ሀዕለንሺን ዮኤ ኦርሻች ፉላምገ ደጎምቤቺሃት። 20 ህካን እኮቤቺሃ መ ጠዊኒ ሙላምበእገ ዊሙ ሃሽኣቱትለከ ተብሶሁ ዮኤ፤ ጠዉ እኮጎሬ ጉዕመ ወክት አኣምሀንገን ቴሁ ሄዕዮምጎሬ ህከረንገ ሬዮምጎሬ መሲህ ዊመ ጅስምኤ አሌን ሎረ እሀኖገ ዊሙ መለሉ ዮኤ። 21 ህካን እኮቤቺሃ ኢ ሄኡ መሲሂን ሄኡሃን፤ ሬሁተ እኮጎሬ ኤሳሃ ደግለለኖኤሃን። 22 ጠዉ እኮጎሬ ፎሊን ሄዕዮምጎሬ ላልቹ ዮስ ሆጉተ ቀርቺሃ አኦተ አታላም፤ እኮጎሬ ሬሆችለከ ሄኢች ሀካንስ መጠራም ጎር ደጎምበአ። 23 ከን ለሞ ጠዋን ቀልቡኤ ለሙ ቤቹ እኮኡ፤ እስን መቶ አዲን ከን ሄኢች አደ እክ መሲህን እሆተ ሀሳም፤ መሰንትስ ሁኩን ጉዕመርቺችን በተአኖሃ እኮቤቺሃት። 24 ጠዉ እኮጎሬ አን ሬሁዕነ ፎሊን ሄዕዮምጎሬ ክዕኔሃ በትሽ ጡመሃን። 25 አን ከ ጠወ አመዕንዮም፤ ሁኩንን ሙንዲኑክዕኔለከ አመዕነቱክዕኔ ነጰኖገ ሬሁዕነ ፎሊን ሄኣምገ ደጎም። 26 ህካን እኮቤቺሃ አን ክዕኔኤን ለንኪሃ ደቀሞምጎር ኢ መሳን መሲህ ኢሳን ዮህዕኔ ቦኑ አበ እሀኖ።
27 ጉዕሚችን በትሴን መሲህ እንጅሊሃ ሀስሰኖገ ሄዕዬ፤ አሜች ለዕዮንክዕኔጎሬ ህከረንገ ክዕኔች ቄዕር ክዕኔተኔሃ ሞጮጬምጎሬ መቶ ቀልቢን እንጂል አመዕነትተኔሃ ሜጡበ እኬን አጰንቴነንተገ ደጋም። 28 ክዕኔተ ግባህዕኔረ መ ጠዋኒ ዋጅቶኖቼ፤ ኩንን እሳሃ በእሰተ መላ፤ ጠዉ እኮጎሬ ክዕኔሃ ጡምተ መላ፤ ሁኩንን መገን አዲቺት። 29 መሰንትስ መሲህን አመዕንቶኖተ ጠለዕል እሁዕነ እስተኔሃ ኦርሸተ ቶጎኖተ ኩን ኣሰሞህዕኔ። 30 ህካን እኮቤቺሃ አዕኑ ከኒች ብርተ አጰንሸኤ ለኤንታአ፤ ቴሁ ኢ አጰንሸ ለኤነንታት፤ አዕኑሁ ህትናሙ አጰንሸ አጰንቴነንተ። ሶቀ. 16፥19-40።