1 ኩ መገኑ ለሊሾስ ሶህኑት ግደኖ ወክቴን እሀኖሀ እሁስ ካዲማተስ ለሊሶተ መገኑ መሲህ ኢሲሃ ኣስዮስሃን፤ መሲህ ኢሲን መላይኬቹስ ሶክ ካዲሚሀስ ያህዪሃ ከ ሶህኑተ ለሊሾስ። 2 ያህይን መገን ላገተኔሃለከ መሲህ ኢስ ምስክር እህስተኔሃ ህትን ለሊሾስ ጠወ ጉዕመንከ መሰከሮ። 3 ኩ ጠዉ ጉዕሙንኩ እሀኖ ወክቱ ግደኑ እኮቤቺሃ ከ ራግ ላገተ አነበበኖሁ ማሰአሞእሃን፤ ህትን ከ ራግስ ላገተ ሞጮጭታእሩለከ ከን ራግ ላገ ኣዜን ከተበሞሃ አታእሩ ማሰአንቶእራን።

4-5 ያህዪች እስይ ባዶን ለመላንከ መገን አመዕናኖ ዱእ ጭምት ምናች ዮሀኒች፥ ሄዕዮሀኒችለከ አሜተኖ መገኒች፥ ጄነትስ ቦርጭመ ብሬን ዮ ለመለ አያኒች፥ ህትን ሬሆች ኬኢን ሀንገፈ እኮ ኣዱንያ አል ዎመ ዳኛኑተ ገሸኖሃ፥ አመዕነሞ ምስክር እኮ፥ ኢተኖህዕኔሀኒችለከ ቄጊንከስ ጩቢችኔ ነጠ ፉሼኔ መሲህ ኢሲች ኣስቱትለከ ወገሬቱ ክዕኔሃ እሁን። ፉል. 3፥14፤ መና. 4፥5።ኢሳ. 55፥4፤ መዝ. 89፥27። 6 መሲህ ኢስ አና መገኑ ካደሞተ መንግስትስ ኡመት ቂሰተ አዕዮኔ መሲህ ኢሲሃ ኬዕምኙለከ ወልቀት ዘማንሃ ጉዕሚንከ ኢለ እሁን! ኣሚዕን። ፉል. 19፥6፤ መና. 5፥10።

7 መኑ ጉዕሙንኩ እሱ ቀሶሩ ፈቁዕናን ጎማን አሜተን ለኣአ፤ ህትን ኣዱንያ አሌን ዮ ኡመቱ ጉዕሙንኩ አሜትስተኔሃ ኦኣአ፤ ሁኩ ጠዉ ሀንቅሃን፤ ኣሚዕን። ዳን. 7፥13፤ ማቶ. 24፥30፤ ማር. 13፥26፤ ሉቃ. 21፥27፤ 1 ተሰ. 4፥17፤ ዘካ. 12፥10፤ ያህ. 19፥34-37።

8 ጉዕመንከ አታለኖ ዎዕናሃ፥ ቴሁ ዮኢሁለከ አሜተኖ ቀርቹ መገኑ «ዎዕኔሁለከ ኤተሪሁ አኔት!» የኖ። *«ዎዕኔሁለከ ኤተሪሁ አኔት!» የመሞሁ አማርሳን አልፈለከ ኦሜገ፦ የኖሁ አማርሳን «ወዕኔ ‹ሀ› ፍደልገለከ ኤተር ‹ፐ› » ፍደልጋት፤ ህትን ግሪክ ባድ ፍደሊን ዎዕኔለከ ኤተር ፍደለ ዩሃን፤ ሁኩን ጉዕሙንኩ መገን ዎልቀ ኣዜን ሄኡስ ለሊሰኖ። መና. 22፥13፤ ፉል. 3፥14።

9 አን አመክዕኔ ቤቱ ያህይ ኢስተኔሃ ኦሪሸተ ኣኡለከ አታዕሉሃ መገን ጄነት ኣጉሃ ክዕኔንን ሜጡበ ወጡ ዮኤሃን፤ አንን መሲህ ኢስ ዱዱብሴ መገን ላገተ ጠወዕዮምቤቺሃ ዊን ረበንቶ «ፍጥሞ» ዬኖ ባዶን ሄዕዮም እቅ። 10-11 ቀርች በሬን ጠሊለ አያኒን እክ ሄዕዮም ወክት ኤተርኤ አዲን «ከ ለኣንቲሃ መጻፋን ከተብ፤ መጻፈስ ‹እስየ› ዬኖ ባዶን ዮ ‹ኤፌሶኒሃ፥ ሰምርኔሲሃ፥ ጴርጋሞኒሃ፥ ትያጥሮኒሃ፥ ሰርዴሲሃ፥ ፊላደልፍየለከ ሎዶቅየ› ዬኖ ለመላንከ ከተማን ዮ አመዕናኖ ዱእ ምነ ጭምቲሃ ሶህ» ይታ ጡሩምብገ ዮ አበ ላገተ ሞጮጬም።

12 ጠወዕዮኤ መንቹ ለኦተ ኤተር አደ ዘህ ለዕዮም ወክት ዎርቂን መክሴመ ለመለ ኩራዘ አፉሼኖሀኒንከስን ለዕዮም፤ 13 ህከን ኩረዘ አፉሼኖሀን በላን ሎከስ ኢለ ቅራዕሩ ኦድኑተ ኦደዕይ ወዘነስ ዎርቅ ቀበቶን ቆዕሬ መንች ቤቱ አጉደኖሃ ለዕዮም። ዳን. 7፥13፤ 10፥5። 14 ቡዕሉስለከ ሙሙስ በረድገለከ ሱፍገ ዋጁሃ እቅ፤ ህትን እልስ ጊረ ለበነተ አጉዳ እቅ። ዳን. 7፥9፤ 10፥6። 15 ሎከስ ምዳች ጊረ ክፈሊን መክሴመ ናሰ ዬኖ ብረት አጉደኖሃ እቅ፤ ላገስ ፋማን ዛዘኖ ዊ ላገገ ዮእሃ እቅ። ሕዝ. 1፥24፤ 43፥2። 16 መኬስ አንጋን ለመለ ቤዜተ አፎ እቅ፤ እስ አፌች ለሞ አዲን እጳሹ ሲፉ ፉለኖ እቅ፤ ህትን ሚንስ ዊመ ኑሪን ለሊሰኖ አሪጋት እቅ። 17 አን እሱ ለዕዮንስ ወክት ሬዮ መንገ እክ ሎከስ ኣዜን ኡቦም፤ እኮጎሬ እስን መኬስ አንገተ አሌእ አዕይ «ዋጅቶት! ብሬሁለከ ኤተሪሁ አኔት። ኢሳ. 44፥6፤ 48፥12፤ መና. 2፥8፤ 22፥13። 18 አን ሄኣምሃን፤ አን ሬዮም እቅ፤ ጠዉ እኮጎሬ ቴሁ ዘላለሚሃ ሄኣምሃን፤ ህትን አን ሬሁተለከ አዛብ ፈናም ቁልፉ ዮኤ። 19 ቴሱ ለኦንቲሃ ዮኢሀለከ ከኒች ኤተሮን አሜተኖሃ ለኣንቲሃ ከተብ። 20 ዎርቂን መክሴመ ለመለንከ ኩራዘ አፉሼኖሀንለከ መኬ አንጋን አፋን ለኦንት ለመለንከ ቤዜ ፍሳረት ከኒት፤ ለመሉ ቤዜት ለመላንከ መገን አመዕናኖ ጭምት ዱእ ምነተ መላይከ፤ ህትን ለመሉ ኩራዛ አፉሼኖሁ ለመለንከ መገን አመዕናኖ ጭምት ዱእተ ምነ» ዬኤ።