Colossians
Colossae-areny-rnem-warl
Paul-el pip nhenh thwenew Colossae tawen-areny-rnem-warl.
Ingwerentyel arrwekel-antey tyaty arrernew, Paul-el Colossae-areny tyaty arrerney-angenh. Paul ingkern-they apetyew. Paul ranem atyetyart irrew ikwer-rnemew. Angkakert-rnem ra thwenew ilerl-apaynteyew, Ephesus-areny-rnem ra thwenew. Ephesus ra anenh apmer ilkwa Asia-ampenyel, Rome-areny-rnem atyetyart anenh. Paul-el awenh ingwer-angkwarr, rernem akalty-anthenh, ilpertelenh.
Akalty-anthey-angker apmwamwam mwanty iterl-arey-angenh anenh. Rernem ament-warl ikwer-rnem-wenh akalty-anthenh. Ikwer-rnem-wenh-angkwarr apententy, ngap itetherreyew-arrpantey arrkernelhem. Arrangkwarlap ran. Aker arlkwey-angenh, alakenh rernem iterrenh. Jesus-wenh-angkwarr apentewerr, arraty inngewety.
Paul-el pip ikwer-rnem-warl thwenew, renh-rnem akalty-anthaynteyew angka arraty-angkwarr. Jesus Christ-wenh-angkwarrant rernemap itetherreman. Ament-angkwarr akalty-antheyel arrangkwarl, nthakenh itetherrey-angenharl, “Jesus renh nakenty, ngap itetherreman.” Jesus Christ-elant ingkerrenh itethelem. Ingkartel ahern arrpmernew. Alakenh-they Paul-el angka ikwer-rnem-warl thwenew.
1
Atha Paul thwenew, Ingkartel ayenh arrernew angkakert Christ Jesus-wenh. Timothy-el-then, Ingkart-wenh-angkwarr apenteyel arrpemarl.
Timothy aylanth pip nhenh thwenem arrewantherr-warl, Colossae tawenel aneyel-rnem-warl, iylpareth awelheyel-rnem-warl. Akngey anewantherrenh Ingkartel arrenhantherrenh mwantyel arntarnt-arem, arrantherr mwerrant-arey anaynteyew. Anantherr arrewantherr aleth-antey ayerneyel Ingkart Jesus Christ. Ingkartew anantherr inkwerelheyel, aynikw ikwerenhew. Anantherr kel awew arrantherrarl Jesus Christ nakeyel, arrantherr Ingkart-areny ingkerrenh arntarnt-areyel. Alakenh-anyem anantherr Ingkartew angkem inkwerelhemel. Arrantherr Ingkart nakeyel, rarl arrwekel ilew, arrantherr iteth intem-antey anaynteyew. Arrantherr angka mwerr-angker Ingkart-wenh awenh. Angka mwerr-angker Ingkart-wenh arlpimperreyel apmer arrpanenh-warl. Rernem apmer arrpanenhew akalty-antheyel. Rernem nakew inkwerelhemel. Alakenh-anyem arrantherr angka akwerrpel awenh arrpemarl, “Ingkart ingkerrenhew ilkelheyel” wenh. Artwa Epaprahas-el arrenhantherrenh akalty-anthenh alakenh, “Ingkart ingkerrenhew ilkelheyel” wenh. Ra Ingkart Jesus-angkwarr warrkerrenh, anantherr warrkerreyel-apeny. Ranem arrenhantherrenh akalty-anthenh, Ingkart-wenh Inwengel arrenhantherrenh akalty-anthenh arrpemarl, ingwer-rnem-itwew mwerrant-arey anaynteyew. Alakenh-they anantherr angka awek-anem, arrewantherr-penh.
9-10 Alakenh-anyem anantherr Ingkart renh-anem ayernew. Anantherr aleth-antey ikwer angkeyel, arrantherr Ingkart-wenh-angkwarr arraty apenteyew, rarl iterreyel-angkwarr, Inweng Mwerr-angkerel arrenhantherrenh akalty-antheyew, arrantherr arraty iterreyew. Inweng-angkwarr akaltyerreyn-aynteyew aleth-antey, ingwer-rnem arntarnt-araynteyew mwerr-angkwarr. Arrantherr artwentyel innga akaltyerreyew angka ikwerenhew. 11 Ingkartel arrenhantherrenh rlterrkam-rlterrkeleyenh. Ingwerentyel arrenhantherrenh apmwewarlelewerr, arrantherr inkwerelhemel aleth apent-aynteyew ikwerenh-angkwarrant mwerr-angkwarr-ayteng. 12 Anantherr-anem Akngeyew inkwerelheyew, rarl angka arrwekel arrernew, arrantherr apmer alker-itwew aney-alpeyew. 13 Ran anenhantherrenh apmwewety rakew, rantey arrpemarl alerikw ikwerenh arrernew, Atyetyart anewantherrenh aneyew, anantherr ikwerenh-rnem anaynteyew. 14 Ingkart-wenh alerikw ranem anewantherr katy ilwew, apmwa anewantherr-wety iweyew, anantherr iteth intem-antey anaynteyew.
Alerikw ahern-areny ingkerrenhew aneyew
15 Anantherr nthakenh Akngey irrwerl-areny arey-angenh. Alerikw ikwerenh atyetyart apmer arrpanenhew. Alerikw retangkwel arrwekel anenh ahern-wenyankel. Alerikw ikwerenh ingkerrenhew anaynterrew-anem, Ingkart anyent rey-antey. 16 Rlterrk ikwerenhel ra irrwerl-areny-rnem-then ahern-areny-rnem-then arrpmernew. Aleyarl anantherr areyel-anem. Ikwer-angkwarr inweng-rnem-then ingkerrenh arrpmernew, nthakenh arey-angenh-rnem. Alerikw rlterrk ikwerenh-angkwarr ra ingkerrenh arrpmernew, atyetyart ingkerrenhew anaynteyew. 17 Alerikw ra kel anenh, ahern nhenh-wenyankel. Ingkartel ahern-areny-rnem-then arrpmerney-angenh-antey, rant anenhan. Alerikwel ingkerrenh-antey atnyeneyel, ahern-areny-rnem ingkerrenh atnyeneyew. 18 Christ-then Tyaty-areny-rnem anyent-antey, Jesus Christ akapwert-apeny atyetyart aneyel ingkerrenhew. Anyent arlka ikwerenh-apeny anem, inweng anyent-akert rey-antey ikwer-rnem warrkerreyel. Ingkartel renh-tangkwel ipmepenh akemelhelew, alerikw ra ingkerrenhew atyetyart aneyew. 19 Aray, Ingkartelant alerikw ikwerenh arrernew, ikwer-apeny anaynteyew Ingkart irrkaty-antey ikwer-apeny, anyent rey-antey. 20 Alerikw ikwer-angkwarr alker-areny ahern-areny ingkerrenh ikwerenh-rnem ayerrpelew. Alerikw ikwerenh arwerl iylpeyl-atherrel ilwemel, ra mwerr-angkwarr mpwarew ingkerrenhew anantherr apenterl-aynteyew, mwerrant-arey anaynteyew, arternpel.
21 Arrantherr Ingkart-wety ament-warl alhenh. Arrantherr apmwangkwarr alhenh ament iterremel, Ingkart-wety arlkarrerrenh. 22 Alerikw-anem arwerl iylpeyl-atherrel ilwew, arrantherr Ingkart-wenh-angkwarr arraty aneyew. Ra ikwer-warl anyentelhelew, alyelk mwerr anaynteyew, Ingkartel arrenhantherrenh tyatyemeley-angenh. 23 Arrantherr Ingkart-wenh-angkwarr aneyew, angka mwerr renh rlterrk nakemel. Arrantherr-anem angkew iylpelerrey-angenh, Ingkartel arrewantherr arrernew, arrantherr iteth intem-antey anaynteyew. Ingkartel ayenh rlwanew, angka mwerr-angker Ingkart-wenh ilerl-apaynteyew ahern-areny ingkerrenhew.
24 Ayenh apek menty atwem mwerrarl. Christ Jesus arlka menty anthelhew. Ayeng arlka menty anthelhew arrpemarl tyaty-areny ingkerrenhew. 25 Akngeyel ayenh arrernew, tyaty-areny-rnemew, warrkerreyew, angka ikwerenh ingkerrenhew akalty-antheyew, ingkerrenhew warrkerreyew. 26 Arrwekel angka anyelk-tangkwel ayntenh, Aley angka anaynt-anem Ingkart-areny ingkerrenhew, rernem aketh-antey aweyneyel. 27 Ingkart ilkelheyel arrantherr Jew-weny-rnem akalty aneyew, angka ikwerenhew, arrantherr apmer mwerr-angker-itwew aney-alpeyew, Christ-wenh-angkwarr.
28 Rernem-anem Jesus Christ-warl anyenterremel, Jesus Christ nakeyenh. Anantherr renh-rnem akalty-anthem, rernem arraty-angkwarr apenterl-aynteyew, ingwer-rnemel renh-rnem ilpertelewerr. 29 Christ-el ayenh rlterrkeleyel. Alakenh-anyem ayeng warrkerreyel, alhengkerr irrey-angenh. Atha ingwer-rnem akalty-anthaynteyew ipmelhey-angenh.