1 Atyetyart-rnem, arrantherr warrkenh-rnem mwantyel arntarnt-aretyek, ilek-ilek arraty anthayntetyek. Arrantherr atyetyart arrekantherrenh iterl-areyel, irrwerl-they areyelarl-wety.

2 Intem-antey Ingkart-warl angkerl-ayntetyek, ikwer arraty iterr-ayntetyek, ikwer inkwerelhetyek. 3 Arrantherr Ingkart-warl angketyek, ra ingkerrenh iylpa altyweriletyek, ingkerrenhel angka Christ-kenh arraty awetyek. Angka anyelk-tangkwel ayntenh. Angka atha ilerl-apenh arwa alhewer. Ingwer-rnem arlkarrirrenh, alakenh ayenh rernem tyayel-warl akwernek. 4 Arrantherr Ingkart renh ayernenherr-arey, ra ayenh rlterrkiletyek, atha angka anyelk-penh arraty anayntiletyek ingkerrenhek.

5 Arrantherr akwerrp-rnem angka ikwer akalty-anthetyek, rernem iterl-arayntetyek arrpemarl. 6 Arrantherr arternp ilayntetyek ikwer-rnem. Rernem arrenhantherr ayernenty, arrantherr renh-rnem arraty iletyek.

7-8 Artwa Tychicus-el ra atyenh aneyel arrpemarl, Ingkartek iylpareth. Ra Ingkartek warrkirreyel arrpemarl. Athanem renh arrekantherr-warl thwenem, ra atyeng-iperr ingkerrenhek iletyek, arrenhantherrenh arternpiletyek, atyeng iterrerl-anekerr. 9 Onesimus atha thwenem arrpemarl arrekantherr-warl. Ratherr atherrel-antey angka anwekantherr-iperr iletyek.

10 Aristarchus ra atyeng-itwel aneyel arrpemarl, tyayl-itwek. Ra angka thwenem arrpemarl. Ingwer-rnemel angka thwenem arrpemarl Mark ikwer-penh, Barnabas-kenh ankelikw. Ra apetyenty, arrantherr ikwer inkwerelhem arrpemarl.

11 Jesus itnan ingweran Justus. Artwa Jew irrpety rernemant Jesus Christ renh tnakeyel arraty. Rernem anwekantherr-itwek warrkerreyel. Rernem anwenhantherrenh arternpileyel.

12 Epaphras arrekantherrenh arrpemarl apmer nhak-areny, Jesus Christ-kenh warrkenh arrpemarl Hallo angkeyel arrpemarl. Ra rlterrk aleth Ingkart ayerneyel, ipmelhey-angenh, arrenhantherrenh rlterrkiletyek, arrantherr arraty-angkwarr apenterl-ayntetyek. 13 Ayeng akalty, ra arrekantherr iterreyel aleth, tyaty-areny-rnem ingkerrenhek, Laodicea-areny-rnemek, Hierapolis-areny-rnemek.

14 Arntety mwerreley-angker wethey, Luke-el angka thwenem arrpemarl, Demas-el angka thwenem arrpemarl.

15 Laodicea tyaty-areny-rnem iletyek arrpemarl, “Ayeng iterreyel arrekantherr” wenh, arelh Nympha arrpemarl, ingwer-rnem-then meeting-ek akarrirreyel ikwer-warl.

16 Arrantherr pip nhenh reytemiletyek arrpemarl. Arrantherr pip nhenh thwenem Laodicea-areny-rnem-warl, rernem reytemiletyek arrpemarl. Arrantherr pip reytemiletyek arrpemarl. Pip atha arrwekel thwenek Laodicea-warl, arrantherr reytemilemel aretyek, iterl-aretyek.

17 Artwa Archippus iletyek, “Ingkartek warrkirretyek angka ikwerenh ywerrelhiletyek, akalty-anthemel, rarl ngkweng arrernek-angkwarr-antey.”

18 Ayeng inkwernelheyel angka atyenh, Paul. Atyeng iylpangkenh-arey, ayengarl tyaylel aneyelek. Ingkartel arrenhantherrenh mwantyel arntarnt-arem.

Kel-antey.