1 Awank-akerr, Abraham rarl iteth anenh-angkwarr, apmer Canaan amern-weny irrek. Irrkaty-angkwarr arrpemarl apmer ra amern-weny irrek arrwekel. Isaac tawen Gerar-warl alhek, Abimelech-warl, Philistia-areny Atyetyart ikwer-warl, INGKARTelarl Abraham renh ilek-angkwarr. 2 INGKART aremirrek Isaac ikwer-warl. Angkek ikwer-warl, “Egypt-warl alhey-angenh-antey nhenhel-antey anaynta! Atha ngenh atnwenhey, apmer renh atha ngkweng iylparrernetyek. 3 Atha ngenh aleth arntarnt-arayntetyek apmer ilenhek, alethang inngey ngarl. Atha apmer ngenh anthem, ngkwenh-rnem-then, atharl Abraham renh alhelek-angkwarr. 4-5 Atha ngenh apmer anthem, ngkwenh-rnem akngerrirretyek apmer ilenhel. Akngerr innga rernem aneyenh, antyarr-rnem akngerr innga aneyel-apeny. Ngkwenh-rnem ingkerrenh mwerrant-arey anetyek, apmer arrpanenhek, Abraham-arl atyeng awelhek-angkwarr.” 6 Isaac apmer Gerar-itwek kel aney-alpek. ...