1 Jacob-el awek Laban-kenh alerikw-rnem ikwer angkerrenharl, Jacob ra man akngerr-akert, yep-yep-rnem-then nanikwet-rnem-then, ampwal-rnem-then. Akngey anwekingkerrenhel renh anthek, rarl akngey anwekingkerrenh-they akngerr inek. 2 Jacob-el Laban renh arek, Laban rarl ikwer arlkwenteyang-anemarl.

3 INGKARTel Jacob renh ilek, “Akngey-kenh arreng-kenh apmer-warl nga alpetyek. Ayengan ngkweng-angkwarr alhetyek arrpemarl ilkwatherr.”

4 Jacob yangkelhek Rachel-ek-atherr Leah-ek-atherr ratherr ikwer-warl apetyetyek, renh rlwatetyek yep-yep-akert. 5 Jacob-el renh-atherr ilek, “Akngey mpwel-kenh atyengety arlkarirreyel-anem. Akngeyel ayenh arntarnt-arek, akngey atyenharl ikwer inkwerelhek. 6 Ayengarl warrkirrek mwantyel Akngey mpwel-kenhek. 7 Akngey mpwel-kenhel ayenh man arraty anthey-angenh. Akngeyelant ayenh arntarnt-areyel. 8 Akngey mpwel-kenhel yep-yep irrpwerl-rnemant, lthweyakw-lthweyakw-rnemant alhelek. Kel rernem-anem akngerrirrek. 9 Ilenh-angkwarr Akngeyel atnwenth renh-rnem kel rakek, ayenh-anem anthek.

10 Kel atha altyerr arek, atnwenth-rnem ingkerrenh. Yep-yep-then nanikwet-rnem-then akngerr inngan anek, lthweyakw-lthweyakw ingkerrenh. 11 Akngey-kenh angel atyeng arlkek, ‘Jacob-ay.’ ‘Nhantey ayeng aneyelaw.’ Ayeng ikwer ilelhek. 12 Angel-el ayenh ilek, ‘Ntwa areyel lthweyakw-lthweyakw ilenh-rnem? Aray! Atharl arek Laban renh, rarl ngenh irrtywerremel ilek. Atha atnwenth-rnem lthweyakw-lthweyakw renh-rnem mpwarek. 13 Aray, ayeng Akngey apmer Bethel-areny. Wetharl ntwa apwert anterel apernek, ayenh arraty ilek. Arraty ntwa ayenh alhelek. Apmer nhenh ntwa iwerlelpetyek, apmer ngkwenh-warl-anem nga alpetyek.’ ”

14 Angkwerenheng ratherr Jacob renh ilek, “Akngey-they anwantherr arnkwa akngerr ineyang ikwer-they. 15 Ingwer-apenyarl anwantherr ikwer arrareyel. Man anwenhantherr anthey-angenh, anwantherrarl itengirrek. Ratherr tyel-angkenh aynikw ikwer-atherrenhek. 16 Arnkwernem ampwal ilenh-rneman aylekenharl ampernem-kenh-then, anwernekantherrenh. Akngey ikwer nga awelhetyekant. Alakenh-anyem akngey aylekenh-they Akngeyel rakek, ngenh-anem anthek, anwantherr-anem renh-rnem atnyenetyek.”

17 Jacob-el anew-rnem-then ampernem-then kamwerl-warl tywenek. 18 Rernem alpek aynikw ikwerenh apmer-warl, apmer Canaan-warl. Atnwenth-rnem ingkerrenh ampwal-rnem-then rarl inek malyikw-they, ra akngeynetyek.

19 Laban-el yep-yep ikwerenh-rnem alta althek-angkwarr, Rachel-el ampwal ikwerenh-rnem anyelkel inerl-alhek. Akngey-arrpantey-rnem, akely-rnem. 20 Jacob Laban ikwerety anyelk-antey alpek. 21 Jacob ra Lher Euphrates artarnpenhek, apwert-angketyarr-warl, apmer itnan Gilead, ampwal ingkerrenh-akert.

22 Arlta irrpety-penh, Laban ra Jacob ikwer ywarek. Ingwerentyel Laban renh ilek. 23 Laban-el Jacob renh alwernek, artwa ikwerenh-rnem-akertel, arlta 7-el, apmer Gilead-ek-atwety. 24 Ingwel Laban-el altyerr arek, INGKARTelarl renh ilek, “Alhewer angkey-angenh-antey Jacob ikwer.”

25 Jacob-el kalikw-rnem artek, apmer Gilead ikwerel, apwert-angketyarrel. Laban-el-rnem apmer arrernek, apmer Gilead-itwel arrpemarl, apwert ingwer-ampenyekarl. 26 Laban Jacob ikwer-warl alhek. Rap renh ilek, “Ntwa ayenh irrtywerremel ilerlelpek anterrey-alhemel, ampa atyenh atherr-akert. Artwa ingwer-rnem irrtyert-awarrarl aneyel-apenyarl ngan! 27 Nga irrtyertelarl anterrek, atyeng ilerlelpey-angenh. Atha ngenh inkwerelhemel menty intwaremer, nga atyeng ilelhentyan. 28 Atha artartey atyenh-rnem arrwantyey-angenh-antey, ntwa anterrelhilek. Arraty-angkwarr-wenyarl alakenhan. 29 Atharl ngenh atwetyek-anek. Akngey ngkwenh-kenh INGKARTel ayenh artwerilek, ngkweng apmwangkwarr angkey-angenh, ayenh arternpiletyek. 30 Kel, atha ngenh iterl-arekarl, ngarl alpetyek alharntek akngey ngkwenh-kenh apmer-warl. Ntwa ingkart-arrpantey akely-rnem anyelkel inerlelpek.”

31 Jacob-el Laban renh ilek, “Ayeng ngkwengety anyelkel alpek aterel, ntwa alerengkw ngkwenh-atherr anterrkwekerr. 32 Anyentel apek ingkart-arrpantey renh anyelkel inenty, ntwa renh ipmek atwetyek. Ngkwenh-rneman akalty arrpemarl anetyek, ntwarl renh atwemek. Arnkwa ingwer-rnemarl aynteyel, ntwa kel akngeynetyekan. Jacob apal angkek, iterl-areyang Rachel renh rarl ingkart-arrpantey anyelkel inerl-alhek.”

33 Laban ra kalikw arrpanenh-warl aylpek, ingkart-arrpantey-rnem aretyek, kalikw renh-rnem arrangkw ywarek, Jacob-kenh, Leah-kenh, arelh warrkenh-atherr-kenh. Rachel-kenh kalikw-warl-anem aylpek. 34 Rachel-el arlengkewek kamwerl saddle-warl, kweneng-apert, Rachel ranem irrwerleng anenh kamwerl saddle ikwerel. Laban nthwek ipantey.

35 Rachel-el Laban renh ilek, “Akngey, atyeng nga ahelirrey-angenh, ayeng intem nhel anayntem. Akapwert ayeng arntety, ayeng nthakenh akemirrey-angenh.” Alakenh-anyem ingkart-arrpantey ikwer-rnem Laban ra ywarek.

36 Jacob ra ahelarl irrekel, Laban renh iltek, “Ilekekarl ntwa ayenhan itwengetilek, atha ampwal-rnem irrtyert-inenty-arrpantey? Atha anyelkel ingkart-arrpantey renh-rnem akngey-alpenty-arrpanteyan. Ayeng arlarl, atha renh-rnem akngey-alpeyangarl. Ilek ntwa ayenharl alwerneyel? 37 Ntwa apek arek, atharl ampwal-rnem anyelkel akngey-alpek? Ntwarl renh arey-alhenty, ntwap renh arrerna akethek, akngerrel aretyek. Anwantherr ikwer angkerretyek, arratyilemel.

38 Iterl-aray, ayengarl ngkweng warrkirrek aherrety 20-ek-atwety. Yep-yep akwerrk-rnem arek ilwey-angenharl mwerr. Ingkerrenh mwerr itethewek. Yep-yep irrwey atha anyelkel ngkwenh iney-angenh, inemel atwey-angenh. 39 Arengk artnwerel yep-yep ngkwenh rlterrp-rlterremel tnhwek, atha yep-yep atyenh impen-anem angkep arrerneynem. 40 Itwernek rwenp inngarl, ingwel ayenh irrentelarl atwek ankwayntey-angenh ilek. Aherrety 20-ek-atwety ayeng iylpareth ngkweng warrkirrenh, aylpenyirrey-angenh. 41 Ayeng ngkweng warrkirrenh aherrety 14-ek-atwety, alerengkw ngkwenh-atherr atha payemelemel. Aherrety 6-ek-atwety ayeng ngkweng warrkirrenh, atnwenth-rnem ingkerrenh payemelemel, ntwa ayenh anthetyek. Ntwa ayenh man mwerr payemeley-angenh, ntwa ayenh man akelyarl anthenh. Akngeyel-anem ayenh arntarnt-arenh, Akngey renharl arrengey atyenh Abraham-el apentek, akngey atyenh Isaac-el apentek. Arrengey atyenh-kenh Akngey Abraham-kenh, akngey atyenh-kenh Isaac-kenh Akngey ra ayenh arntarnt-arenh. 42 Ntwa ayenh thwenem apmer ngkwenh-they, ayeng arrangkw alpetyek, Akngeyel ayenh arntarnt-arem ilenh-angkwarran, ntwa ayenh arrangkw thwenek. Akngeyel ayenh arek, ra atyeng amperrngirrek, ayengarl ngkweng mwerr-angkwarr warrkirrek. Ingwel, Akngeyel angka awerr ngenh anthek.”

43 Laban-el Jacob renh ilek, “Alerey atyenh-atherr ntwa atnyeneyel, artartey-rnem-then. Atnwenth atyenh-rnem ntwa atnyeneyel. Ampwal atyenh-rnem-then ingkerrenh ntwa atnyeneyel, atharl ngenh anthek. Alerey atyenh-atherr-then artartey-rnem-then nthakenh atha ngkwengety anterrkwey-angenh. 44 Aylanth angkerretyek, mwerrant-atherr aylanth anetyek. Apwert ilperr-ilperr-rnem aylanth arrernetyek, ingkerrenhel aylenhanth iterl-aretyek, aylanth mwerrant-atherr anetyek.”

45 Jacob-el apwert ilkwa rnkernek. 46 Jacob-el ikwerenh-rnem ilek, “Apwert ingwer-anemarl mpwer rnkerney. Apwert ingwer-rnem-anemarl akarriley.” Apwert ilperr-ilperrel ampernemel ratherr amern arlkwek. ...

55 Ingwepenh, Laban-el artarteyikw-rnem arrwantyek, kwey ikwerenh-atherr-then. Alpek-anem ra apmer-warl.