1 Ingwer-inger Jesus ra Jerusalem-warl alhek, amern tyenkerr arlkwetyek Jew-rnem-kenh-angkwarr. 2 Jerusalem-itwek keyt itnan Yep-yep-kenh rtnenh, kwaty ilpay pwerlpirrey-angker rtnenh, itnan Bethzatha. Kwaty-they arrer, lywenty 5-pel artelhenh-arrangarr.

3 Akngerr lywenty ikwer-rnem-itwek anew-anenh, aparrng-rnem-then, lerrp-rnem-then, arntety ingwer-rnem-then.

5 Artwa ingweran, arntety anenh aherrety 38-ek-atwety. 6 Jesus-el arntety renh arek. Angka ra awek, rarl arleng-alenty lerrp anenh. Jesus-el renh ayernek, “Nga mwerrirretyek ilkelheyel apek?”

7 Artwa arntety ra tyernek, “Ingwerentyel ayenh kwaty-warl pwerlpewey-angenh. Ayeng kwaty ikwer-warl pwerlpirretyek-anek, ingwerenty-tangkwel arrwekel-antey kwaty ikwer-warl pwerlpirrek, atyengety arrngelemel.” 8 Jesus angkek ikwer-warl, “Akwenta! Panty inerl-alha apmer-warl alpemel-anem.” 9-10 Jesus ra angkek-angkwarr-antey, artwa ra mwerrirrenhey-alpek anamerl-antey, panty inerl-alhemel. Alpekant-anem apmer-warl. Arlta Saturday-el-antey Jesus-el artwa mwerrilek, arlta anyent impen ikwerel. Jew-rnem-kenh atyetyart-rnem rernemarl arek-penh, rernem artwa ikwer-warl alhek. Rernem artwa renh ilek, “Arlta lyertan Saturday-el impenarl! Angka anwekantherrenh aynteyel, nthakenh ntwa panty ngkwenh akngeyney-angenh arlta anyent impenel.”

11 Artwa arntety-penh angkek ikwer-rnem, “Artwa rey-antey ayenh mwerrilek, ra ayenh thwenek apmer-warl alpetyek, ‘Panty ngkwenh inerl-alhemel kel alpa apmer-warl wenh.’ ”

12 Rernem renh ayernek, “Artwa angwenhel ngenh ilekan, ‘Panty ngkwenh inerl-alhetyek, alpemel?’ ”

13 Jesus ra alpek-anem, artwa renh mwerrilek-penh ra ywerrenhek-anem artwa akngerr-ampeny-warl. Artwa ra iterl-arey-angenh Jesus renh, rarl renh mwerrilek, artwa akngerrarl rtnenherrenh-kety. Ra ilelhey-angenh ikwer-rnem.

14 Ikwer-penhan Jesus-el artwa renh arey-alhek tyaty ilkwitwek anerl-anenty. Ra angkek ikwer-warl, “Aley-anem nga mwerr. Apmwangkwarr alhey-angenh anaynta, arntety ilkwa arrpemarl irrekerr nga.” Kel artwa Jesus renh alhengk-arek-anem. 15 Artwa ra Jew-rnem-kenh artwamp-rnem iley-alpek, “Artwa ra ayenh mwerrilek, itnan ikwerenh Jesus.” 16 Arlta ltyerrey-angker impen ikwerel, Jesus-elarl renh mwerrilek, ingwer-rnem ikwer tyel-angkerrenh, renh ipmek atwetyek, “Angka anwekantherrenh-angkwarr apmwelhilek wenh!”

17 Jesus ra angkek ikwer-rnem, “Akngey atyenh warrkirreyel-apeny, ayengan aleth warrkirreyenh arrpemarl, nthakenh ipmelhey-angenh.” 18 Rernem artewentyel innga ikwer ahelirrek-anem, rarl arlta ltyerrey-angker impen-angkwarr warrkirrenh, rernem artewentyel innga ahelirrek, rarl Ingkart Akngey akem, “Anyent-antey wenh.”

19 Jesus angkek Jew-rnem-kenh atyetyart-rnem-warl, “Atha arrenhantherr arraty innga ileyel. Ayengan Akngey-kenh alerikwan. Nthakenh atha ilek-ilek mpwarey-angenh amentel. Ayengan ikwer-angkwarrant warrkirreyel, rarl warrkirreyel-apeny. Atha Akngey arem, ayeng irrkaty-angkwarr arrpemarl warrkirrem, rarl warrkirreyel-apeny. 20 Akngey atyeng ilkelheyel. Ayengan alerikw ikwerenh, ra atyeng lwewarrernem warrk ikwerenh. Ingwer-inger ra atyeng ilek-ilek mwerr-angker ilkwarl lwewarrerneyenh. Arrantherr ayenh aremel, arrantherr apateyenh. 21 Akngey ipmepenh itethiley-angker. Irrkaty-angkwarr arrpemarl, ingwer-rnem iteth anem atyeng-angkwarran Alerikw-angkwarr. Ingwer-rnem arwa alhewer atha renh-rnem itethilem, ayengarl arlkwenteyel-angkwarr-antey. 22 Akngeyel nthakenh ingwer-rnem ayerney-angenh, apmwangkwarrek apek mwerr-angkwarrek apek. Ra ayenh arrernek, arlta ingkernel atha ingwer-rnem ayernetyek, apmwangkwarr anentyek, mwerr-angkwarr anentyek. 23 Alakenh-they ingkerrenhel ayenh tnakeyenh, irrkaty-angkwarr Akngey rernem tnakeyel-apeny arrpemarl. Akngeyel ayenh ahern nhenh-warl thwenek. Ingwerenty atyeng irrpelthirrenty, ra Akngeyek irrpelthirrem arrpemarl.”

24 Jesus ikwer-rnem-warl angkek, “Atha arrenhantherr arraty innga ileyel. Akngey rarl ayenh thwenek ahern nhenh-warl. Ingwerentyel angka atyenh awemel, ayenh arraty tnaketyek, rap iteth intem aneman. Akngeyel renh tyatyemiley-angenh, nthakenh irrwarey-angenh. 25 Atha arrenhantherr arraty ileyel. Ingwer-rnem kel innga awelhetyek-anem, atha renh-rnem ileyel-angkwarr, ayengan Akngey-kenh alerikw inngarl. Ingwerenty atyeng awelhenty, ra intem-antey iteth aneman atyeng-angkwarr. 26 Akngeyan ingkerrenh itethiley-angker. Ra ayenh arrernek alerikw ikwerenh, atha ingwer-rnem itethiletyek arrpemarl. 27 Alakenh-anyem ra Artwa Impen ikwerenh ayenh atyetyart arrernek, atha atyenh-rnem akngaketyek, apmwernem-they. 28 Ayenharl awek-penh, arrantherr iterrey-angenh anenherr-arey, atharl arrenhantherr ilem. Ingwer-inger arrewaly-rnemel ayenh aweyenh, ayeng yangkelheyenh ikwer-rnem. 29 Ingkerrenh arrewaly-penh itethirrenhey-alpeyenh. Ingwer-rneman arraty-angkwarr anenh-rnem rernem iteth intem-antey aneyenh. Ingwer-rneman apmwangkwarr anenh-rnem, atha renh-rnem akngakeyenh. Ikwer-penh atha renh-rnem irrenteyenh-anem intem-antey.”

30 Jesus Jew-rnem-kenh atyetyart-rnem-warl angkek, “Akngeyel ayenh thwenek nhenh-warl. Ayeng nthakenh ament warrkirrey-angenh arrangkw. Ayeng ikwer awelhem, arraty-angkwarr. Atha ingkerrenh arraty-angkwarr tyatemiletyek, angka ikwerenh-angkwarrant, atha amentel tyatyemiley-angenh.”

31 “Alakenh-anyem ayeng angka atyeng-penh ament ilelhey-angenh. Anyentelant angka ilem, arrantherr ikwer awelhey-angenh. Moses-kenh-angkwarr alakenh aynteyel ament-kenh arrangkwarl. 32 Irrwerl-arenyel angka atyenh arraty ileyel arrpemarl, angka arraty innga, irrkaty rey-antey. 33 Arrantherr angkakert-rnem thwenek John Baptise-emeley-angker ikwer-warl, ayenh rernem iterl-aretyek. John-el ilek angka arraty innga, ayeng irrwerl-areny inngarl. 34 Alakenh arrantherr angka John-kenh iterl-aretyek arrantherr ayenh tnaketyek, Akngeyelarl arrenhantherr itethiletyek. John ra ahern-areny arwarl. Angka atyenh ament arrpemarl, irrwerl-areny-kenh.

35 John-el-tangkwel angka Ingkart-kenh ilerl-apenh, iwerr arraty-angkwarr apenterl-ayntetyek, lyenenty-akertel iwerr arraty apentem-apeny. Arrantherr ikwer alyep arwa awelhenh.

36 John-el arrekantherr arraty innga ilenh angka atyenh. Ayeng warrkirreyel Akngey-kenh rlterrk-akert. Arrantherr ayenh areyenh, arrantherrap Akngey renh iterl-areyenh, rarl ayenh thwenek ahern nhenh-warl. 37 Akngeyel arrekantherr ilek arrpemarl angka atyenh, angka arraty innga. Arrantherr Akngey renh awey-angenh, arrantherr renh anngetherr arey-angenh. 38 Arrantherr ayenh tnakey-angenharl, rarl ayenh thwenek ahern nhenh-warl. Arrantherr angka ikwerenh-angkwarr apentey-angenh arrangkw. 39 Arrantherr angka reytemilek Akngey-kenh pipel aynteyel, arrantherr Akngey-itwel iteth intem-antey anetyek. Angka atyenh anyent ra Akngey-kenh pipel aynteyel. 40 Ilekek arrantherr atyeng-angkwarr apentetyek ilkelhey-angenharl? Arrantherr atyeng-angkwarr apententy, arrantherr iteth intem anetyek.”

41 Jesus angkek arrpemarl, Jew-rnem-kenh atyetyart-rnemek, “Atha nthakenh ahern-areny-rnem akarriley-angenh, rernem ayenh tnaketyek arrangkw. 42 Atha arrenhantherr iterl-areyel, arrantherr Akngeyek ilkelhey-angenh. 43 Akngey atyenhel ayenh thwenek rlterrk ikwerenh-akert ahern nhenh-warl. Arrantherr ayenh tnakey-angenh, atyeng irrpeltherremel. Ingwerenty amenterrp apey-alhenty, Akngey-kenh rlterrk-wenyel, arrantherr ikwer inkwerelhem kanper-antey. 44 Arrantherr inkwerelherreyelant tnakerreyelant. Arrantherr Ingkartek inkwerelhey-angenharl tnakey-angenh-then. Arrantherr ilkelhey-angenh, ra arrenhantherr mwerr antwetyek. 45-47 Atha arrenhantherr nthakenh ayntarrp-iley-angenh Akngey-kenh-angkwarr. Moses-kenh-angkwarr arrantherr apmwangkwarr apenteyel, angka arrwekeleny-angkwarrant. Moses ran awank-akerr atyeng-penh pip-warl ingkwernek. Arrantherr angka arrwekel-antey inkwerelhemel awek-penh, arrantherr atyeng inkwerelhey-areny tnakemel. Arrantherr apmwangkwarr apenteyel, arrwekel Moses-el angka ingkwernek, arrantherr irrpeltherremel awelhey-angenharl. Nthakenh-anem arrantherr angka nhenhek awelheman, atharl ileyelek?”