1 Artwernem apwert kapmentew akarreley-angker-rnem angka Moses-wenh apentey-angenh-rnem-then rernem akarrerrew, Jesus-ew awelh-aynteyew. 2 Artwa Pharisee-rnem artwa angka Moses-wenhew akalty-anthey-angker-rnem-then rernem tyel-angkenh Jesus-ew alakenh, “Artwa nhenhan apmwarl! Inkwerelhemel artwa apmwernem-itwew anerl-apeyel, amern-then arlkwerl-apeyel!”

3 Jesus-el awew, rernemarl angkerrenh, rap angkanem ilenh. 4 “Artwa yep-yepew-artey anyent anenh, yep-yep-rnem 100 rarl atnyenenh. Yep-yep anyent ament alhew, rap aperrerterrew-anem. Artwa yep-yepew-arteyel 99 ingwer-rnem iwerl-alhew, atherrk arlkwaynteyew. Rap alhew, yep-yep anyent ikwer nthweyew. Rap nthwenh nthwenh arey-alheyew-atety. 5 Renharl arey-alhewel rap artewentyel inkwerelhewan, nthek-warl tywenerl-alhemel akngey-alpew-anem apmer-warl. 6 Rarl apmer-warl aremerrey-alpew, rap arlkey-alpew ikwer apelty-rnemew, ‘Apetyenh-arey arrantherr! Anantherr ingkerrenh inkwerelheyew. Yep-yep nhanyem atha inerl-alpew aperrertarl irrew-penh!’ 7 Ingwerenty Akngey iterl-arey-angenh ra nyerrerremel ikwer-warl angkeperrenty, irrwerlel aneyel-rnem inkwerelhem, yep-yepew-artey inkwerelhew-apeny yep-yep ikwerenhew. Ingwer-rneman kel-anteyarl arraty ikwer aneyel.”

8 Jesus-el angka ingwer-anem ilenh. “Arelh anyent anenh ngkwelty-rnem 10-akert. Ngkwelty-rnem gold-penh, nthakenh anthey-angenh, nthakenh iwey-angenh, arrangkw. Rerneman impenarl ikwerenh, ra atnyenenh mwanty-antey. Ngkwelty anyentan aytnew, ywerrew-anem. Arelhel lyenenty-anem arrtyew, warl ikwerenh irrarlkemel arternp. Rap nthwenh nthwenh arey-alheyew-atety. 9 Renharl arey-alhewel rap artewentyel inkwerelhewan. Rap ikwer apelty-rnemew arlkew, ‘Apetyenh-arey arrantherr! Anantherr ingkerrenh inkwerelheyew. Ngkwelty impen nhanyem atha arey-alhew ywerrewarl-penh!’ 10 Ingwerenty Akngey iterl-arey-angenh ra nyerrerremel ikwer-warl angkeperrenty, irrwerlel aneyel-rnem inkwerelhem, arelh inkwerelhew-apeny ngkwelty ikwerenhew.”

11 Jesus-el angka ingwer-anem ilenh. “Artwamp anyent alerikw atherr-akert. 12 Akelyelan aynikw ayernew, ‘Akngeyay! Ingwer-ingweran ntwa akalkelhelem ampwal-rnem apwert-rnem-then aylernew, anewantherrenh-angkwarr. Rlengk-antey aylernew ntwa alakenh-anyem akalkelem!’ Artwampel rap akalkelhelew-anem alerikwew-atherr.

13 Ikwer-penh ingwer-ingwer alerikw akelyel akarrelew ilek-ilek apwert-rnem-then. Rap apmer ikwerenh iwerlelpew, apmer ingwer-warl-anem alpew arleng intem. Apmer ikwer-itwew ra arrkentel-arlengant anenh, apwert-akerr arimpemel apmwel-ayeth. 14 Apwertan ikwerenh ingkerr ywerrew. Apatemel-anem ra aneyelpew.

Apmer ikwer-itwew kwaty rntwey-angenh, arrangkw. Aynterrk ayntenh, amern-weny-then ayntenh. Akngerran angayakw anenh. Artwa akely ran angayakw arrpemarl anenh. Ywarn ra iterrenh, amern ineyew arlkweyewan. 15 Rap artwa ilkwa apmer ikwer-areny warrkew-anem ayernew. Artwa ilkwel renh thwenew, pikepik ikwerenh-rnem arntarnt-araynteyew. Rap pikepik-rnem wantenh. 16 Angwenhel renh amern anthey-angenh, arrangkw. Rap angayakw-antey anenh, amern apmwa pikepik-rnem-wenh angwarenh.

17 Ran iterrenh, ‘Ayengan angayakw-anem inngey, ayengarl apmwelhelew. Artwa warrkenh akngey atyenh-wenh-rnem rernemap amern akngerr arlkwem atnertengerreyew-atety. Ayenganap angayakwarl ilweyel! 18 Atha apmer nhenh iwerlelpemer, akngey atyenh-wenh apmer-warl alpemel. Ayengap ikwer angkey-alpemer, “Akngeyay, ayeng-antey apmwelhelew ngkweng. Iylpelant atha ngenh awenh, Akngey irrwerl-areny-then. 19 Ayenh alerey antwey-angenh. Ayengan nyerrerreyel. Warrkenh-anem ayenh arrerna ngkweng.” Alakenh-anyem ayeng akngey atyenh-warl angkeyew.’ Rap akwenterl-alhew, anperl-alhew-anem aynikw-wenh apmer-warl-anem.

20 Rap arrer-anem alpenh aynikw-wenh apmer-warl. Artwampan intemey arntarnt-arelhenh ikwer, rap renh arnarew-anem arleng-itwew. Rap alerikw ikwerenhew amperrngerrew. Ra anterrew, atnyenew-anem arrwantyemel.

21 Alerikw ikwerenh angkew, ‘Akngeyay, ayeng-antey apmwelhelew ngkweng. Iylpelant atha ngenh awenh, Akngey irrwerl-areny-then. Ayenh alerey antwey-angenh.’

22 Aynelikwanap renh akeleytelew, arlkemel artwa warrkenh ikwerenh-rnemew, ‘Apetyenh-arey arrantherr! Anamerl alhenh-arey, arnkwa mwerr ineyew, alerey atyenh aylpeyew! Iltyew-arelh-then pwet atherr-then ikwer akngetyey, ra aylpeyew! 23 Aker kapey-kapey anterant ikwer atwey, anantherr amperneyew! Rlengk anantherr kwenty arlkwem! 24 Ayengan iterrenh ilwentyew-athen ikwer. Ran iteth-antey! Ayeng iterrenh, ra aperrerterrenty-arrpantey, raw mwerr aney-alpew!’ Kel warrkenh-rnemel aker kapey-kapey atwew, rernemap anamerl-antey ampernew. Akngerran akarrerrew, inkwerelhemel arlkwew-arlkweyew.

25 Artwamp-wenh alerikw alkenhan warrkerrenh apal-antey katen-itwew. Warrk-penh ra apey-alpew apmer-warl-anem. Ra arrer-anem apmer-warl alpenh, rap aweynenh, akngerrarl inkwerelhemel aylelherrenh. Rap akngerr-anem arew, rntwenharl warl kwenel. 26 Rap itep-anem iltyerrew warrkenh anyentew, ‘Ilekay? Nthakenh irreyelay?’ 27 Warrkenhel tyernew, ‘Ayteyengkw ngkwenh apey-alpew. Aynengkw ngkwenh inkwerelhew innga, rarl mwerr-antey apey-alpew. Ra ilanthew, aker kapey-kapey anterant ikwer atweyew, anantherr inkwerelhemel arlkweyew ingkerrel.’

28 Alerikw alkenhanap ahelerrew, rarl awewel. Ran warl kwen aylpey-angenh, arrangkw. Ra akethel-antey ahelerremel rtnenh. Aynikw ikwerenh tyerrelhew warl kwen-they, rap ikwer angkew arternp-antey. ‘Ilek-wetyarl ntwa arleng-they-antey arey-alpew? Apetyaw, arlkweyew anewantherr-itwew.’ 29 Alerikw alkenhan ikwerenh ahelerrenh-antey. ‘Arrangkw wenh! Arleng-alenty ayeng ngkweng warrkerrenh, iylpareth-then awelhenh ngkweng. Ntwanap atyeng aker kapey-kapey anthey-angenharl, atyenh-rnem-akertel atha arlkweyewan! Nanikwet akely apek atyeng anthey-angenh, arrangkw! 30 Alerengkw akely-alew ngkwenh? Ra apwertarl ngkwenh akngew, rap arimpew arelh apmwernem-akertel, iltyant-anem apmer-warlan apey-alpew! Ntwan iltey-angenh, arrangkw! Ntwan ilanthew artwa warrkenh-rnem, aker kapey-kapey anterant atweyew, inkwerelhemel arlkweyew akngerrel!’

31 Aynikwan alerikw alkenhew angkew, ‘Alereyay, awelha atyeng. Aylakan itengant-atherr anenharl. Ilek-ilek ingkerr aylewakenhan. 32 Mwerrarl alakenh-anyeman, ingkerrelarl inkwerelhemel arlkweman, ayteyengkw ngkwenharl aney-alpew. Ayengan iterrenh ilwentyew-athen ikwer. Ran iteth-antey aney-alpew. Ayengan iterrenh, ra aperrerterrenty-arrpantey, raw mwerr-antey aney-alpew!’ ”