7
Rernem akngerr Akngey-wenh-rnem-warl rlwangkwarr ingkwerneyel, 144,000
1 Ikwer-penhan atha arew antyerl-rnem 4 altyerr-itwel, rernemap rtnenherrenh ahern nhenh-itwew. Ingweran rtnenh akngerrakw, ingweran altwerlarl, ingweran ayerrerarl, ingweran antekerrarl. Rernemap arrngert rtnenh awer-wety, awer pwewerr ahern-warl, kwaty alay-warl-then arwerl-rnem-warl-then. 2 Akngeyan angkew, “Awelhenh-arey! Atha arrenhingkerrenh ileyel, alheyew ahern-then kwaty-then apmweleyew.” Antyerl ingwer-anem tyerrelhey-alhew akngerrakw-they, rap rwalep antwerrkenh. Rwalep ra Akngey iteth-wenharl. Antyerlan arlkew-anem antyerl 4 ingwer weth-rnemew, 3 “Alerl-tangkwel arringkerr mpwelhenh-arey! Rlwetangkwel aningkerr warrkenh Akngey-wenh-rnem-warl ingkwerney. Ikwer-penhant arringkerr apmwelem ahern-then kwaty alay-then arwerl-rnem-thenan.” 4 Ingwerentyel atyeng ilew, renh-rnem-warlarl ingkwerneyenh akngerr inngey, 144,000. Rernemanap artwamp Israel-wenh alerikw-rnem 12-penh, awank-akerrarl anenh.
5 Judah-wenh-rneman 12,000 anenh, renh-rnem-warlarl ingkwernew rlwangkwarr,
Reuben-wenh-rneman 12,000 anenh,
Gad-wenh-rneman 12,000 anenh,
6 Asher-wenh-rneman 12,000 anenh,
Naphtali-wenh-rneman 12,000 anenh,
Manasseh-wenh-rneman 12,000 anenh,
7 Simeon-wenh-rneman 12,000 anenh,
Levi-wenh-rneman 12,000 anenh,
Issachar-wenh-rneman 12,000 anenh,
8 Zebulun-wenh-rneman 12,000 anenh,
Joseph-wenh-rneman 12,000 anenh,
Benjamin-wenh-rneman 12,000 anenh.
Ya, renh-rnem-warl ingkerrenh alakenh ingkwerneyenh.
Akngerr apmer arrpanenh-areny
9 Ikwer-penhan athap arew, akngerr rtnenherrerl-alhenty. Akngerr innga. Nthekwern count-emeley-angenh, arrangkw. Apmer arrpanenh-areny; angka ingwerek-ingwer, irrpwerl-then arlter-then arrkay-then. Rernemap rtnenherrenh arrwekel-ampeny chair ilkwa atyetyart-wenh-itwew, arrwekel-ampeny chair yep-yep akely-itwew-then. Rernem arnkwa arlter-akert, waly-rnem antwerrkemel. 10 Rernemap aylelherrenh artewentyel alakenh-anyem:
“Akngeyay! Ngant anyent aneyel chair ilkwa atyetyart-wenh-itwewan!
Ntwethenant yep-yep akelyel-thenant mpwelak anenhantherrenh itethelem ipmewetyan!”
11 Ampwa alkenh 24 weth-rnem-then atnwenth iteth 4 weth-rnem rernem rtnenherrenh chair arrerenty. Antyerl ingkerrenhan rtnenherrenh ikwer-itwew arrpemarl, ampwernem-then atnwenth-rnem-then amperelelhemel. Rernemap kwenerrew-anem chair ilkwa atyetyart-wenh arrwekel-ampenyel, atnertel-ayeth ayntemel, nakemel Akngey alakenh:
12 “Ya, Akngey anewantherrenh mwerr-angker! Ingkerrel anantherr renh nakemer!
Ra ingkerrenh iterl-areyel! Ra arawerrng rlterrk-akert!
Ra ilek-ilek mwerr-angker mpwarew anewantherr ingkerrew!
Ingkerrenhel renh mwerr antwerl-anemer intem-antey aleth! Ya, arraty alakenh-anyem!”
13 Ampwa alkenh anyentel ayenh ayernew, “Arlter-akert yanh-rneman, ntwan apek renh-rnem iterl-areyel? Nthenh-areny-rnem rerneman?”
14 Atha tyernew, “Atha iterl-arey-angenh. Ntwant iterl-areyel.”
Ra angkew, “Ingwer-rnemelan rlterrk mpwarenh ikwer-rnem, atwemel renh-rnem, artewentyel pwarrk anthemel. Alakenhaymarl ayntenh-angkwarr, rerneman Akngey-wety angkeperrey-angenh-antey. Rernem iterl-arenh-antey, yep-yep akely Akngey-wenh katy ilwewarl ikwer-rnem, arrnga thelemel. Rernem apmwangkwarr-tangkwel anenh, rernemap awelhew-anem yep-yep akely ikwer. Arrnga ikwerenhel ra apmwa ingkerrenh irrarlkew ikwer-rnem-wety. Arnkwerneman mwerr-angker arlter-rnem ikwer-rnem-wenh, renh-rnemarl irrarlkew arrnga ikwerenhel. 15 Alakenhaym-wety:
Rernem rtnenherreyel arrwekel-ampeny chair ilkwa Akngey-wenh-itwel,
warrkerremel ikwer arltel-then kwenyel-then tyaty ilkwa ikwerenh-itwew.
Ya, Akngeyan aneyel chair ilkwa ikwer-itwel, arntarnt-aremel ikwerenh-rnem, iwerl-alhey-angenh. 16-17 Akngey-wenh yep-yep akely ra rtneyel chair ilkwa arrerenty.
Artwa yep-yepew-artey-apenyarlap ran.
Ra renh-rnem arntarnt-areyel,
ayteng-akngemel kwaty mwerr-angkerarl anterreyelarl-angketyarr-angkwarr.
Kwaty renharl antywem-penh, itetharlap aleth-antey aneman.
Angayakw irrey-angenh, angkethakw irrey-angenh-anem, arrangkw-anem.
Itwernel ampey-angenh-anem, ampepenyel rwenperrey-angenh.
Akngeyel rantey-anem irrarlkeyenh anngerneman.
Rernem arrangkey-angenhan anaynteyew intem-antey.”