1 Arrantherr Christ Jesus-angkwarr apententy, Akngeyel arrenhantherr atwey-angenh, awerr-wenyarl arrekantherr mpwelheyenh, arlta ingkernel. 2 Arrantherr Jesus renh tnakenty, Itnweng Rlwartel arrenhantherr itethilem apmwekety, arrantherr iteth intem-antey aneyenh, ipma ayntey-angenh. Nthakenh ayntarrp-iley-angenh angka arrwekeleny-angkwarr. 3 Ahern-areny-rnem amentewarl alhenh, arratyirretyek-arrpantey ywarn-antey angka arrwekeleny-angkwarr amentel. Akngeyel Jesus renh thwenek ahern nhenh-warl, ahern-areny anayntetyek, arlka menty anthelhetyek anwekantherr. Ra apmwa antengilek, anwekantherr ingkerrenhek arwerl iylpeyl-atherrel ilwemel. 4 Itnweng Rlwart-akertan rernem arternpirretyek, Akngey-kenh-angkwarr rernem ingkerrenhel arraty apentetyek, ament-warl alhey-angenh.

5 Ingwer-rnem ahern-arenyek iterreyel, ingwer-rneman Itnweng Rlwart-akertan irrwerl-arenyek iterreyel, apenterl-ayntetyek. 6 Anwantherrap ahern-areny-kenh-angkwarr apenterl-anenty, anwantherrap ilwemarl. Itnwengel akwerrng arratyileyel. Anwantherr Itnweng Rlwart-akert anwantherrap iteth aneman, mwerrant-arey anem. 7 Apmwangkwarr apenterl-anenty, anwantherrap Akngey-kety amentirremarl. Rernem Akngey-kenh-angkwarr artewentyel iterrey-angenh. 8 Anwantherr apmwangkwarr apententy, Akngey-angkwarr arraty aney-angenh. Akngey ranap anwekantherr inkwerelhey-angenharl.

9 Ahern-areny-angkwarr ament-warl alhey-angenh. Arrantherr Akngey-kenh Itnweng-akertan mwerr arraty iterretyek. Itnweng Christ aney-angenh, ngap amentewarl iterrerl-anem, apmwangkwarran. Itnweng Christ-kenh-kety amentirreman. 10 Christ-akert nga iteth aneyenh. Akngeyel ngenh inek, arratyilemel, ikwerenh-angkwarr apenterl-ayntetyek. Arlka kel ilweman, itnweng itetharl aneyel, ntwarl Akngey-kenh-angkwarr apenteyelan. 11 Akngeyel Jesus renh itethilek. Akngey-kenh Itnweng ngkweng-itwel aneyel. Ra itnwengel arlka ahern-areny ngenh akemelhileyenh.

12 Atyenh-rnem, apmwangkwarr apentey-angenh, amentewarl alhey-angenh. 13 Ahern-areny-kenh-angkwarrant apenterl-anenty, ngap ilwem intem-anteyarl. Awerr anwantherr anetyek, apmwangkwarr apentey-angenharl. Itnwengel anwenhantherr rlterrkilem, anwantherr iteth anayntetyek. 14 Itnweng Rlwart-akert-rneman alerikw Akngey-kenh-rnem ingkerr. 15 Akngeyel itnweng apmwa arrekantherr-warl thweney-angenh. Itnweng ikwerenhel anwenhantherr ater anthey-angenh. Itnweng Rlwart-akertelant anwantherr irrwerl-areny renh Akngey akem. Arrangkwarl, arrangkwarl. 16 Itnwengel anwenhantherr akalty-anthem, anwantherrarl alerikw Akngey-kenh aneyel.

17-18 Ahern nhel apmwangketyarr aynteyneyel. Ahern nhel anwekantherr rlterrk aynteyel, ingwer-inger anwekantherr mwerr-awaty aynteyenh. Alakenh-anyem anwantherr artewentyel iterl-arayntetyek. Mwerr-angker anwekantherr mpwelheyel, alker-areny-kenh-angkwarran. Ingkerrenhel areyenh Akngey renh, rlterrk ilkwakert. Anwantherr Jesus Christ-itwek aney-alpeyenh, apmer mwerr-angker-itwel intem-antey. 19 Ahern-areny ingkerrenh, Akngeyelarl arrpmernek, rernem mpwelheyel Akngey ikwerenhek-rnem, rernem aremirreyenh ingkerrenhek, ingkerrenhel renh-rnem iterl-areyenh. 20 Aray, ahern-areny-rnem apmwelhilekarl, Akngeyel ahern nhenh apmwilek awank-akerr. Ahern-areny-rnem apatemel mpwelheyel ikwer, ra ahern nhenh mwerrileyneyek angkep arrpemarl. 21 Ahern renh-anem Akngeyel mwerrileyenh, ingkerrenhel aketh-antey aretyek, alerikw ikwerenh-rnem mwerr aneyel-apeny.

22-23 Anwantherr akalty, aley-anyem ingkerrenh ahern-areny apmwakert, ahern-areny arntety irreyel. Anwantherr alerikw ikwerenh-rnem Itnweng ikwerenh-akert, anwantherr aketh-antey renh areyenh, ra anwenhantherr arlka alker-areny-apeny antheyenh. 24 Akngeyel anwenhantherr kel itethilek. Anwantherr anngetherr arey-angenh-penh, anwantherr mpwelheyel alerl-antey. 25 Anwantherr anngel anngetherr arey-angenh, anwantherr arternp ikwer mpwelheyel, ra anwenhantherr mwerriletyek.

26-27 Anwantherr rlterrk-wenyarl, anwantherr apateyel, Akngey renh ayernetyek. Itnwengel anwenhantherr rlterrkileyel. Itnweng ra Akngey-warl angkem. Itnwengel anwekantherr katy ayerneyel arraty-angkwarr. Akngeyel anwenhantherr iterl-areyel, anwantherr iterreyel-angkwarr. Akngeyel anwenhantherr aketh-antey areyel Itnweng-akertan.

28 Akngey ra iwerr mwerr-angker mpwareyel ingkerrenhek, rernemarl renh apenteyelek-rnem. Ra arrernek ikwer-rnem arrwekel. Ingwer-rnemel renh-rnem ilpertiley-angenh. 29 Akngeyel arrwekel-antey rlwanek, alerikw ikwerenh-rnem anetyek, rernem alerikw ikwerenh anyent arrwekeleny-apeny anetyek. 30 Akngeyel ikwer-rnem arrernek arrwekel, renh-rnem rlwatetyek, rernem ikwerenh anayntetyek. Ranem iwerr mpwarek ikwer-rnem, rernem ikwerenh-angkwarr aylpetyek. Ranem renh-rnem arraty innga arek ikwerenh-angkwarr, ranem renh-rnem rlterrkilek.

31 Akngeyel anwenhantherr arntarnt-areyel. Anwantherr kel alakenh ilem. Alakenh-anyem anwantherr iterretyek, Akngey ra anwekantherr-itwel aneyel, ingwerel anwenhantherr ywarn ilpertilem. 32 Akngeyel alerikw ikwerenh ayerrpiley-angenh arrangkw. Ra menty anthek, anwekantherr ilwetyek. Alakenh-anyem Akngeyel anwenhantherr intem-antey arntarnt-areyenh irrpelthel. 33 Akngeyel kel anwenhantherr ayerrpilekarl, ikngwerel anwenhantherr ywarn irrtywerremel ayntarrp-iley-angenh. Akngeyel anwenhantherr arratyant areyel. 34 Alakenh-they ingwerel anwenhantherr ywarn irrtywerremel ayntarrp-iley-angenh, Jesus Christ ra anwekantherr kel ilwekarl. Ra arrewaly ayntenh. Akngeyel renh angkep itethilek. Aley ratherr ilkwant-atherr irrwerl-itwek arrwekel mpwelheyel. Ranem intem-antey Akngey ayerneyel, ra anwenhantherr arntarnt-aretyek.

35 Christ ra anwekantherr inkwerelheyel, ingwerel anwenhantherr nthakenh ikwer-they akngakey-angenh. Rernem anwenhantherr ilpertiletyek arrkernelheyel, anwekantherrety rernem arlkarirreyel apek, arntety anthetyek Akngey-kenh-angkwarr alheyel-kety. Christ-el anwenhantherr intem-antey atnyenem arrpemarl. Rernem anwenhantherr amern-weny ileyel apek, rernem arnkwa anwekantherrenh rakem apek, anwenhantherr ipmek atwem apek, rernem anwenhantherr Christ-they akngakey-angenh arrangkw, ra anwekantherr-itwel intem-antey aneyel. 36 Alakenh Akngey-kenh angka aynteyel: “Ngkweng-angkwarr apenteyel-rnemek ingwer-rnem anwekantherr arrkernelheyel, anwenhantherr ilpertileyek. Rernem anwenhantherr atwetyek arrkernelheyel, artwel yep-yeparl akerek atwek-apeny.” 37 Ingwer-rnem anwekantherr arrkernelheyelarl ra anwenhantherr rlterrkilek, anwantherr ingkerrenh rlterrk anetyek. Christ ra anwekantherr inkwerelheyel. 38-39 Ayeng akalty innga anem, ingwerel anwenhantherr ywarn Akngey-they akngaketyek arrkernelheyel, rarl anwenhantherr inkwerelhemel areyel. Anwantherr iteth aneyel apek, anwantherr arrewaly ayntem apek, Akngeyel anwenhantherr intem-antey areyenh. Angel-rnemel-then, arrenty ingkerrenhel alker irrwerl-areny ingkerrenhel anwenhantherr ywarn Akngey-they akngakeyenh. Rernem irrwerlel aneyel, rernem ahern nhel aneyel apek, rernem anwekantherr lyert irrpelthirreyel apek, rernem anwenhantherr Akngey-they akngakey-angenh. Ingkart anwekantherrenh Jesus Christ ra anwekantherr ilwekarl, Akngey ra anwekantherr ilkelheyel.