AÑ CARTA ÑEÑT̃ HEBREONESHACOP
HEBREOS
1
T̃eʼña Yompor Puechemerpaʼ ña eʼñe yeʼñoranaʼterraya ñeñt̃ atet̃ oteñ Pompor yocop
1 Eʼñe ahuat̃ot̃eñ Yomporñapaʼ c̈hocma eñoranaʼtyesaneʼt̃ ñeñt̃ pueyochreshaʼ peʼt̃ ñeñt̃chaʼ aʼm̃taʼyesayeʼt̃ poʼñoñ ñeñt̃ara profetaneshaʼ. Eʼñe paʼnamenot̃ eñotatyesaneteʼt̃. Ñetñapaʼ oʼch eñotatennayet yatañneshañ judioneshaʼ ñeñt̃ atet̃ otenanet Yompor. 2 T̃arraña t̃eʼña yapaʼ eʼñe ña Puechemer oʼ eñoranaʼterrya ñeñt̃ atet̃ eñoreññaña Yompor yocop. Ñehua, ñeñt̃paʼ ñeñt̃ara Puechemer ñeñt̃ Jesucristotets ñeñt̃ neʼt̃ Pompor ahuat̃ot̃eñ, ñach oʼpatenaya allohuen ñeñt̃ ora allpon eñall, t̃arroʼmar ña yec̈hcatapreteʼ ahuat̃ Pompor añ patser ñam̃a allohuen ñeñt̃ esocmañen paʼnamen eñalletyestsa. 3 Ñeñt̃ara Cristo att̃o atarr cohuentena ña paʼtsnomueñot̃, ñeñt̃paʼ Pomporña orrtaten poʼpartsoña. Ñeñt̃ atet̃ cohuen orrtatyen ñapaʼ, Pomporpaʼc̈hoʼña eʼñe parro att̃ecmuet. Ñapaʼ eʼñe poʼñoñot̃a orrtatuan ora esocmañen ñeñt̃ allpon paʼnamen eñall t̃arroʼmar ña poʼñoñpaʼ atarr huomenc. Ñeñt̃ara ñeñt̃ rromats att̃och eʼñe eʼsham̃pesuerrey yoʼchñar. Allempoña oʼ orrtatuan att̃o eʼsham̃perrey yoʼchñar allempoñapaʼ oʼ alla anorruerr Pompor Parets poʼcohuenrot̃ allña atarr partsotapretuerrana Pompor poʼconaño eʼñe all pueʼntaño.
Ñeñt̃ Yompor Puechemerpaʼ ña metanaʼtueneʼ allohuen mellañot̃eñnaneshaʼ att̃o atarr sherben ña
4 Ñeñt̃oʼmarña t̃eʼña ñapaʼ atarr am̃chaʼtaret̃tena, ello metanaʼtuenan allohuen mellañot̃eñnaneshaʼ, t̃arroʼmar ñapaʼ ñeñt̃ otenet ñapaʼ eʼñe Parets Puechemer. Ñeñt̃ña mellañot̃eñnaneshaʼ ñetpaʼ ama att̃eyeʼ otaret̃teneto. 5 Ñam̃a yeñoteñ ñapaʼ ña eʼñe metanaʼtuenahuet t̃arroʼmar mellañot̃eñnaneshaʼ amaʼt puesheñarrot̃etapaʼ ama otaneto ñeñt̃ atet̃ otan Puechemer, ñeñt̃paʼ atet̃ ot Puechemerecop:
P̃apaʼ p̃a ñeñt̃ep̃ eʼñe Nechemerep̃, t̃eʼñapaʼ oʼch eʼñe neñotach acheñeneshaʼ poʼñoc̈h p̃apaʼ eʼñe Nechemer nepenep̃.
Poʼpocheñoñapaʼ atet̃ oterrerr Puechemerecop:
Napaʼ na ñeñt̃en Pomporen, ñapaʼ no Nechemer.
6 Poʼpocheñoña allempo c̈hapatan Puechemer poʼmot̃er ñeñt̃ atarr nanac sherbets añe patsro atet̃ eñora ñocop, ñeñt̃paʼ atet̃ ot:
T̃eʼpaʼ concorpanaʼteñepaʼch allohuen nem̃llañot̃eñnaneshar.
7 Poʼm̃llañot̃eñnaneshar ñetpaʼ añecpa anaret̃tenet ñetchaʼ sherbenet Yompor. Ñeñt̃oʼmarña atet̃ eñorena ñocpuet:
Ñerraʼm erra nemñayenanet eʼñech pomaʼyorñecma erra senet eʼñe atet̃ penet ñerraʼm m̃orr. Atarr cohuen sherbennet atet̃ ñerraʼmrrat̃eʼ tsoʼ ñeñt̃ atarr cohuen huoretyets.
8 T̃arraña Puechemerecoppaʼ ama att̃eyeʼ oteno. Ñocoppaʼ atet̃ eñora:
P̃apaʼ atarr Partsop̃, ñeñt̃ep̃chaʼ c̈hocma am̃chaʼtaret̃tetsa peconaño ñeñt̃ errponañohuen. Ñam̃a ñeñt̃ att̃o p̃aʼm̃chaʼtaret̃tena p̃apaʼ eʼñe pocteʼ es pep̃aʼyenanet.
9 Ñam̃a ñeñt̃ eʼñe pocteʼ nenten napaʼ ñeñt̃ña atarr p̃ocshateneʼ. Ñam̃a ñeñt̃ ama pocteyeʼ nenteno napaʼ, p̃apaʼc̈hoʼña ñeñt̃ atarr petsenaʼten. Ñeñt̃oʼmar napaʼ ñeñt̃en Peyomporer pepenen, ahuoʼt atarr nanac nocshaterrep̃. Att̃o atarr p̃ocshena p̃apaʼ ello pem̃tanaʼtueñ allohuen poʼpotantañ ñeñt̃ nesherb̃aʼyeneʼ ñamet.
10 Yomporpaʼ alla eñorerrerr Puechemerecop, ñeñt̃paʼ atet̃ otererr:
Partseshachaʼ p̃a yec̈hcatueʼ ahuat̃ pats, eʼñe echarr p̃orratue. Enetpaʼc̈hoʼña eʼñe pehuamencot̃ecma peyec̈hcatue.
11 Ñeñt̃ eʼñe peyec̈hcatuapaʼ ñeñt̃paʼ huañerrchaʼ eʼñech chencaʼhuerra esempo, t̃arraña p̃apaʼ ama arromñat̃eshayaype amaʼt eʼñe errponaña. Allohuen ñeñt̃ peyec̈hcatua ñeñt̃paʼ eʼñech mellashaʼtua eʼñech atet̃ pena ñerraʼmrrat̃eʼ shetamuets ñeñt̃ atarr am̃llashaʼtña.
12 Atet̃chaʼ peperr peyec̈hcatar atet̃ ñerraʼmrrat̃eʼ shetamtsosheʼm ñeñt̃ oʼ mellashaʼt. Oʼch aʼmetatseʼchet oʼch huaporeʼchet allempo chorrenet poʼpoñ ñeñt̃ atarr cohuen emarr. T̃arraña p̃apaʼ att̃erap̃ach errponañohuen. Att̃o p̃ocrrena p̃apaʼ amaʼt ahuat̃apaʼ amach ahuañañat̃terro.
13 Poʼpocheño Yomporpaʼ alla oterranerr Puechemer, ñeñt̃paʼ atet̃ och:
T̃eʼpaʼ oʼch alla p̃anorruerr arr necohuenrot̃ allchaʼ pepartsotapretuerrna. Esempohuañenchaʼ allohuen ñeñt̃ peʼmoñeʼteneʼ oʼch eʼñe naʼmchechuerranet att̃ochña pomnaren pep̃ohuerranet.
T̃arraña mellañot̃eñnaneshaʼñapaʼ ama att̃eyeʼ oche ñeñt̃ atet̃ otan Puechemer. (Ñeñt̃oʼmar yeñoteñ Yompor Puechemer ña atarr sherbets, ello metanaʼtuenan allohuen mellañot̃eñnaneshaʼ.) 14 Yeñoteñ allohuen mellañot̃eñnaneshaʼpaʼ añecpa allsensaret̃tenet atet̃ ñerraʼm Yompor Puecamquëñ, ñetchaʼ sherbenet Yompor. Att̃ochña ñetchaʼ yenpuenet allohuen ñeñt̃chaʼ aʼqueshp̃ataret̃terrtsa.