6
1 Wodi Barjobesana waadadhayna “Barjosa sunin imintonam sun shisheebhode” hamayse yeam woda miske. 2 Barjo
“Inin kamon wodanka, yenin giyenam i qansade;
dhaqintan rooroakaar yeam i kelshade”Isi 49:8.
kinin hamenna, marrato! Kambhoono wodano taakine; dhaqintan rooroar kinane.
3 Wonin waadadhayno siyane konin hambhoamadettsi, yer kalaaka hattear eedi haynaar goa maatattone. 4-5 Barjona waadimayna eena wonin dohonna, wodi yer wulka kattsi darshaate yena kamsi wo maatade. Ogonoar gaalebee, oytaydhabee, qaabebee, qandhabee, dhaxibee, goorebekane; pir waadimaka qajintabee, raat kaysabee, daaqibekane. 6 Ta pir gazamakkobee, dhesintabee, darshintabee, eedina payya hayntabee, Manpas Gazanbee, gonin nashimmakkonbee, 7 gonin upsinbee, Barjosa kantanbekane; mizaqimbee warkatambeka Barjona tipa haydhensa banqin anngamon yedintakane. 8 Ta pir gobshibee ooshimbhebena, bagadhabee shawkadhabena wodi ashkimbhaanane. “Eenaam keda dhaddhise” woam hambhenka, wodi gonin eenane; 9 “Dhesadhimina eenane” woam hambhenkaar, wodi dhesadhaanane; “Diyana keda haye” woam hambhenkaar, sadaka woda dee. Woam qandhenkaar diyootone; 10 “Sii eedine” woam hambhenkaar, rooro wul wodi wozadhaynane; “Qambhinane” woam hambhenkaar, thoothin eenaam woda wodinse; “Kesa yer qolehe” woam hambhenkaar, yer wul wosa daane.
11 Yedi Qorontoos eenato, may yena wodi giydine; wosa nashimmakkonam yena wodi dhaydine. 12 Yedi yesa nashimmakkonam wona ye toskade; wodi wosa nashimmakkonam yena toskootone. 13 Isa naana yenin dohondettsi: “Wodi wosa nashimmakkonam may wonin yena dhohondettsi, yediar yesa nashimmakkonam may wona dhehee” hamayse yena ida giye.
Barjodar Woylamin Qajimina Eenabesana Kinka Kalaa Maata Zaskimino
14 Barjodar woylamin qajimina eenabesana kinka kalaa maateebhode. Tipamobee wobamobe hamin kinka kalaa ke maate? Shaakabee thipabe hamin kinka ke dee? 15 Kiristoosbee Seethaanbe*“Seethaan” hambhayno Girik aponka, “Beliar” koda hambhe. hamin kinka ke age? Barjodar woylamin qajeabee qajimaabe hamin kinka kalaa ke maate? 16 Barjosa gazan ooninbee aaninka ashkadhaana barjonabe kinka kenin agayno kesa dohoono hare? Ogonoar Barjo
“Isa dayntanam zarsinsa shaarinte ida haye;
kembesana kinka ida dee;
intaar kesa Barjo ida maate;
kediar isa zarsi keda maate”Lewi 26:12; Yiz 37:27.
hamayse kinin giyondettsi, wodi sadaka dahaa Barjosa gaza oonine. 17 Ogonante Barjo Imbaa yin ki giyade:
“Kesa shaarira utee, edimee;
qaysin yerinam kaameebhode;
intaar yeam tiyayda tiye”Isi 52:11. ki hamade.
18 Pir,
“Wulam Wottsea Barjo ‘Inta yesa Imba ida maate;
yediar naana isa annginabee maanabe yeda maate’Hosev 1:10.
hamayse ki giyade” ko hambhade.