6
Qambhinana Imbhensa Yesusin Dhettsoono
1 ‘‘Barjona waadadhadhen payyan waadimanam ‘Eedi ko iam shede’ hamayse yenin hayoamadettsi mete yesaam gishee. Ogotay ko hamma, cecinte dahaa Imbaa yenteakalanka yenin tiyea baza yesa qolehe. 2 Ogonante ya qambhinana imintonam hanin imenka, maltina eenadettsi maataabhode. Kedi eenin keam shedayse shawkoadettsi hamayse bukin raqinbee goynbedar kenin waadadhenam yisa may keda dhee. Inta yena gon ida giye: Kedi yina yesken bazanam tiydine. 3 Keeda ya qambhinana imintonam hanin imenka, eedinin haapoamadettsi hayayse aachika imaa.* ‘‘Eedinin haapoamadettsi hayayse aachika imaa’’ hamenam gaalin aponka thaapadhonte ‘‘Anta mizaqaaka hanin imenam anta warkataa ki haapabhoode’’ koda hame. 4 Aachinka hanin imenam haapea Hamba hana bazanam kida ime.
Barjoam Miskadhensa Yesusin Dhettsoono
Luq 11:2-4
5 ‘‘Yedi yenin miskenka, maltina eenadettsi maateebhode. Kedi kesa miskenam eedinin haapoadettsi hamayse bukin ranqabee goyna parmanabedar woyayse miskana keda nashe. Inta yena gon ida giye: Kedi yina yesken bazanam tiydine. 6 Ya hanin miskenka, ooninsa gulinte ardayse kerin diithayse haapadhima Hambaam miskaa. Haapadhimonam haapea Hamba hasa bazanam hana kida ime. 7 Yedi yenin miskenka, Barjoam dhesimina eenadettsi sun maasite maasite dhalqeebhode. ‘Wosa upsin wo thoosanna, Barjo woam kida qanse’ hamayse keda bhocche. 8 Yedi kedettsi maateebhode. Ye miskima birayse yeam zasken wulam Imbaa yentea dhesa ki dhese.
9 ‘‘Keeda yedi yin giyayse miskee:
Cecinte dahaa Imbaa wontea,
nammo hasa ko gazisadhe.
10 Bitamono hanno ko nive.
Bhocchino hasa cecinte konin maatendettsi,
peentear yin ko maateka.
11 Kina rooroana wona zasken galan wona imaa.
12 Woam seesaynana wonin garendettsi,
wonnon seesonamaar wona ya garaa.
13 Siyondar arsota taysayno wodar konin nivoamadettsi woam gishaa.
Siyonkalanka† ‘‘Siyonkalanka’’ hamea agaa ‘‘siya eakalanka’’ kanka hamana dandima ko dandime. ‘‘Siya ea’’ haminta ‘‘Seethaan’’ hamintane. woam dhacchaa.
[Bitamonbee, kantanbee, gobshinbe lay hantine; amiin.]
14 Eenna kesa seesonam ye garea hanna, cecinte dahaa Imbaa yentea yenaar yesa seesonam gara ki gare. 15 Eenna kesa seesonam ye garaamma, Imbaa yentea yesa seesonam yena garehe.
Itsima Qoomadhensa Yesusin Dhettsoono
16 ‘‘Itsima yenin qoomenka yedi yinin qoomonam eenna dhoota hayayna maltina eenadettsi wotinam seeseebhode. Kedi een birante itsima qoomayna maatayse sun guuri keda cawle. Inta yena gon ida giye: Kedi yina yesken bazanam tiydine. 17-18 Ya itsima hanin qoomenka, aapin kerin hannon shiidhaa; hasa metenamaar waqatika qadhaa. Ogoam hanin hayoono eedina dayma, haapadhima Hamba bish kinin dhesoadettsine. Haapadhimonam haapea Hamba hasa bazanam hana kida ime.
Peendar Koymo Puccha Zaskiminsa Yesusin Dhettsoono
Luq 12:33-34
19 ‘‘Ulavulobee boyibeyn itsana damen, pir diibiar koyate tiyen peen kodar koymonam yena puccheebhode. 20 Ogona ulavulobee boyinbe itsimon, pir diibiar koyate tiymon cecinte koymonam yena pucchee. 21 Harrna hambhidianna, hannon koymonin dohonte hasa woylammoar ogote koda dee.
Bishinsa Shaakan Goynsa Yesusin Dhettsoono
Luq 11:34-36
22 ‘‘Bishinsa shaakano aapine. Keeda aapino hanno payya ko hanna, hasa bishino wul shaakante koda dee. 23 Aapino hanno hajidi ko hanna, hasa bishino wul thipante koda dee. Ta hakal dohoono shaakano thipidi ko hanna, thipano kattsi gebhi koda thipe!
Dayntanna Gaala Zaskiminsa Yesusin Dhettsoono
Luq 16:13; 12:22-31
24 ‘‘Bit lamaasa demente daana damea eedi hay ki hannaar qolehe. Harrna hambhidianna, kalaam jibbayse lansoam kida nashe; ogotay ko hamma, kalaadar maatayse lansoam kida bage. Ogodettsi Barjobee koymobesa demente daana damattene.
25 ‘‘Ogonante inta yena ida giye: Dayntan yennonna, ‘Haroo itso? Haroo wuco?’ pir bishin yennonna, ‘Haroo qaadho?’ hamayse qaabeebhode. Galara dayntano, apalara bishino sagayu? 26 Cecinka pillayna aptinaam shedee: Kedi bheeta yiithehe; shikaar shikehe; konontear keehe. Ko dahaannaar cecinte dahaa Imbaa yentea keam kida kunse. Ta yedi kedara kattsi sagattenu? 27 Yesa iira qaabayse leven yinnondar rooro kalaa arsea eedi hayne?‡ ‘‘Leven yinnondar rooro kalaa arsea eedi hayne?’’ hamayno Girik aponka kosa buli lamaa daane; lansono bulino yinne: ‘‘Yisa gudumbhakkondar dhundhuma kalaa arsea eedi hayne?’’ hamaynone.
28 ‘‘Pir apalanna harrnee gaale? Ta peendar aamana hamin kenin gebhenam shedee. Kedi waadimaka qajadhehe; puttoar qanehe. 29 Ko dahaannaar yena ida giye: Ena Bitaa Solomoonaar yisa gobshin wulka igina aamanasa kalaadettsi hattear qaadhayse goobadehe. 30 Ta Barjo kina haapadhayse saka nuunte koqadhayna peendar dahaana shundhaam yin gobshayse qattsea ki hanna, ta yedi Barjodar woylamin qajadhen joogaanato, yeam ini hamin ki qattsimine?
31 ‘‘Keeda ‘Wodi haroo itso? Haroo wuco? Yer haroo qaadho?’ hamayse qaabeebhode. 32 Ogo wulam haapota Barjoam dhesimino eeno koda zage. Ogono wul yena konin zaskenam cecinte dahaa Imbaa yentea dhesa ki dhese. 33 Yedi yer wulsa birayse Barjosa bitamonbee kisa tipamonbeam zagee; ogono wul yena imbha ko imbhe. 34 Saka hamon gaalenam sakana garee; ogoam qaabite gaaleebhode. Sedha kalaa gaaleno sedhaa agaana yeeka ko yeeke.
*6:3 ‘‘Eedinin haapoamadettsi hayayse aachika imaa’’ hamenam gaalin aponka thaapadhonte ‘‘Anta mizaqaaka hanin imenam anta warkataa ki haapabhoode’’ koda hame.
†6:13 ‘‘Siyonkalanka’’ hamea agaa ‘‘siya eakalanka’’ kanka hamana dandima ko dandime. ‘‘Siya ea’’ haminta ‘‘Seethaan’’ hamintane.
‡6:27 ‘‘Leven yinnondar rooro kalaa arsea eedi hayne?’’ hamayno Girik aponka kosa buli lamaa daane; lansono bulino yinne: ‘‘Yisa gudumbhakkondar dhundhuma kalaa arsea eedi hayne?’’ hamaynone.