Kaiwo Soi We
Iberani
Kaiwo dedung we Iberani
Kaiwo anatu we inontarai Iberani nini, mano soi nei denatui we Yahudi eweKristeni manea, amani inontarai Kristenio esodai dadira pampang paria wedaya adareti eroaso Kristusi ahang kahai ki. Mano soi kaiwo anatu ninai, yurai we dohong kaiwo wesa pampang we ambori eroasoa fo mutu. Nanai wedaya soi kariri Yesusi Kristusi we I mani deinawi kariri Allai na masi.
Mano soi suratinei medu kariri fi betoru wesa mani: Reantenang mani, kariri Yesusi we I mani Allai ne Kaisung dine—Kaisungno werea na ea kaha. Kaisung nini deinawi ne dohong kariri Dai ne dawiafo na mai, na sawania mutu sodai dadirafo. We Allai ne Kaisung dine tonanafo, Yesusi nini dedai sewa nabio na Kaiwo Arerai Mamo fosa kiai. I kontai dedai sewa wewaifosa tuti Musai mantauni kontai.
Beru mani, Allai deinawiai we Yesusi mani weImami werea na ea kaha dine tuti dedai sewa imamio na Kaiwo Arerai Mamo fosa kiai.
Betoru mani, medurai we na Yesusi, mano eroasoi fosa ekaharai weru sasarifoi, mataifo tuti weru mararehafoi. Na weimami Dedai Mirarebana fo nanai feriri inontaraine tata na tarai. Fariri nani wiro obui na fi nunung we korbani fo tuti fi siaio nari kariri agama Yahudi foi fo kaha. Fi nari tonana fo, manta deinawi kariri fariri taraio obui na Yesusi nani terai, wiro fi siai feai konta kaha.
Na medu deisaha kariri mano eroasoaio ewe-ewonomi na Kaiwo Arerai Mamoa fo nani sa fo, mano soi kaiwo anatu fe nini deyo medurai we mano etato kaiwo anatu nesa we ambori etawa kaha, mae etohong kariri ene eroasoa fo nanaia mutu. Na robong 12 foi, dohong kaiwo wesa we etawansara mutu na dadira rorong esodairai nanai paria werea naya fo, na ewati terai we Yesusi. Deretawansa we etawansa na dadira esodaira fo tuti na inontarai enari kangganisa fo nanai.
Kife ne kaiwo anatu ne na dohong kaiwo aunau fo wesa tuti deretawansa dohonao etaramio fi siai kia enemirorongfo wedaya wiro etaramio Yesusi ahang kaha fe.
Kaiwo anatu ne deto kutua tonina:
1:1-3 Kaiwo reantenang fo mani, kariri Kristusi we I mani, deinawi kariri Allai na mai na ne taraifoi.
1:4–2:18 Kristusi dedai sewa wewaifosa.
3:1–4:13 Kristusi dedai sewa Musai tuti Yosuai.
4:14–7:28 Fi mai tuti dadai sewa Kristusi niari we weimamifo.
8:1–9:28 Fi mai tuti dadai sewa na Kristusi ne Arerafo.
10:1-39 Fi mai tuti dadai sewao na Kristusi wekorbanifo.
11:1–12:29 Kaiwo kariri imamifo we fio todoni kontai ohong kariria fo.
13:1-25 Kaiwo aunau tuti kaiwo kafe.
1
Allai medu na ne Kaisungfoi
1 Na fafongfa, Allai medu bitoya na ne nabifosa we tane werengno Israeli fafong fasa, tuti medu wesa na rang bitoya. 2 Wape rahida wefuiai ninai Allai medu na ne Kaisungfoi we tata. Kaisung nani, Allai mantauni yuaisi weArikangno ambori ne mambiriu we sobu fi kiaio tamang neng fo. Na I kontai, Allai niari nunei tuti rorafaisi sentenang. 3 Kaisung nani ne tarai toyari sambewarai we tawatipa Allai ne sambewarai dadai fo tuti wefiainawiaia kasau kariri Allaio tarai foi, tuti andino derara fi kiai na rorafaisi tuti nunei na ne kaiwo wemambiriu fo ne. Yuairurang tane sasarineia kiai na ne rikafoia mani, minohi na Mananufaisi warang domoya fo, na katai dedai mantaung foi. 4 Dedai sewa wewaifosa kiai, dedai kariri wangno sobua fo, weo wang nanai dadai pari sewa weru wewaifo ene wangfo.
Allai ne Kaisungfoi dedai sewa weru wewaifosa
5 Weo Allai wiro sahu wewaifosa we ne kaisung disa kaha. Wiro medu we manei nasa deyo,
“Wauno nehu Kaisung di Waune!
Rahida bonini iweDai we Wau.”*Masmuri 2:7
Kontai wiro medu kariri wewai manei deyo,
“I ambori sahu Yau we ne Dai,
Tuti isahui we nehu Kaisungfo ne,”*2 Samueli 7:14; 1 Tawarikhi 17:13 kaha.
6 Kontai, rabuang bo kia ne Kaisung mansiari foi to nunei meu ne, medu deyo,
“Wewainesa kiai, todoni kontaio esomi wei.”*Ulangan 32:43
7 Mae kariri wewaifosa mani, medu deyo,
“Allai niari ne wewaifosa ene tarai toyari numandai,
tuti niarisa we ne mangfata ene tarai toyari adia denggararu.”*Masmuri 104:4
8 Mae we Kaisungfoi mani Allai medu deyo,
“Allai Wau, nemu kadera mananu wai wiatai we fitawafa,
tuti Wau wemananu na enemurorong mesi.
9 Wau mani enemuo ne maifo tuti enemurireu ne karirafo;
nanai wedaya Allai, mano wahui we nemu Allai dine foi,
diri wau yuai wau dedai sewa nemu maniwowirio meweboyari fosa,
tuti deinawi finanai na yuairurang nemu taraiwai na maningno kia mirising fo.”*Masmuri 45:6-7
10 Tuti medu we ne Kaisungfoi kontai deyo,
“Sengne Wau, na reantenang pari fo nari nunei amangneia mitu,
tuti rorafaisi mani waramu wawua fine.
11 Finanai kiai ambori woru,
wape Wau mani munohi pampang.
Finanai kiai ambori memo toyari ansung.
12 Nunei sentenang ambori wukoyari toyari wukoya ansung boriei fo,
tuti toyari manei yiwang ansungfo tonanai kontai riwani na nu siai bei aha.
Wape Wau mani riwang Wau na ea kaha,
tuti nemu rahida wiro werea na ea kaha.”*Masmuri 102:25-27
13 Tuti Allai wiro medu we wewaifosa na weai kawurua deyo,
“Munohi na warahu domoya ne,
paria inari nemu aiteta wausa etawai aweu awemu doa sausa.”*Masmuri 110:1
14 Tonana mani, wewaifosa mani fiani saine? Ea kiai mani nuaninuo efata Allai, tuti Allai demisa we efata inontaraio ambori esobu fariri fosa saine.