8
Yesusi weImami Fuba we Kaiwo Arerai Waworu fo
1 Kaiwo tamadurai kai ninai, weneung tonina: tane Imami Fuba dedai tonana dine, andino minohi na warang domoya fo ria Mananuo minohi na kadera mananu foi na Waidani, 2 tuti yu wang Imami Fuba fo na Rorong Mirarebanai sewa foi, amani na Sempaisi ne Munu wiatai wenumainu foi. Munu nani Sempaisi mantauni andino niariri ne, wiro inontaraine manei dino niariri ne kaha.
3 Weo imami fuba nei kiai mani, ruaisi we kia inontaraine ene fi etohonai we Allai fo, tuti we dohong korbani we kaiwasa ene sasarifoi nani we Allai. Tonanai kontai we tane Imami Fuba Dedai foi; todoni kontaio ne fieai we dohonai we korbani. 4 Masino niayai na nunei mani, todoni kontaio wiro weimami kaha, weo imami manea kawuru ampa we etohongno korbanifo kariri fianai dotu na Kaiwo Musai soi fo. 5 Fianai enari we eweimami fo, finanai enariri na munuo wefiainawiai tuti wenuaninu kariri fio na Waidani fo. Finanai Allai deikaririai kawuru we Musai ampa, na rahidao Musai niari Sempaisi ne Warumai Tendao Omi Nai fi fo. Allai medu toninai we Musai deyo,
“Aromuoaifa, we finanai kai nari kariri fiainawiaio yeisaharai we wau na uaifoi nanai.”*Keluaran 25:40
6 Wape ninaifa mani Yesusi ne fi yu weimami fo dedai sewao fi imami batang fosa eru fo, tuti I mani Mano Doa Rahanai na Kaiwo Arerai Waworuo Allai dohoni we yuti foi dine, tuti Kaiwo Arerai Waworuo nani mani dedai sewao bo raminde dohoni we Musai foi, weo weneung na Allai ne dereraio mai sewa fo fefe.
7 Weo Kaiwo Arerai reantenang fo masi fea reti, wiro obu kataifeai nariai aha we Kaiwo Arerai weberu fo ahang kaha. 8 Wape bo reantenang foi wiro masi kaha, weo Allai sobu fisarawafeai na ne inontarainesa, tuti medu deyo,
“Sengne Yau yeyoai,
Tarai we rahidafo ambori da ma ki,
Yau ambori inari Kaiwo Arerai Waworu fo ria riria Israeli fosa,
tuti ria riria Yehudai.
9 Kaiwo Arerai nanai wiro kariri kaiwo areraio yohonai ria ene werengfosa,
na rahida iru na ewaramifo iwiwiainsa era to boriei weru nu Mesiri foi fo kaha.
Weo wiro etohong kariri nehu kaiwo arerai nanai pampang kaha,
ampafe wiro enehutituai wesa ahang kaha.
10 Wape ninaifa mani, nehu Kaiwo Arerai yohonai aha ria inontarai Israeli fosa*Roma 11:11-22
na rahida da aha ma fo ainina; Seng Allaine Yau imadu yeyo,
Yau ambori yohongno nehu hukumine na enumikamieifoi,
tuti isoi na enemirorongfo.
Yau mani, ambori ene Seng di Yau,
tuti ea kontai isahusa we nehu inontarai.
11 Tuti wiro etaunau ene warareng ruhi fosa,
ete ene terafosa ahang kaha, na eteyo,
‘Todoni kontaio metaroanso Sempaisifo,’
Weo ea kiai, katui fuba ambori etaroano Yau ampa.
12 Weo Yau ambori yeinawi nehu enehuwawufo we ene sarawafo,
tuti ene sasarifo, wiro arohuoai ahang kaha.”*Yeremiai 31:31-34
13 Na medu kariri Kaiwo Arera fo sahui we Kaiwo Arera Waworu dine nana mani, niari Kaiwo Arera reantenang foi memo ampa, amani da ahang kaha. Tuti fianai aino memoa tuti da ahang kahai nanai, finanai kefang we wioru fo ampa.