Kaiwo Mahikai Na
Matiusi
Kaiwo dedung we Kaiwo Mahikai na Matiusi
Bukuo Matiusi soi nini, deikaririai we tata Kaiwo Mahikai kariri Yesusi we I mani Mananu Mamparirio Allai dereri foi dine. Na Yesusi nini, Allai dohong kariri fianai aino dererai kawuru na Kaiwo Areraio Mamo fo we ne inontaraifosara fo. Yesusi nini saubaunung weinontarai Yahudi tuti minohifo weinontarai Yahudi, wape Kaiwo Mahikaio deiriria fo wiro we inontarai Yahudi fosa tera kaha, mae we nunei sentenang.
Kaiwo Matiusi soi ninai sania mesi tonanai, amani reantenangfo kariri Yesusi ne saubaunungfo, mayeai kariri webaptisifo tuti kariri todoni Saminseni yurai we sofa wawerahi fo. Kontai soi kariri fianai Yesusi niari na nu Galilea foi fo, amani kiorang Kaiwo Mararebana fo na nanai, deunauai tuti niari inontarai emaninang fosa ebeng aha. Mayeai soi kontai kariri todoni Yesusi da na Galilea to Yerusalemi aha fo, tuti fianai aino Yesusi sodairai na minggu bo wefuiai pari na niayai na nunei fo, amani werea na mireha tuti suwi na mararehafoi aha fo.
Fio fubao Matiusi soi kaririai kontai fa mani, soi we Yesusi mani Mantaunau fiabai dine, andino deunau we Allai mani weMananu. Yesusi kontai ne mambiriu we deisaha kariri Kaiwo Musai soi fo weneung toa fo.
Yesusi ne aunaufo Matiusi deto kutuai we rabuang ring, amani:
1. Kaiwo kariri Yesusi kiorang na wiwoifoi fo, amani kariri todoni ohong toa fo, fianai aino taweinontarai Kristeni fo tanari fo, fio ambori tasobua fo, tuti kariri taminohi weinontarai Kristeni fo (robongno 5-7).
2. Kaiwo kariri fiainawiaio Yesusi dohonai we ne inontarai ewesuraya mandu fosa we etohong kariria fo (robong 10).
3. Kaiwo kariri fi netaweaio Yesusi medurai kariri todoni ambori Allai weMananufo (robong 13).
4. Kaiwo kariri Yesusi deunau kariri todoni tarariati fo (robong 18).
5. Kaiwo kariri Yesusi deunau kariri rahida kife nunei fo tuti kariri todoni Kaisung Inontarai foi daraberahi aha ma fo (robong 24–25).
Kaiwone deto kutuai tonina:
1:1-4 Kaiwo reantenang.
1:5–2:23 Yesusi saubaunungfo.
3:1-17 Fianai aino Yohanesi mano webaptisi kaiwasa foi niari fo.
4:1–4:13 Yesusi webaptisifo tuti Saminseni yurai we sofa wawerahi fo.
4:14–9:37 Yesusi fi niari rahang kaiwasa na nu Galilea foi fo.
9:38–19:27 Na Galilea Yesusi da to Yerusalemifo.
19:28–23:39 Yesusi fi niari na Yerusalemi tuti katai kefang na nana foi na minggu bo wefuiai pari foi.
24:1-51 Yesusi mireha suwi aha, deinawi ne taraifoi, tuti dautai to rorafaisi aha fo.
1
Yesusi ne ririafoi
(Lukasi 3:23-38)
1 Yesus Kristusi mani weriria na ne werengno Mananu Dauti tuti na ne werengno Abrahami ma. Ne ririafoi mani sonina:
2 Abrahami dawingno Isaki,
Isaki dawingno Yakupi,
Yakupi dawingno Yehudai,
tuti kaisung suraya mansiari fosa kontai.
3 Yehudai dawingno Peresi tuti Serahi.
Uinami dino Tamari.
Peresi dawingno Hesroni,
Hesroni dawingno Rami,
4 Rami dawingno Aminadapi,
Aminadapi dawingno Nahasoni,
Nahasoni dawingno Salmoni,
5 Salmoni dawingno Boasi,
tuti Boasi nini inang dino Rahapi.
Boasi dawingno Obeti,
tuti Obeti inang dino Ruti.
Obeti dawingno Isai,
6 Isai dawingno Mananu Dauti.
Dauti dawingno Salomoi,
tuti Salomoi nini inang dino Betsebai, Uriai ne wiwingfoi.
7 Salomoi dawingno Rahabiami,
Rahabiami dawingno Abiai,
Abiai dawingno Asai,
8 Asai dawingno Yosafati,
Yosafati dawingno Yorami,
Yorami dawingno Usiai,
9 Usiai dawingno Yotami,
Yotami dawingno Ahasi,
Ahasi dawingno Hiskiai,
10 Hiskiai dawingno Menaseri,
Menaseri dawingno Amoni,
Amoni dawingno Yosiai.
11 Yosiai dawingno Yakoniasi tuti kaisung maneiru kontai,
na rabuang bo Mananu Babeli kia kaiwasa Israeli foi to warang rorong fo.
12 Tuti ne riria na rabuang bo enai na nu Babeli foi mani, toninai:
Yakoniasi dawingno Sealtieli,
Sealtieli dawingno Zerubabeli,
13 Zerubabeli dawingno Abihuti,
Abihuti dawingno Eliakimi,
Eliakimi dawingno Asori,
14 Asori dawingno Zadoki,
Zadoki dawingno Akimi,
Akimi dawingno Elihuti,
15 Elihuti dawingno Elieseri,
Elieseri dawingno Matani,
Matani dawingno Yakupi,
16 Yakupi dawingno Yusupi.
Yusupi nini mani Mariai ne mang dine.
Tuti Mariai nini dino dawingno Yesusi mano ahui we Kristusifoi*Wonongno Kristusi, nana mani, Mananu Mampariri dine. ne.
17 Ampafe na Abrahami paria sobu Dauti mani, ne ririafoi suraya boa. Na Dauti paria sobu kaiwasa Israeli foi sawai to nu Babeli foi mani ne ririafoi kontai suraya boa toyari ne. Na rabuang bo Mananu Babeli kia kaiwasa Israeli foi to warang rorong fo paria sobu Kristusi Mananu Mampariri foi saubaunungfo kontaio ne ririafoi da suraya boa.
Yesus Kristusi saubaunungfo
(Lukasi 2:1-7)
18 Yesusi saubaunungfo mani tonina. Rabuang bo inangno Mariai da we Yusupi fo, wiro une munu rorong siai kaharai mae, Mariai wearikang weia. Weo Nuaninu Mirarebana foi dino wedayari wearikang tonana fo. 19 Yusupi nini mani inontaraio enerorong mesi dine, ampafe deyo deiaya wiwingfoi na mamunggasai, ambori Mariaio wiro mimaya na kaiwasa bitoya foi euremireafo fanai.
20 Wape Yusupi enetituai we deyo niari tonanai mae, dirua mani demiai. Na ne amiai rorong foi deti Sempaisi ne wewai†Wewai—Inontarai Allai demisa eha ne kaiwo na rorafaisi meu. Ea mani wiro inontarai batang saine kaha. manei medu wei deyo, “Yusupe, Dauti ne ririane waune, dohonao mutai we ka Mariai we nemu wiwing fanai. Weo arikangno doa wei wani mani, Nuaninu Mirarebana faini andino wedaya tonana fe ne. 21 Ampafe i ambori minohi tuti kaisung manei, tuti kaisung nani bohoni wonong fino Yesusi, weo i ambori feriri ne kaiwasanei weru ene sasarinei ki.”
22 Ne nanai kai kawariai tonanai ambori mai kariri fianai aino Sempaisi medurai na ne nabifosara fo, amani,
23 “Kadawing sowaworua manei,
ambori wearikang tuti minohi tuti kaisung manei.
Kaisung nani esahui weo Imanueli.”*Yesayai 7:14
(Imanueli mani kaiwo Iberani fine, dotu tono, “Allai weriria tata.”)
24 Yusupi denawa doara mani dohong kariri kaiwo Sempaisi ne wewaifoi medura fo ampafe kia Mariai we ne wiwing. 25 Wape wiro dena riati kahai paria Mariai minohi tuti kaisungfoi. Tuti Yusupi dohong wonong fino Yesusi.