Angig Mo Jon Ginofena
Hwa buk enaig esog
Hwa buk la emba sambaganigi mog mo sihig. Jon membeg Kristenim kwaganiba sa ma mungu olug Api God i afa heafna Leg Sisas Krais i afei. Ehe enaig membeg ehegel ese sikulufeg elim esogonife au ambe go. Emba ehegel negelni olug onigigim mwakwale gonibi asa ne Godim fwahinim membi gam nem wanafufe. Afa enaig el emba sikulifeg la nai el fig afa ehengel enaig sihifig og, “Hwa bitena gawig eba amtakwalig. Afa Sisas eba Godna Leg, asa ehe mas hwaig elig na blonam el lofugfei afa mungwali bite nai gawigna angoguli asa bigel fasife. Afa ehegel enaig esogog, el membig God i suialag hawag ahfe ehegel ese bite nai gawigim fwina onigiafofufe.” Afa ehengel gafa enaig esogog, “Suilag nihe afa elim membeg nihe eba bitenai nihe nofene enam fwina oniginim afa enag nihem patalfu.” Afa Jon membeg Kristen el nofe ka enaig mo higi. Ehe enaig sihifeg og, Sisas nufunam blona asa el lofug gona afa el sa Sisasim olug oniginig ehegel sa Godim fwina membig afa sa ma mingnagim gafa membegoni.
1
Nofkenagag Mo eba Sisas
Kagel nengelim ginofegonig enag el ehe nofkenagag mo. Enag Mo autunam nemug ati gofena. Enag ati kagel higig afa kiafna nofna nangug, afa kiafna ningana kehligim faig eflig.
Autunam enag wahkig nofkenagag el eba Alag i awag afa ilawaba ati bigim ambala fenig. Afa maia enag nofkenagag el pugugba kagel nangug asa kagel nengelim sihigonug.
Kagel ati higig afa nangug afa nengelim sihigonug asa bigel mungu oningig fli. Sama Alag i heafna Leg i Sisas Krais olug usumuiag la bigim ahwangofi.
Kagel hwa mo ginofig sama bigelni sifakal fwina gofi.
Bigel asa ombusug mina patalfu
Hwa mo Sisas kagelim sihinigbi afa kagel higigim asa ka nengelim sihigonug. Enag mo enaig sihifeg Godba ombusug sikulufeg mas ehena yi go mo, eba awai nemug.
Afa bigel haig haig nihem patalfuiba eba bigelbi sikulufeg la afwaiye. Afa enaig esinim afa bigel esogofe kagelbi heafna eba awai bigelni mo eba mwakwaleg afa bigel mas suialag nihem patalfug mo.
Afa bigel ombusug yi afwaiyefiba asa God enaig esefe asa heafna Legna taf la bigelni amtakwaligim huguflafatife afa bigel mungu oningig mungwali laskuhlag.
Afa bigel esogofe kagelbi haig haigba awai eba bimbefim mwakwalig afa nufunam mo mas bigelni oningig la feg mo.
Afa biafna haig haig amtakwalig Godim sihinaiba eba enaig esefe ehe ati sihi fwahag asa bigelni mungwali haig haig amtakwaligim huguflafatig asa mas big nufweni afofi.
10 Afa God enaig esog nengel mungwali el ati haig haig amtakwalig esig. Afa bigel esogofe kagelbi mas haig haig esig mo asa enag mo enaig esog Godna mo eba mwakwaleg afa heafna mo mas bigelni oningig la feg mo.