Mo Pol Galesia la nai Elim Ginofe Faini
Hwa buk enaig esog
Afa lasflam el Sisasim patalfugba eba Ju el esini. Afa sumi yi mo Sisas Polim nigihiana asa ehe ikanam suialag mo afwambanai elim sihinuwegena. Afa maia mungwali el ambe Sisas nai yi saiye gonaba asa kinig amtakwalig puguna. Afa autunam enag el mas Mosesna nihe mo patalfuna mo sa Ju el enaig safife. Afa maia ehegel Sisasim olug oniginibi ehengel enam etetig sa Mosesna nihem patalfui me awai awai me? Afa mingnag el eba ehengelim kukusihiagonig Ju elni nihem patalfunam afa elig nihig lofug kokohiawagi afa Mosesna mingnag nihem gafa patalfui. Afa Pol enaig esog amo eba awai. Afa ehe enaig esog Sisas Kraisim olug onigignig mina eba naho Godna noflaba bigel afsug kabag fegim asa big glaunai nofkigenagog flig. Afa eba enaig eseg mingnag Ju el ati Galesia gam afugim afa Kristinim kukusihiagigim og sama Mosesna nihem mo patalfui. Afa maia enaig Galesia elim pugunigba asa Pol enam mo higinam sa hwa buklaba ginofena og sama heafgelni olug onigig mi afa nihem mi sama numwehiagi. Afa Pol enaig esog, God ehe kam kanog fwahag el fegba asa ka enaig eseg. Afa ehe enaig esog. Afa amban el sa Sisasim olug oniginig ena ho Godna nofla afsug kabag apukeg. Afa sumiyi hwa buk la ehe enaig esog, maia Krais bigim esenigbi asa big sigag la afuhe. Afa Godna sungwabug bigelim mina kagim gosenig asa bigel mingnag elim suialag nihe esegonig.
1
Ka Pol, afa kaba Godna kanog fwahag el feg afa enag gafugagba el mango kam faig mo, amo eba God Api asa Sisasim pese ihlafona ehe kam kanog fwahag afa Sisas Krais gafa asa eheningi enag gafugag la kam ahfwahag.
Asa nilite sa ka mungwali afwaiye kagel nengelim Galesia sios la nai elim suialag onigim ka ginofe ningihig.
Ka membeg bigelni Api God afa Ainiyag Sisas Krais eheningi nem suiala ahfenafe. Asa olug fulufeg afa God esmunagim nem kweafufe eba nem enaig esenafe.
Afa sa Krais bigelni Api Godna sawiegim patalku afa bigelim lahanigim asa bigim amtakwalig mina nai lambig asa glanu bite nai amtakwalig onigig mas bigim kehlai.
Asa big Godna unehlagim wahkig fingi ufufum. Eba nufunam feg.
Godna suialag mo eba mungu go
Afa nengelim ka iskofakanig nihe sa ne fig. Afa Kraisna kwania gafugag la God sa nengelim aflafenig afa awamonig. Haisegba sa ne ikagna Kraisim masig fatinagim afa ming mom mo sawifenag?
Afa nengelim ka sihinig ming suialag mo eba awai. Asa ka esog afa mingnag el nengelni onigigim gasafehiagig afa Kraisna suialag mo waikefi alganam mo sihig.
Afa kagel suialag mo nengelim ati sihigonug. Sa hig, kagel i afa oflanai el i sa ena mom waikenam alganam mo osihigonifibi nofeka enam higi. Afa amban el enaig esegba eba God sa ma ehem suwi wahkig lagig yi flafati.
Afa kati sihini afa glaunu pese nengelim sihinig afa amban el alganam mo sihinibi asa mas mungwalofeg mo asa ilawana ne flini eba God sa ma enaig elim suwi wahkig lagig yi flafati.
10 Afa ka mas enaig esog mo asa el kam suialag onai amo ka membeg God mungu sa ma kam suialag onai. Afa kam oksig elim embeg mona sihinigim asa el kam suialag onai. Afa ka elim enaig sihini ka fiba eba ka mas Kraisna gafugag el fei.
Pol Kraisna kanog fwahag el haig pugufena
11 Afa kana nilite ka membeg ne anwenafi hwa suialag mo ka sihina eba mango elni onigig la puguia mo.
12 Afa el mango hwa mo kam faig mo afa mas amban el kam ogfunag mo. Amo, Sisas Krais ehe enag mo kam upugunag.
13 Afa ati ne kana mom higini ka autunam Ju elni nihe la seaifuna. Afa enanam ka Godna elim mas ka aflafeni mo ka fwina kwagaiti fiahkafena asa ka membeg ka Godna siosim fwina amtakwalig klaiti.
14 Afa Ju elni nof la ka mingnag elim goseni asa ka munguna afohiana afa ehengelba sum fini afa kikeba enag nihem goseg patalkuna. Afa ka fwina onigig kiafna simbianigana nihem patalkuna.
15 Afa autunam mia kam fukla fwainig asa God ehe kam kanogim heafna gafugag el fwahag. Afa ehe kam esmunagim kweafug asa kam unenag.
16 Afa God heafna legim kam ogfunag asa ka afwambanai elim ehena suialag mo sihig. Afa el mango kam onigig fai mo.
17 Afa ka mas Jerusalem gam ika gof la nai Godna kanog fwati elim nangwagim amo ka ikagna Arebia provins gam ika puguna afa pese Damaskus kembig gam blona.
18 Afa maia sambaga mungu yia fenaba asa ka Pita nangum ikana. Numwehe mo flagim asa ka nanai yi sambaga wik ahwagana.
19 Ka mas ming elim kanogim nangu mo eba Ainiyagna suminigim mungu Jems.
20 Afa God ati kam anwenafenag ka mas mwakwale. Mangwal asa ka nem ginofenag eba nufunam.
21 Afa enanam ka Siria afa Silisia provins gam ka ikana.
22 Afa enanam Judia la nai sios el kam mas anwenafini mo.
23 Afa ehengel mingnag mo higinim anwenafinim og el mungu asa bigim amtakwalig klaiti fiahkafena ilawaba ehe suialag mo sihig olug onigigna mo afa autunam ehe enam olug onigigna mo fwina amtakwalig klaiti fena.
24 Afa ehengel kana suialag nihem higigim maia ka enaig esegba asa ehengel Godna unehlagim fingi fig.