Siosna Misog El Hibru Kristen Elim Ginofeni
Hwa buk enaig esog
Afa hwa ginof Kristena olug onigigim kweganig. Afa mingnag Kristen ogna heafgelni olug onigigim fwahi maia mingnag el ehengelim pigau pegonigba afa kinig faigonig. Hwa buk ehengelni olug onigigim wasnei hianigeg afa ehengelim kwania gafugag ogfunig asa God Sisas Krais nai yi esena. Afa Krais mungu feg bigim God na nufunam minaba ogfunig.
Hwa bukba sambaga mungu mog mo sihig. (1) Sisas eba nufunam Godna Leg feg. Maia Sisas bite la gofenaba afa ehe kasag kinig flana afa kwania susug kahalana. Afa enag mina la, God Sisasim esenaba lasflam asa bigim mungwali elim kwaganig (2:10) Asa Sisas fwina kwania fegim afa autunai Godna mo fli sihiaule elim gosenig afa oflanai elim gafa gwenaig esenig afa Mosesim gafa fwina kwania fenagim gosenag. (2) God ehe Sisasim gisfu fwahag sa ehe prisni misog el feg sa wahkig gofife. Afa ehe Ju elni misog Prisim gosenig. (3) Sisas eba misog pris feg ehe heven la go, afa eheba kwania fegim sa elim pese lambife amban sa nufunam ehem olug onigignag. Afa Mosesna nihe mo i afa Ju elni lofuna nihei eba sugwagim ogfug kwania gafugag Sisas sa esena.
Hwa buk eba elni olug onigigim wasneihugeg asa kaksag mo sihiageg autunam Israel elni olug onigigim wasneinugena asa enam ogfug. Sapta 11 eba enam sihig: Afa ming mo enaig esog afa haig haig kinig negelim pugunifiba sa ne nimbiafna olug onigigim mo fwina suialag kehlifi ufufum sa lahag nem pugunife. Afa negelni nofug sa ne Sisasim nangwafufum afa heafna nihem patalufui asa kinig i afa susug i mas negelni olug onigigim enam filafati (12:1-11).
1
Sisas Krais Godna Leg oflanai elim gosenig
Autunam God bigelni Ju elni simbianigam mo faigim Godna mo fli sihiafule elni mengig la sihi fwahafena. Afa haig haig was mi afa haig haig mina mi God sihi fwahagim
Afa glauwo awaiegim osuna muhla fegim ofeba God heafna Legna bigelim sihinig. Afa ena Luwalna ehe mungwali gawig eseageg fwahagba afa maia sumi yi osuna awaiegim ofehba God ehem ati gisfu fwahag asa ma ehe enaig gawigim lambife.
Afa ena Luwalba eba God lofug mungwalofug asa ehe Godna ombusugug ogfufe. Afa heafna wasneig mo mungwali gawigim kike lambku gufufe. Afa ehe maia elim mina gafugagfenibi asa afsug fifi ehe ati heven gam ikag Godna sisi yi nemugna pegag sime muhla la go.* Afa el muhla God nai yi go eba ogfug enag el eba suialag unehlagna feg.
Asa ehe oflanai elim gosenig. Afa unehlag God ehem faigba eba oflanai elni unehlagim gosenig.
Afa enag moba Sisasna unehlagim fingi fukug afa God mas oflanai elim enaig esonig mo ehe enaig esog;
Neba kana Leg feg afa hwag osunaba ka ambala sihig ka neana Alag fefe. Sam 2:7
Afa ena gafa mas enaig moba oflanai elim esonig mo;
Eba ka ehena Alag fefe afa ehe kana Leg fefe. 2 Sml 7:14
Afa God goflanai Luwalim onigihiafiba asa ehe enaig esofe og
Sa ma mungwali Godna oflanai el ehena unehlagim fingi fi.
Afa oflanai elbi eba God enaig esonig;
Ka kikeafna oflanai elim esenibi sa ma efef lofi afa enag gafugag el sa ma suwi meleg lofi. Sam 104:4
Afa Luwalimba eba God enaig esog;
Neba God feg asa ne wahkig misog el gofufe afa ne mungwali elim numwehe kwefihiagenam afa nangwagihiagefe.
Afa suialag nihe mo ne membeg afa amtakwalig nihe mo ne olug kakagenag. Asa kaba neana God ka neana unehlagim fingi feg afa sa neana sifakaleg kwaniafeg. Afa ne nimbeafna hihem gosenig. Sam 45:6,7
10 Afa God heafna Legim mingnag mo maisim sihinago og;
O Ainiyag, autunam ne hwa bitem esegba afa nimbiafna ningana ne ofum eseg fwahag.
11 Afa enamba eba awaiefe afa nimbiafba ne wahkig gofufe. Afa enamba ofenaiba lofug watiauegim afa piplehiagofe.
12 Afa ne mumwanefku fakafe ofenaiba el lofug huguflakagim afa yimieg fatig. Afa ne gwese gofufe afa ne mas watiauwe. Sam 102:25
13 Afa God heafna Legim enaig esonag og;
Sa ne kana muhla pegaiba ka maia neana angoluwagim filafe klaitiba sa ma ehengel nem ahnai skaufini. Sam 110:1
Afa sonaig moba God mas oflanai elimba esonig mo.
14 Afa mungwali oflanai el eba sungwabug figim afa Godna gafugag el fig. Afa sa God ningitigiba elim God sa ona lambim enam kwaganig.

*1:3: Afa el muhla God nai yi go eba ogfug enag el eba suialag unehlagna feg.