3
Jon bula laitiag el mo sihiagena
Matyu 3:1-12, Mak 1:2-8, Jon 1:19-28
Afa maia 15 yia fenaba Taiberius Rom elni misog el fena. Afa Pontius Pailat eba distrik Judia gavmanna gosig el fena. Enenaba Herot distrik Galilim nangwaghiage gofna afa ehena sumineg Filip mo distrik Ituria mi afa Trakonitis mi enam nangwagehiagena afa Lisanias mo distrik Abilenem nangwagehiagena.
Afa Anas i Kaiafas i eba prisni misog el ahgofena. Enenaba Sekaraiana leg Jon bite behig la gafna. Afa God Jonim mo faina.
Afa sa ma mungwali elim Jordan bu blug muhla gohka enam sihinwageakai afa enaig esona og, “Sa ma olug waikefinim, bu la apaiyeiba afa sa ma God ehengelni amtakwalig nihem huguflaitini.”
Afa enaigba pugunaba eba ati mo fla sihiaule el Aisaiana mo buk la gofena. Ena mo enaig esona og;
El mungu bite behig la mo sihiakafe afa ehe enaig esofe og, ‘Ainiyagna mina ombusiaginim numwehiagi.’
Afa mungwali mog tutohiageakaiba sa ma tafafiakai sa ma kombugu fegim fuku gwenaig eseg. Afa mina kiapesegim sa ma misosuf gi afa mina mas suialafeg mo sa ma numwehiafli.
Afa bitenai el mungwali sa ma Godna gafugagim nangunim asa ehe bigim lambigim eseg. Ais 40:3-5
Afa asa kaksag el Jon nangum flaubluna bula apaiyegim afa Jon enaig sihifeni og, “Nengel giheana luwalig, God sa ma nem susug fai afa amban nem sihinigbi sa ne embemba afufe?
Afa atiaba ne nufunam olug waikefigbi eba sa ma nimbeafgelni nihem ogfui eba ati ne nufunam olug waikefig. Nofeka nimbefum esogo, ‘Abraham eba kangelni simbianiga.’ Ka nem sihinig eba God ehe hwa funim eseiba asa Abrahamna simbianiga apuke afohiefe.
Afa mal ati li mog la gi afa mungwali li sa suialag fug leg fwainigba, eba malna higfihinim suwi la laitife.”
10 Afa el Jonna mom higinim afa esogona og, “Haig sa ka esife?”
11 Afa ehe wahigi sihini og, “El sa sambaga lofugna fefe asa ma ming mo amban sa lofug fwainig feg sa ma enam fai. Afa amban sa fane fwainig feg ena gafa sa ma gwenaig esenai.”
12 Afa mingnag kig lambiule el ambe bula apaiyofefnaba Jonim sahni og, “Tisa, haig sa ka esife?”
13 Afa ehe wahigi sihini og, “Kig sa ne lambigbi asa ne gavmanna moaihla lambifum nofene gwesim hilifi.”
14 Afa ami gafa ambe ehem sahni og, “Ka gafa haig sa ka esife?”
Afa ehe sihini og, “Nofeka mingnag elim amtakwal hiaginim kig lambigoni, afa sa nofeka mingnagim muni gofegon sa ne nimbeafna kigim oniginim asa ne gwenaig ihla eseafufum.”
15 Afa el enaigim nangunim olug fingi feskofenam afa enaig onigini og eba hwa Jon me awai God Gisfu Fwahag el me.
16 Afa Jon pese wahigi sihini og, “Kaba buna nem esenig, afa el sa sumi yi oblo ena elbi eba wasneigni feg ehena wasneig kana wasneigim kwegfug gwesim ikag, kaba mangwal suialag el mo na ka ehena mong lofug weba pigina. Eba ehe nem Godna Sungwabugni afa suwina asa nem bula laitife.
17 Eba ehe savol ningana flanam asa blofe afa ehe blonam fungisge mo wit yi nai lambuhiagenam asa wit mo lambinam heafna wit lala skofe afa fungisge mo lambinam suwi wahkig lagig yi wehlafe.”
18 Jon maia ena mo sihinaba afa ena mo elni olugim fwaki lasana. Ehe elim Godna suialag mo sihinwageg gafugafena.
Herot Jonim kalabus i fatina
19 Afa maia Herot heafna suminegna angwagim Herodiasim fapugufe nagohun asa flana afa haig haig nihem gafa gwenaig eseagena nasa Jon ehem fenagena.
20 Afa sa ena nangum Herot Jonim kalabus lala fla fati fwahana.
Jon Sisasim bula fatina
Matyu 3:13-17, Mak 1:9-11
21 Afa Jon maisim kalabus seg fwainig fiafnaba afa mungwali el bula apaiyena afa Sisas gafa gwenaig esena bula pena. Afa bula penam pugu betene gofenaba afa sa of bafona.
22 Afa maia of bafo gofnaba Godna Sungwabug gamp lofug Sisas nangum pe blonam afa higfufnaba Godna mengig heven la enaig lagofna og, “Ne kana leg, ka nem fwina membenag, afa kana olug nem suialafenag.”
Sisasna simbianiga unehlag
Matyu 1:1-17
23 Afa sa Sisas gafugafena enag ehena krismasba 30 enaig la fena. Afa el enaig onigini og eba Josepna leg,
afa Josepba Helina leg,
24 afa Heliba Matatna leg,
afa Matatba Livaina leg, afa Livaiba Melkini leg,
afa Melkibi Janaina leg, afa Janaiba Josepna leg,
25 afa Josepba Matatiasna leg, afa Matatiasba Amosna leg,
afa Amosba Nahumni leg, afa Nahumbi Eslina leg,
afa Esliba Nagaini leg,
26 afa Nagaibi Matna leg,
afa Matba Matatiasna leg, afa Matatiasba Semenna leg,
afa Semenba Josekna leg, afa Josekba Jodana leg,
27 afa Jodaba Joananna leg, afa Joananba Resana leg,
afa Resaba Serubabelna leg, afa Serubabelba Sealtielna leg,
afa Sealtielba Nerina leg,
28 afa Neribi Melkini leg,
afa Melkibi Adini leg, afa Adibi Kosamna leg,
afa Kosamba Elmadamna leg, afa Elmadamba Erni leg,
29 afa Erbi Josuana leg, afa Josuaba Elieserna leg,
afa Elieserba Jorimna leg, afa Jorimba Matatna leg,
afa Matatba Livaina leg,
30 afa Livaiba Simeonna leg,
afa Simeonba Judana leg, afa Judaba Josepna leg,
afa Josepba Jonamna leg, afa Jonamba Eliakimni leg,
31 afa Eliakimbi Meleana leg, afa Meleaba Menana leg,
afa Menaba Matatana leg, afa Matataba Natanna leg,
afa Natanba Devitna leg,
32 afa Devitba Jesini leg,
afa Jesibi Obetna leg, afa Obetba Boasna leg,
afa Boasba Salmonna leg, afa Salmonba Nasonna leg,
33 afa Nasonba Aminadapna leg, afa Aminadapba Atminna leg,
afa Atminba Arnina leg, afa Arniba Hesronna leg,
afa Hesronba Peresna leg, afa Peresba Judana leg,
34 afa Judaba Jekopna leg, afa Jekopba Aisakna leg,
afa Aisakba Abrahamna leg, afa Abrahamba Terana leg,
afa Teraba Nahorna leg,
35 afa Nahorba Serukna leg,
afa Serukba Reuni leg, afa Reubi Pelekna leg,
afa Pelekba Eberna leg, afa
Eberba Selana leg,
36 afa Selaba Kainanna leg, afa Kainanba Arpaksatna leg,
afa Arpaksatba Siemna leg, afa Siemba Noana leg,
afa Noaba Lamekna leg,
37 afa Lamekba Metuselana leg,
afa Metuselaba Enokna leg, afa Enokba Jaretna leg,
afa Jaretba Mahalalelna leg, afa Mahalalelba Kenanna leg,
38 afa Kenanba Enosna leg, afa Enosba Setna leg,
afa Setba Adamna leg, afa Adamba Godna leg.