Pitar
dwandfamo barkof gontwat
Barkof kfo nuhas mrokfom
Kristenm bok krhopam yakmoatm ndnatn Pitar rroh kfo bmtayuk mrokfom gontwat wandfakhato htafmorm. Gontwathu mrokfom kfo memor, “Kristenm Jisas Kraisrhu gutnius mrokfomn dukefm htakfot. Jisas Kraisr nohmor. Nohhato tfit sinyamor. Sinyahato yura moun yuhat rim fnahnimor. Kto tfit yarim fnahnehato yawihnehato tafont htiyakrahmr tuhant yindars.” Nd mrokfot tur kfo htanymort. Nd mrokfot yakitoh kihhato toh gari hasokfot.
Kristenm mirahko ka be rhu yindhorkfot wom kurhefen duha. Nhai. Nd krhopam Kristen yimaroh toh nmbuharoh mnhombrayuk nefem. Nd Kristenr wohsisrahr o nhai. Nd nefet. Mirahko ka tamoh nefet. Ndnettn Jisasr yakitoh kihhato toh bmtakfot. Toh bmta hasetnn Jisasr niahato mhtiyaknerahrn, to be yakruharn dborioh rhu nmbuhat hirahrn.
Nom Bro Nkifrarhu dborioh tuhannom yindarinom tohwonom. Ndnetnomn nom be dborioh dborioh nefrpam na hasohato nd nmoh yufampno rhuyuk wuskamn be toh gari hasokfot.
1
(Sapta 1.1—2.10)
Na Pitaya. Nann Jisas Kraisr aposer hingrneft fak htamor. Ndar gontwat nann wandfakhato htefiwant. Niko Bro Nkifrarhu yufatpno bi ruhet yimako, nikompno ndar gontwat niewut. Niko frohko rpen rpen natubatunihato Pontus tohwako, niko frohko Galesiat toh-wako, Kapadosiat tohwako, Esiat tohwako o Bitiniat, nd nd profinsm tohwako, ndar gontwathu mrokfom wahtitwakomm. Nd kmim niko toh-wam womroh kmiyem. Hefenr tor, tukmoh tohyuk kmir. Bingot Bro Yifemr rhuhato rorhu dukeft bi wuri wuri yimot. Bi htimort nikmoh yak htayuk yihotat. Bi hti htatahato bi rorhu yufatpno fak dbkaf htamorko. Memor, “Kto nanhu yonm rhurahm.” Bi rorhu yufatpno yak dbkaf htayet-komn turhu Yafothat niahato tu Jisas Kraisr kanjo fak htamorko. Memor, “Inji yak htahato Jisas Kraisrhu mrokfom hikrahm.” Kraisrhu kkupam kfomom nikmoh yima rifhum yak wus bowushato Kristenko tohmoko. Bro Nkifrar hti yuhuwafhato nikmoh yima yuhum minoh hmbrehato yak marnya bomarnyarahrm.
Hefenrn tu dborioh toh nmbuhat yakrahko
Akfo yindhor boyindhornomr Bro Nkifrar, nmoh Nungothet Jisas Kraisrhu Yifemr. Bro Nkifrar nom yuhuwafhato Jisasr bi nohhato yopt ruhetr tfit kasinyamorr. Jisasr yima nfrir tfit tohhato nfri dborioh rhu nmbuhat he hanitrnom. He hanyhato nom htitwa-nomn nmoh yima yuhum sinyewum Bro Nkifrarparhu yakitohhato hikneft. Nmoh dukeft duka kangnom, bi rorhu yon mifenom. Nmoh yufatpno rhuyuk wuskam Bro Nkifrar kakitoh-wormko hefenrn. To nhai finji na-ruhatm. Be inji rhu hanyrahm. Bro Nkifrar tu nngrajoh Nkifrayer. Bro Nkifrar yakitohhato hikwatkomr kuka-tohafo hanitrko. Rorn toh natwihworko. Nhai wom tamohm niko finji nakfot. Be inji rorn toh natwih hanyruharko, ee Jisasr nierahr. Niahato tfit rorn miyakruharko yak marnya bomarnya-rahrko.
6-7 Jisasr niko miyakruha nmbuhat wany yindhorwakomn yima yuhum tohetohwomko. Ndt rot hifa nmbuhat. Nd krhopenm Bro Nkifrar yahukam, to mirahko niko ndm mhtiyakhato tfit amthu youtanom. Nhai. Nd krhopenm niko Bro Nkifrar yahukohat kangr, “Afo ahtiyanm, toh bmtarahm o nhai.” Kraisr yakitohhato hikwa nmbuhat gorharoh hingrneft kanjo inji kitwot. Yimar gorham yekwohat yuht nungur fukayett kekwort. Kto tfit kahe tarioh hnutrm. Tarioh hnuhato nd nungur fukat yak thuwart tu fnhuyet gorha mifrpam kekwor. Bro Nkifrar hikwa yimaroh toheft to inji korht. To mirahko Bro Nkifrar ka nd gorham wofnwor. Nhai. Ndm rom bbinysoftpno mibatiniyukem. Ror niko yakitohwa dukeft ndt hti hanitrt. Nd krhopam yakruhakomn nikmoh toheft toh bmtarahko. To hifa. Nd krhopam niko yakmom, nhai yima yuhum krhormomko. Nhai. Jisasr yakitoh bmtahato tohmokomn yindho-refrpno tohmoko. Ndm bi hti htamormn kto Jisas Kraisr yawihnehato yimam htiyak thoft be tu bro yufat hirahrko yo bro yindhor nmbuhat htarahrko yo nikmoh yufam yura yura yutahato kfo yindhorrahrko. 8-9 Jisasrpno yima yuhum yitahat nhai yima nyingatikm htihato yima yuhum be rorhu dukefrn rhukahm. Nhai. Yo rorpno bro dukefm htewohat nhaf inji. Nhai yima nyinga-tikm htihato inji nakahko. Nhai. Nikmoh bro dukefm Jisasrn kitm, ndnatn Bro Nkifrar kak hanitrko. Inji newatrko bro yindhorefrparpno korhko. Nd bro yindhor rifhur nikompno yorhwar be tu bro yindhor rifhur korhrko. Nhai finji kfo hikkfot.
10 Bingot bi profetm kfo ptha htamomt ndar rhu nmbuhat niko bi yekwat. Kfo ptha nhta bonhta me-moum, “Bro Nkifrar nko fitoh yuham tfit yakmiyakruharm?” 11 Bro Nkifra-rhu Yafothat nd profetm mthu nawoh-moattm kfo memoum, “Kraisr krhopam yakrahr, nhai be rpahtet krhopam yakruhatr. Krhopam yakruharn kto tfit bro yufat yakrahr.” Kraisrhu Yafothat inji kfo nuhasmoattm, tfit nd profetm kfo ttiwon hta memoum, “To nd yimare fitoh yiha nieruhar? Tone krhopam finji finji yakruhar?” 12 Inji ttiwonmoatm Bro Nkifrar kfo memorm, “Na hingrnaruha hingrneft nhai bi nikompno hingrnarhotant htiruha-komt. Nhai. Kto nikmoh mongko. Kto ndar bbinysoft nia tohruha yimam, romn nd neft htirahmt.” Nd gutnius mrokfom, yimam hnehato kfo nuhas-wam, ndmn kfomor. Bi Bro Nkifrarhu Yafothat yawihnehato yimam thu nawoh hanitattm romn nd mrokfot miyaknihato kfo ptha nuhas hanitatmko wany hanitwokomm nd gutnius mrokfom. Mounmotm rom nhaf kangm, “Nd gutnius mrokfot afo awany hik bohiknomm.”
Bro Nkifrar tur tohwa toheft kanjo tohneftn nakumornom
13 Bro Nkifrar duka kangr, “Athu nhirakkahanm tukanhu toheft toh hikrahm.” Ndnettn nikmoh yima yuhum yak hta bohtatahato nikmoh wiyauyau nmbuham dukefmpno yaukfot. Bok dukefm yak duha, rpa yima yuhurpam rhukfot. Rpa yima yuhum rhuhato Bro Nkifrar mekahtr Jisas Kraisr yak hfhanafohato moun yuhat yawihnehato tuhant yindars tafont nyinga rihar wuhtiyak thombat, nd yiha Bro Nkifrar yakhato yak marnyarahrko. Nd dukeftn yakitohkfot. 14 To be niko Bro Nkifrarhu dukeftn rhukfot. Bi Bro Nkifrarhu yoneko bi. Ndnettn mirahko tfit Jisas Kraisrhu mrokfom tafi wany juha na hnamo nefm tfit nd nefm ananom. 15 Bi Bro Nkifrarhu yoneko. Bi turhu yufatpno fak dbkafmorko. Ndnettn niko yonko be turhu toheft toh hikkfot. Nhai kspitafat rim tohkfot. Nhai. Mar tafont tohkfot. 16 Nkifra rfa borngt Bro Nkifrarko kfo memor, “Na Bro Nkifraya mar tafont tohwa, niko to inji mar tafont toh bugakfot.”
Nmoh fasoh fasoh nefmpno Kraisr suh nanyormornom
17 Hefenr tor nmoh nkifra kmir. Bro Nkifrar tor nmoh Yifemr. Ndnettn ndar bbinysoft tohneft be rorhu yinhitn toh hikkfot ndar bbinysoft tohwa yifemrom toh hikwa kanjo. Nd Yifemr nhai nom yakitohwa yufam o hingr-nefm o tamohm ndm htikahr. Nhai. Yima buganom rpahtet yukatoheft kukatohwornom. Ndt tu dborioh neft newur. 18 Bi nikmoh nkifram toh hawihnamo nefm ndm fak hik hna-moko. Nd nefm bi Kraisr suh nanyor-morm. Nhai fohrn o nunga krirn nohrmor. Nhai. 19 Kraisr suhhato kkut yohnemot. Nhai rorn wom nefm nahato suhrmor. Nhai. Mgogra yimar, be nmoh nefmpno suhmor. 20 Nmoh fasoh fasoh nefm Kraisr tkitt yakhato nohneft, ndt Bro Nkifrar mounti bbinysoft tafi hingrna hta duha nd dukefr bi duka htamorr. Nda tu wuroh yihampno Kraisr niahato yima rifiny buharn suh nanyormor. 21 Kraisr nohmotr tfit tu Bro Nkifrarn bi yopt ruhetr tfit kasinyamorr. Kasinyahato bro yufat hemorr. Nd mrokfom bi wanyetkomn Bro Nkifrar kakitoh-wokomr. Yakitohhato gari hasiwuko Kraisrhu nia miyakneftn. Kraisr miyakruharko hifa rhu nmbuhat yak htarahrko.
Bro Nkifrar hikwa met yindarim yak marnyakfot
22 Jisas Kraisrhu gutnius mrokfom, yafothayet mrokfomn wanyhato hikmokomm. Hikhato nd fasoh fasoh nefm fafho thumokomm. Yafho thuhato yima rifhumio wutham rhumom. Yima rifhumio wuthamn dborioh dukefmn yakhato niko tuko Jisasr hikwa tuhan yindariko najohfi yagnr tohhato tuko nayak marnyewuko. Nd neftn yakitoh hany yakitoh hanykfot. 23 Nda Bro Nkifrarhu mrokfot rhu yakitoh hanyraht. Kto be inji rhu nkifraniraht. Nd mrokfotn nikmoh yima rifhumio rihingrnamottm toh nmbuham bi yewuri tpim kanjo frdborhamoko. Frdborhahato nfri yima yuhumpno tohwoko. Nd yewuri tpim rom mibatiniyukem. Bro Nkifra-rhu mrokfot rot be inji rhu nkifrani-raht. 24 Ndar mrokfot tu fipet mro-kfoyet. Nkifra gonborngt kfo memot,
“Nda bbinysof bugathu tuhant yindars
kiprt kanjo tohwom.
Tfa htewamn tfit yudbat tfam yohnitm.
Nhai wom rhu hatohkahm.
Yimam inji nahikrahm,
wondht mhatoh tefihato yudbat yohniraht.
25 Bro Nkifrarhu mrokfot nhai inji naruhatt.
Rorhu mrokfot be inji rhu nkifraniraht.” Aisaia 40.6-8
Nd mrokfot niko wanymo gutnius mrokfoyet.