Lukr
dwandfamo gutnius mrokfot
Barkof kfo nuhas mrokfom
Lukr Wandfamo Gutniuskfotn hti dukarahn Jisasr niahato Isrermi riruh aruh kmiyakmim nrfa htiyakmo yuhat. Jisasrhu hingrneft rihingrnakmohat met yindars kfo memorm, “Brorhu Yafothatn thu kasinyamotta nd knbok yuham rirhu arhuyuk yima bebpam nann gutniuskfot kfo hi hanyruhanm,” (wahti Luk 4:18). Ndnettn Jisasr nda bbinysof thofm yuhuwafhato rorn nohhato rroh rhu nmbuhat fak marnya bomarnyamort.
Lukr tndh hik bohik marnyamorm Mariat Jisasr hiyaumo yuhat yo ror hefenr muhmo yuhat. Tndh hikmotrm yimam htimohat rorhu tndh mrokfom hti yindhormomm.
Jisasr tohhato nahnamo wom wom nefm Lukrparhu rfa borngtn htirahnm. Nhai wom rfa borngm htiruhatnm. Lukrhu rfa borngtn wandfa hik bohikmorm Jisasr nurmo yuhathu mrokfom, Samaria thofr yak marnyamo yimarhu tndht, wom yonr yifemr htanyhato nkiranimorhu kfo nhombra mrokfot yo wom wom tndhmi kfo nhombra mrokfom, nd nd mrokfom Lukrhu rfa borngt korhm.
Wom mrokfom Lukr mfro dukahato kfo pthamom, kfo pthamor kfo bruttnaneft, Bro Nkifrarhu Yafothathu hingrneft, bbinysof thofroh fasoh fasoh nefm Bro Nkifrar yafho thuhemo yuhat, yo metm Jisasrhu hingrnefm hingrnanhomo yuham. Ndm wom mrokfom ndar gonborngt htamorm.
Lukr wandfamo mrokfom nhai ndar gonborngrpat rhukahm. Nhai. Rorhu wom mrokfom Aposer gonborngtn korhm. Rorn nd Aposer gonborngt wandfamort.
1
Lukr Tiofilusrpno gontwat wandfahato nd kfo nuhasmo barkof kfo nuhas mrokfom
1-2 O Tiofilus, Jisasrpno rhu hawihnamo nefm bok yimam htimomm. Rom htihato pthamomm. Pthamotmm wom yimam rompno wanyak hanyhato wandfa hanymomm nd Jisasrhu tndh mrokfom. 3 Ndnatn na to inji kanga ni Tiofilusnpno awandfakahann, akfo nuhas hik bohik marnyann nd Jisasrhu tndht rhumo nefm. Nd mrokfom kanga akfo nuhasann. Bi tuka nd tu hti hiket yimampno rhuhato wany hik marnyamoyanmn ndnatn kanga awandfa nuhasann. 4 Tamoh mrokfom ni bingot wanyafmom, nda na wandfayuk mrokfefm htiruhann, mirahn, “Dajohmn, nd na wanyafmo mrokfot tu mrokfot wanyafma.”
Elisabet Jon Baftaisr hiyaumo yuhathu tndhti Mariat Jisasr hiyaumo yuhathu tndht
(Sapta 1.5—2.52)
Sekariar nasakmo yonrhu yuhat mounmotr niahato kfo nuhasmo yuhat
5 Herotr, Judiaroh kingr tohmo yiharn wom yimar tohmor. Rorhu yufat Sekaraiar. Rorn bro Nkifrarhu temperrhu hingrnefm kakitohmourm. Nd temperr tohyuk yimar kutamoumr prisr. Sekaraiar Abiya kuny shofer. Bingot rorhu nkifra Abiyar nd pris hingrneft mfakitoh fnahmort. Sekariar Abiya kuny shofer. Rorhu metthu yufat Elisabet. Rot nhaf inji buga. Rothu nkifram nd pris hingrneft mfakitoh fnahmomt. Rot Eron frikef yuhatn niamot. 6 Sawoh sawohfhu toh nmbuhat hifa tohmoatf, Bro Nkifrar hifa hti yindhormorf. Boririfhu mrokfom rof hifa kak hik marnya-moufm. 7 Nd sawohf tohmoahat be inji yon duhatf tohmouf. Mett nhai yon hiyaurmoat. Sawoh sawohf bi tabo buga hanymof.
8-9 Wom yiha Abiya frikeft tum rhuhato memom, “Wom yimar ayak htanom temperrhu fknihato tarioh mtha inji nayukr.” Ndnatn yimaroh yufa yak nuhasyuk neft namom. Nd neft nahato nd neftn Sekaraiarhu yufat fak nuhasmotm Bro Nkifrarhu temperr yihato tarioh mthayukr. Bingot bi ndhtet neft na hnamoum. To be nd nef yuhatn fak hikmom. Bok yimam nd temperr hingrnamoum. Wommn womhtet hingrnefm hingrnamoum. Tfit wommn womhtet hingrnefm hingrnamoum. 10 To be Sekaraiar temperr fknenihato nd miroh fipam tarioh mthamohat bok met yindarim briahako rhuhato Nkifrarpnonko kfo bruttnamoum. 11 Nd tarioh mthayuk tkitt toh hasetrn Bro Nkifrarhu mounmotr niamorn, nd tarioh mthayuk tkitt tirmifko mitohmor. 12 Be wom Sekaraiar inji htihato yafotha duhatr rhumor. 13 Nd mounmotr sinyahato kfo memor, “Sekaraia, ni mirahn aduka yanhoya. Ni kfo bruttnamohat bi wanymoyann. Nd ninhu met Elisabett, be yonr hiyauhirahtn. Yon yindarir hiyauhiruhattn, yo yufat wayutatwanr Jonr. Bro Nkifrar rorn bro yufat htarahr. 14 Ni inji htiruhann, ninhu yima yuhur be yifa marnya-ruharn, yindhorrahrn. Bok met yindarim ror htihato be yindhorrahm. 15 Rorn Bro Nkifrar bro yufat hirahrr. Nhai wain bupami yima thu hamumet bupam yeruhatr. Yuhre mmemthu yatit ruhetrn, bi nd Bro Nkifrarhu Yafothat thu nawohrahtr. 16 Rorn nd Isrer yon kunys tfit yakruharm, tfit turoh Nkifra Yawerpno yak htarahrm. 17 Rorn nd Iraijar hatohmo yafothat mthu nhombraraht. Ror bi Brorhu nyinga yuhat bi tohak hanyruhatr, nitohfi nitohfim tfit niak marnya hakurahm. Yifemrom yak marnya hakurahmm yinemrom. Rorn nd hanyjbornetroh yima yuhum tfit yak marnyarahrm hifa duka hik marnyetrohm kanjo. Bi rorn met yindariroh yima yuhum bi yak marnya haso hanyruhatrm, ee btn Bror nierahr.”
18 Sekaraiar sinyahato mounmotr kfo memorr, “Nd ni kfiwa mrokfot mduka nhiyaktitwant. Sawoh sawohno ndu bi tabou bugayetno, finji wom finji rhuruhano? Wom nefm yak nuhasrahnno, ee duka mirahno awi ndu mrokfot tu kfomif kfot kfomor.”
19 Tawo mounmotr kfo memor, “Na Gabriera. Na Bro Nkifrarpno brbo tohwa. Rorn kfo tkrurefitra, niya ninhu kfot. Tu hifa dborioh kfo nuhas mrokfot hnahuyann. 20 Wawanyn, na kfoyuk mrokfom nhai wany yakiorfonm. Ndnatn be tng mmkn rhurahn. Be nhai ptharuhatn. Nd na kfoyuk yonr bi fnurnire, ee btn tng pthetn rhurahn.”
21 Nd briahako rhu hasoyuk yimam gariti garitihato duka memoum, “Barenko bingot yiyuk yimare to tamohmn riyak hatohwar?” 22 Ktopa kto be tng mmkr fnahnayetrn, hti yak hanymomr. Nhai ptharmor. Be inji tng mmkr fnahnehato be tirrpaye fak nuhasmourm tamoh tamohm. Be yimam inji htiyakhato duka memom, “Ka hwe twehnano Bro Nkifrar hti hanirr. Ndnatn ka mrokfo yafothar fekrr.”
23 Rorhu nd temperrhu hingrna yiham hingrna hanymorn, hingrna tmbhonihato be tfit turhu kmiko yimor. 24 Kto rorhu met Elisabett yon fanett rhumot. Tut inji htihato afo tir yuhut yamm kamongmot. Kfo memot, 25 “Nanhu yon hiyau duhathu yimtna nmbuhat Bror hifa wahtihato yuhuwafmora.”
Mounmotr niahato Mariat kfomo yuhat
26 Elisabetthu yon fanet rhu nmbuhat mounmotr kfo nuhasnimortn, dfik yamm tohnihato 6-yuk yamtpno Bro Nkifrar tfit mounmot Gabrierr kfo tkrurafmorr Galiliko yorhwa taun Nasarethu yinyeft. 27 Nd taunt yorhwa wom met tmahthu yufatpno yimor. Nd met tmaht bi Defit frikef yuhat niayuk yima Josefrpno kfo nanf hanymomt. Nd met tmahthu yufat Mariat. 28 Nd mounmotr rotpno yihato mkfo yindhoraknihato kfo memort, “O bar mete, nine to? O hifa mete, Brorko hifa hti yindhorworn.”
29 Mounmotr inji mkfo yindhoraknimotr, tfit Mariat duka kinyaknihato memot, “Nane finji kfiwura? Hrekrpa ndhtet kfo yindhor mrokfot wanuka.” 30 Tfit mounmotrn kfo memort, “Maria, ni mirahn finji ariduka adukaya. Bro Nkifrar ninn hifa hti yindhorwor. 31 Wanukn, yon fanetn rhuruhann, yonr hiyaurahn. Nd yonrhu yufat wayutatwanr Jisasr. 32 Nd yonr sinya thombat be tu bro yufet yonr tohrahr. Yimam yuta hakurahmr ‘Tu yura myorhekwa Nkifrarhu Yonr.’ Turhu nkidom Defitr hatohmo bro yufat kindo tfit nd yonr Bro Nkifrar nd bro yufat hirahr. 33 Nd Jekof frikeft yutiwa Isrerm, rorn tohukatohrahrm. Rorn toh yukatoh hanyrahrm yiha yiham.”
34 Mariat inji wanyaf hanyhato kfo memot, “Na ndhtet ram duhat meta, to finji kanjone yon faneta rhurhoya?”
35 Tfit mounmotr kfo memort, “Bro Nkifrarhu Yafothar mithu nawohruharn, tu myorhekwarhu bbukeftpno toh hnkokn hmbriruharn, nd yonr thu hmbrirahrr. Bro Nkifrar thu hmbri-ruhatrr, to be ndnatn nd yonr yutarahmr Bro Nkifrarhu Yonr. 36 Wawanyn, ninhu tangiyem Elisabett nhai yon hiyaurmoat, futamoumt nmbit. Arihat ar bi tabou bugayett, to nhai, to bi tfit yon fanetet. Bi 6-pela yamm yimom. 37 Nhai wom tamoh nefthu finji naneft Bro Nkifrar mduka nhiyakkfot.”
38 Mariat inji wanyhato tawo kfo memotr, “Wawanyn, na Brorhu hingrnefroh hingrnayuk meta. Kangr nd ror kfiwa tng yuhatn finji anaya, na nhai mrokfom.” Be Mariat inji kfomott, nd mounmotr htanymortn yimor.
Mariat, Elisabett yi htimo yuhat
39 Mariat mounmotr htiyafohato kto rorhu mongkorn rot bmbri Judako yimot. Kminysofm muh wohne fnahhato mifnahmot nd Sekaraia sawohf rhumo kmitn. 40 Mifnahhato yimot Sekaraia sawohf rhumo kunysn. Kunys fkneni-hato Elisabett rhu hasettn rim kfo yindhoraknimott. 41 Rim kfo yindhoraknimott, nd Elisabetthu yatit rhuyuk yonr ka nd yindhor mrokfot rim pthaknimott, ror riyindhorhato ridbuhatokmor yiro yatitn. Bro Nkifrarhu Yafothar yawihnamorn, Elisabettn mithu nawohmor. 42 Mithu nhombramotrt, yimat bro yindhor yima yuhur yakhato Mariat masat kfo ptha memott, “Metroh mkukort be ni Mariann Bro Nkifrar yak marnya bomarnyarahr. Yo nd yatit rhuyuk yonr, ror inji buga yak marnyarahrr. Rpat nimehetfn yak marnyarahrfn. 43 Na ndhtet met furapaya, to tamohmpno ar Brorhu mmemt tfit nanpno wanies? 44 Wawanyn, Maria, na ninhu yarim kfo yindhorakna tngt wanyhato nanhu yatit rhuyuk yonr, ror nd kfo yindhor tngt wanyhato ror rpat riyindhorhato yiro yatitn ridbuhatok yindhorrio.” 45 Elisabett sinyahato Mariat kfo memott, “Maria, Bror mikfo tanyuk mrokfom ni hifa wany yakiowonm. Ndnatn yak marnya bomarnyarahrn.”
Mariathu yindhor yima yuhur
46 Mariat wanyhato kfo memot,
“Nanhu yima yuhur Brorparnko yindhorwor.
47 Nanhu yima yuhur na minrfa htiyekwa Nkifrarpar yindhorwor.
48 Na rorhu hingrnefm hingrniwa met furapaya.
Nhai marimor met furayet. Nhai.
Nanhu rhu nmbuhat htihato hti yuhuwafmora.
Arihami kto bok met yindarim na nda Bro Nkifrar yak marnyewa nmbuhat htiruhamn,
kfo yindhorrahmt nanhu yufat.
49 Bro bbuka nanyjaret Nkifrar be tu hifa fak htamora.
Ndnatn nanhu yima yuhurio rorhu yufat be inji tahirhut rhuraht.
50 Arihat tohwa yimami kto tohruha yimam
be rorparhu duka yanhowefrpar tohhato
rorhu yinhit tohruhamn,
rorhu yuhuwafneft be romn rhuraht.
51 Nd yimam turoh yufam yura yura htamoam,
rorhu bbuka nanyjaret tirm thu yukehato
bi fak thumorm.
52 Nd king yufam tohet yimam bi wuyak thurakmotrm,
tfit nd yufapa duha yimam bi mfrfnahnimom.
53 Yatinohetmn nd hifa hifa shrm bi thu rmonhemor,
tfit nd bok wusketm brioh hti marsisafomorm.
Nhai wom tamohm hiyafhato yakitohakrmom.
54 To be ndnettn nd kfo tahi mrokfot bi ruhettn niamor.
Niahato turhu hingrna yimam, kutewumm Isrerm, yuhuwafmorm.
55 Bi bingot Bro Nkifrar Abrahamrpno rikfak memor,
‘Rorhu mongko sinyahato toh hanyuk yimam yiha yiham yuhuwaf hakuruhanm.’ ”
56 Mariat husfirpa yamm Elisabettpno toh tanyhato tfit tuthu kmiko yimot.
Elisabett Jonr hiyaumo yuhat
57 Elisabetthu yon fant hatoh hanymott, yon hiyau yiharn yon yindarir hiyaumot. 58 Rothu yifa mndarm inji htihato kfo yindhorhato kfo memom, “Bro Nkifrar hifa hti yuhuwafmort.”
59 Nd yonr mharhuhato namba 8 dei kfotn yonrhu tha puk thut niamom. Tha puk thunihato yufat memom, “Yifem Sekaraiarhu yufatn tfit hmbrenomr.” 60 Tfit tu yonrhu mmemtn warhuhato kfo memot, “Mirahko wom yufat ayutanomr. Jon yufatn wayutatwakomr.” 61 Tfit rom kfo memomt, “Nd ni kfiwa Jon yufat nhai ninhu tangim yuta hnarmomt nd yufat.” 62 Be inji nna kfonihato memom, “Ka tu yon yifemrn yonrhu yufat yuta nuhasrahrnom.” Ror tng mmkrn btn tire yak nuhashato memoumr, “Yon yufat wayuta nuhasnnom.” 63 Sekariar memorm, “Slet mkut wahne hikma.” Slet mkut hnamotmt, Jon yufat wandfa nuhasmorm. Wom yimam inji htihato memom, “Mamai! Ndart tu be womhtet neft hrekrpa htitwonom.” 64 Yufat wandfani hanyhato ee tort rigrhakhato Bro Nkifrar rikfo ptha yindhor boyindhorakmor. 65 Sekaraiarhu kmi thofm nd ror namo neft wahtiyafo-mohat nhai wom yafothetm rhurmom. Nd Sekaraiarpno rhumo nefthu mrokfot nhai brbo wom warhu hasormot. Judiakorhof kminysofm rhuyuk kmi bugam wany bugamomt. 66 Nd yonrhu mrokfom wany hanyuk yimam wanyhato bok dukefm yakmoamn, duka memoum, “Nd yonre warhoni thofte nko finji kanjohot yimar tohruhar?” Rorhu sinya nmbuhat be Bro Nkifrarhu tirmn fak hta bohtamomr. Ndnatn inji duka nhtamom.
Sekaraiarhu kfo yindhor yuhat
67 Be tfit nd yonrhu yifem Sekaraiar Bro Nkifrarhu Yafothar mithu nawohmotrr, Bro Nkifrarhu mrokfom pthamorm. Kfo ptha memorm, 68 “O Tunga Nkifrar, arnat bi turhu yon kunys yukatohwarn, be arihatn tfit yak marnyarahrnom. 69 Turhu hingrna yima Defitrhu frikef yuhathu yimar bi yak htarorn, nom be rorn minrfa htiyakrahrnom. 70 Bingot bi turhu dborioh profetmpno pthamo yuhatn yak hikhato kfo tkrurafmotrr, niamor. 71 Bi rompno bi kfo hta memor, ‘Nanhu yon kunys yahr kmiroh buha yorhwamn, be hti srhasiwumm. Yirhoyann, miyak htiyakruhanm.’ 72 Bingot tohmo nmoh nkifram ror yuhuwafmormn, fakmorm. Bingot ror kfo tahimo mrokfot yuhre duka hanitrt. 73 Bi bingot tunmoh nkifra Abrahamrpno kfo tahimo yuhatn hikwarn, kangr, ‘Aminrfa htiyakkahanm, tfit tukianhu hingrneft yak htaruhanm. 74 Tukianhu hingrneft tohruhamn be nhai wom yakrmiruhatm. 75 Be yiha yiham nanhu yufa yuhat tohruhamn toh marnya bomarnyarahm.’ 76 Ni nda yonn, kto yutarahmn yura myorhekwa Nkifrarhu profetn. Ninn Brorhu nyinga yuhat tohak hanyruhann, rorhu nia yuhat bi ninn yak hta bohta hanyrahnt. 77 Bi ninn yiruhann, kfo mirahnm, ‘Bro Nkifrar nikmoh fasoh fasoh nefm yak thuhiruharko toh marnyarahko.’ 78 Tunmoh Nkifrarhu yuhuwaf nmbuhatn bro nukafat hirahrnom. 79 Nd yiro kspitat rirhuyukmio yo nd bro yihotar yauwam, rom nd nukafat nieruhatn, nukeft hirahtm. Nmoh yau nmbuham rorn yak htaf hanyruhatrnom, be hifa nd hifa noh hmbre yima yuhurn yaurahnom.”
80 Nd yonr warho hanymor, rorhu dukefm rpat yimarpno warho hikmom. Be nd yonr nd yima toh duha bbinysoft toh hanyhato be Isrerko tohyuk yima bugam hti hik bugamomr rorhu nd dborioh dukefr yo rorhu toh nmbuhat.