Bawula-langwa jurra ni-larrka-mirra
Warning-Ebijiju-wa Warni-mamalya
Nakina Bawula n-arrkarranguma ayakwa God-langwu-wa warni-mamalya wurriybina nuw-ambilyi-mirru-wa Ebijija-manja. Akwa nani-makama kuw-ambilya-mulangwa wurrakina wurru-wurrakawurama Jesus Christ abirruwa. Wurrakin-eka kuw-angk-ingki-rrikajama ngawa Jesus Christ ni-lyalyingminu-mulangwa abirruwa. Akwa ngarningka kuw-angk-ingki-rrikajama ni-marngkirra-dinu-mulangwa nakina Jesus abirruwa-manja akwa nani-mini-yakuwabiju-wa-mulangwa awurru-wurrariya ebina na-yama-mulangwa.
1
Ngayuwa ningena Bawula ning-arrkarranama enena-manja jurra kajungwa ki-larrkaji yada enena nungkwurruwa-wa God-langwu-wa karni-mamalya, kirriybina kirr-ambilya-mirruwa Ebijija-manja. Anaja God nu-wekbalyinuma ngayuwa ning-aniki-larrki-larrka kajungwa kini-minu-wardani yada warka Jesus Christ-langwa. Kembirra enena ayakwa nganja ning-arrkarranama aduwaba nungkwurruwa-wa kirriybina kirru-werrik-ambilya-mirruwa Jesus Christ-manja.
Ngarra-ngayindanama Nungw-anyungwa God akwa ngawa Jesus Christ ngakwurra-langwa nu-Bungkawa kani-marngkirra-dinama wunalakina nungkwurruwa-manja karni-mamalya kirriybina kirr-ambilya-mirri-manja Ebijija-manja. Akwa ngarra-ngayindanama wunalakina yikabi-mini-lyurrkwa-kinama nungkwurra-langwa yukwudukwuda.
Aning-iningaba-langwa ngarranu-wekbilyangu-mulangwa God
Ngani-yang-marngkwa-jina God, niybina-mirrada God akwa Nungw-anikba nu-Bungkawa-langwa Jesus Christ-langwa. Ni-marngkirr-eka nakina, akwa ngarranu-wekbilyangi-mirra aning-iningaba ena-langwa-langwa angalya abalkaya. a-mirntak-akina aning-iningaba ngarranu-wekbilyangi-mirra ngakwurra-langwa-langwa ngarni-mawurrna, mana ngakwurruwa ngarri-yakayinama ngarna ngarru-wurrakawurama Christ arakba da.
Arakb-irakba-kiya-wiya nara-wiya kini-ngekbiraka anaja God a-mirntak-enena angalya, nu-wekbalyinuma nakina ngakwurruwa ngarna ena-langwi yada ngarni-mamalya. Nu-wekbalyinuma ngakwurruwa ngarri-yakayina-mulangwa ngarna ngarru-wurrakawurama Christ. Akwa God ngarrani-ngayindanama kini-min-ayabijaba-kajungwuni yada ngarna ngarni-mamalya akwa ngarru-werri-ngekbirni yada. Ni-lyalyingminama nakina angwurra ngakwurruwa ngarni-mamalya. Biya kembirra arakb-irakba-kiya-wiya God ni-lyangku-werri-bika-jingwunuma naniki-rukwamalyi yada ngakwurruwa akan-anibi-kina-mulangwa Jesus Christ. Enena-bina God ni-ngayindanguma adinuba-wiya, akwa amin-akina-langwa ni-yakirrerri-dinuma nakina.
Ngakwurraja ngani-yang-marngkwa-jina arakba God-uwa, mana ni-marngkirr-eka ni-lyangma nakina akwa ngarranu-wekbilyangu-mubaba Nanikw-anikba Jesus Christ, niybina ni-lyalyingminama angwurra nakina.
Anaja Christ ngarrani-mini-jungwunuma nakina. Ngarrani-minu-kwularri-juwama merra ena-langwa akwa ngarren-anjungwurranguma ngakwurruwa. Anaja kembirra God ngarrani-mini-yakwabijuwama awurru-wurrariya ngakwurra-langwa. Ni-marngkirra-dinam-eka ngakwurruwa-manja. Yaw-eka, ni-marngkirra-dinam-eka ngakwurruwa-manja ngarni-mamalya.
Nakin-eka God aringkawa ni-lyangma nakina. 9-10 Amin-akina-langwa kembirra arakb-irakba-kiya-wiya ni-lyangku-werri-bika-jingwunuma adinuba-wiya kanu-bungkawa-kina-mulangwa Christ nu-bungkawa. Akwa ni-lyangki-yamama nakina, “Ngayuwa kinu-bungkawa-kinama Christ, akwa n-arum-eka nu-bungkawa ni-mikbiyiya-dangwa kin-ambilyama nakina.” Kinu-bungkawa-dinam-eka nakina ababirna-manja, a-mirntak-enena-manja nganyangwa-manja angalya abalkaya akwa ngawa a-mirntak-angaba-manja a-wurra-kwulyumida-manja angalya arrawa-manja, ni-yamama God nakina. Akana ngakwurraja ngarna ngarni-mamalya ngarn-ingbala-wiya ambaka akina ayakwa ena-langwa. Bi...ya kembirra arija-langwa anaja God n-abilyerri-kajungwunuma arakba nakina akwa nani-larrkama Christ ngakwurruwa-wa enenu-wa angalya. Enena-bina ni-ngayindanguma nakina akwa nanaki-yakirrerri-kama. Akwa kembirra ngarran-aningmi-kama arakba akina ayakwa kanu-bungkawa-kina-mulangwa nakina Christ nu-bungkawa.
Dukwa ngambi yada God kanu-bungkawa-kinama Jesus Christ nu-bungkawa? Ngarn-ingbala-wiya ambaka ngarna, imba anaja God n-aningma nakina. Imba ngarningma ngarna amandangwa God kanu-bungkawa-kinama Christ nu-bungkawa ababirna-manja.
11-12 Ebina-wiya yirraja yarningi-Judiya yarni-mamalya, yirriybina yirru-werrik-ambilyuma God-manja, yirri-yakayinuma Christ yirru-wurrakawurama. Imba akini yada anaja God nu-wekbalyinuma yirruwa ena-langwi yada yarni-mamalya, mana arakb-irakba-kiya-wiya ni-lyangku-werri-bika-jingwunuma arakba akina. Nakina-bina anuwa nu-wardi-kinama ababirna-langwa ena-langwa-langwiya mangma. Kembirra nu-wekbalyinuma yirruwa, yirriybina yarn-ingadinuba-wiya yirru-werrik-ambilyuma Christ-manja, kajungwa yikini-yang-marngkwa-jini yada yarna anuwa-wa. Yirr-akin-eka kembirra yikini-yang-marngkwa-jinama God-uwa mana nu-kwilyiban-eka ni-mirnta-ngekbirna ni-lyangma nakina.
13 Imba nungkwurr-ajukwaba God-langwa karni-mamalya kirrakina. Nungkwurr-ajukwaba kirr-engkirrkenuma ayakwa alyangmandukwuna, ebina aningaba ayakwa Christ yikan-anibi-kina-mulangwa. Nungkwurr-ajukwaba kirru-werrik-ambilyama arakba Christ-manja aduwaba kirrakina. Adinuba-wiya anaja God ni-yarrk-akumarna ena-langwa ayakwa akwa ni-yamama nungkwurruwa-wa, “Ka-kwunama ngayuwa Aningaba Amawurrna nganyangwa nungkwurruwa-manja kajungwa ka-jirrkima-kajungwuni yada nganyangwa-manja karni-mamalya,” ni-yamama nakina. Kembirra kirranu-kwama amandangwa da.
14 Ngakwurraja ngarningma ngarna God ngarranu-wekbilyanguma arakba ngakwurruwa-wa ena-langwu-wa ngarni-mamalya Amawurrna ena-langwa. Amin-akina-langwa kembirra ngarningma ngarna akanu-wekbilyanama nakina ngarningka aning-iningaba-wiya ngakwurra-langwa-langwa ngarni-mawurrna, akwa akan-anjungwurranama ngarrakina ngarning-angkawura. Kembirra ngani-yang-marngkwa-jina arakba God mana nu-kwilyiban-eka ni-mirnta-ngekbirna ni-lyangma nakina.
Ni-biriyaminu-mulangwa Bawula God-uwa
15-16 Amin-akina-langwa, a-mirntak-iybina-langwa ayakwa ningi-yangbinu-mulangwa ngayuwa nungkwurruwa-wa, ningen-eka ningani-yangmi-yang-marngkwa-jinama God-uwa aduwaba, kirru-werrik-ambilya-mulangwa nu-Bungkawa Jesus-manja kirrakina karni-mamalya. Ebina-wiya, kirru-werrik-ambilyi-manja adinuba-wiya nu-Bungkawa Jesus-manja kirrakina, abirraja bi-makama warni-mamalya ayakwa nungkwurruwa-langwa. Na-yamama, “Warna warning-Ebijija warni-mamalya na-lyalyingminam-eka wurr-ababirna-langwa warni-mamalya God-langwa,” na-yamama bi-makama. Akini yada ngawa nganja ningani-yang-marngkwa-juwama ngayuwa God-uwa, akwa ningi-yaminjamama ngawa ningani-yang-marngkwa-juwama anuwa-wa akina-langwa yanda-langwa aduwaba. Akwa ngarningka ningi-biriyaminama ngayuwa God-uwa nungkwurruwa-langwa. 17 Nakina-bina nu-Bungkawa-langwa Jesus Christ-langwa God. Nungw-anyungwa nakina akwa n-arum-eka ni-mikbiyiya ni-lyangma. Kembirra ningani-yangki-labajama ngayuwa kajungwa yikanu-kwuni yada milyanjirra mangma, akwa kin-abilyarri-kajungwuni yada kajungwa yik-aningmi-dini yada angwurra God kirrakina. 18 Akwa ngarningka ningani-yangki-labajama God kajungwa yikani-minu-ngwurrkbali-jini yada nakina nungkwurra-langwa mangma iya yukwudukwuda, kajungwa yiki-marngki-rringkini yada ena-langwa alarr-adada kirrakina. Akwa ngarra-ngayindanama ngayuwa nungkwurruwa yiku-werrik-embirrarini yada God-uwa akwa ngarningka yik-aningmi-dini yada nungkwurruwa akanu-wekbilyana-mulangwa God ababirna-langwa aning-iningaba ngakwurra-langwi yada ngarni-mawurrna. Akanu-wekbilyanama nakina aduwaba akwa aning-angkawura.
19 Ngarra-ngayindanam-eka nungkwurruwa yik-aningmi-dini yada God-eka nakina n-arrubuda ni-lyangma. Nara wurriybina wurru-kwala wurr-arrbida wubirra anuwa. Nakin-eka n-arrubuda akwa akani-yngbudirr-kinama ngakwurruwa ngarriybina ena-langwa ngarni-mamalya. 20 God n-arrbid-eka nakina nan-anibi-ka-mulangwa Christ. Akwa ngarningka n-arrubuda nakina nanu-wirti-juwa-mulangwa Christ karrawara ena-langwa-manja angalya abalkaya. God nakina nan-ambarr-juwama Christ n-ekbuda-langwa-langwa, mana Christ n-arum-eka ni-mikbiyiya ni-lyangma nakina.
21 Abirraja warning-errbirra wurru-bu-bungkawa wurr-arum-uruma wurru-mikbiyiya wurrakina. Mama wurru-mikbiyiya wurrakina, anaja Christ n-aruma nakina ni-mikbiyiya angwurra. Nu-bungkawa-dinama naning-angkawura nakina wurr-angkwulyumida-manja wurr-amukwiyad-akina-manja wurru-bu-bungkawa wurriybina nuw-ambilya-mirri-manja karrawara akwa ngawa amirnt-akayina-manja angalya arrawa. Akwa aykirra ena-langwa amikbiyiya angwurra, mana anuwa nakina ni-mikbiyiya baba angwurra. Ni-mikbiyiy-eka nakina aduwaba akwa naning-angkawura. 22 Anaja God nakina nan-akimirnuma Christ nu-Bungkawa ababirna-manja. Ngarranu-kwama nakina ngakwurruwa-manja kajungwa kinu-bungkawa-dini yada ngakwurruwa-manja ngarriybina ngarr-ambilya-mirri-manja God-langwa. 23 Akana anaja Jesus Christ nara ambilyuma n-akwukawura, imba ngakwurraja ngakwurruwa God-langwa ngarni-mamalya wubirra laka ena-langwa nani-madangkwa ngarr-ambilyama ngarru-wurrakawurama. Imba nakin-eka Christ n-ambilyama ababirna-manja angalya akwa nu-wardanama ena-langwa warka ababirna-manja angalya.