Jenijija
Enena jurra ngarraki-makinama alawudawarra ni-ngekbiraka-mulangwa God, niybina Yaweya nani-miykirra, ababirna-langwa angalya yiya akwalya-mirrya yiya amarta-mirrya akwa ngawa warni-mamalya. Akwa ngarraki-makinama ngarningka wurru-kwala-langwa warni-mamalya akwa abirra-langwa-langwa warni-mamalya, Eduma-mirrya-langwa, yiya Nawa-mirrya-langwa, yiya Abiriyama-mirrya-langwa, yiya Ajika-mirrya-langwa akwa ngawa Jekaba-mirrya-langwa. Ngarraki-makinama ngarningka warni-mamalya-langwa na-werrik-ambilyu-mulangwa God-manja, akwa God nani-mamirika-juwa-mulangwa arrkala abirruwa-manja, akwa ngawa nan-ambirra-juwa-mulangwa wurrakina-manja kajungwa arrkala ka-werrik-ambilyi yada angwurra anuwa-manja wurrakina da.
1
God Naniki-ngekbi-ngekbiraka-langwa
Adinu...ba-wiya arakbirakba-kiya-wiya nakin-eka God ni-ngekbirakama amirntak-enena angalya arrawa yiya a-mirntak-angaba angalya karrawara. Imba adiniba-wiya n-abirradadangu-wiya nakina, ni-ngekbiraka-manja enena angalya, akini yada ngawa akungwa-wiy-eka nuw-ambilyuma. Akina akungwa na-wurmbi-juwa-mirra imba nara ebina akwala yakwijina kuw-ambilya. Nara ambaka ebina ariba imba akungwa-wiya yimbukwa akina nuw-ambilyuma akwa na-larri-mirdinum-eka akina ngawa. Wubirra laka numu-ngwurri-mirdinama miybina medirra alyarrngwalyilya arrawa, na-yamama akina. Imba ngalaja amawurrna God-langwa na-lyikbinuma akina karrawara-langwiya akungwa-manja da.
Anaja nakina God ni-yangbinuma arakba ayakwa. “Aki-larradiya,” ni-yama nakina. Ngalaja kembirra alarr-adada na-jadinga arakba akina da. Biya nakina God n-andiyaya akana ni-rringka akina alarr-adada a-kwilyiban-eka. Biya kembirra n-ayabijaba-ka arakba nakina alakina-kiya alarr-adada akwa ngawa alarri-mirda. Biya kembirra nakina ni-yangbija alarr-adada “Maningilida” imba ngalaja alarri-mirda “Alyarrngwalyilya”. Biya na-lyarrngwalyilya-da arakba akina. Bi...ya maning-adinuba-wiya marrnga nimi-jarrida arakba makina da.
Biya kembirra na-ykbada arakba. Wurtarrya-wiya akina. Biya ngarningka nakina God ni-yangbina ayakwa. “Aki-yabijaba-kaja akungwa ngaluwa amungwukungwa, ekuwarra karrawaru-wa, imba ngalaja ekuwarra arrawa-manja,” ni-yama nakina. Biya kembirra n-ayabijaba-ka ebina akungwa aning-arrawa-langwa yiya aningi-karrawara-langwa kajungwa a-ringbirra angalya kuw-ambilyi yada wilyarra. Biya ni-yangbi-juwa nakina God akina a-ringbirra angalya “Angwubina.” Biya na-lyarrngwalyilya-da arakba akina. Bi...ya m-ambilyuma marrnga nimi-jarrida arakba malakina da.
Biya kembirra na-ykbada arakba. Wurtarrya-wiya akina. Biya ngarningka kembirra nakina God ni-yangbina ayakwa. “Akungwa aki-mirntukwuna a-wurrakawurra-mirra,” ni-yama, “kajungwa kuw-abilyarri-kajungwuni yada ajiringka,” ni-yama nakina. Kembirra na-mirntukwunuma arakba akina akungwa. Imba ngalaja ajiringka nuw-abilyarri-kajungwunuma akina. 10 Biya nakina God ni-yangbi-juwa akina ajiringka “Ariba.” Imba akina akungwa ebina na-wurra-mirntukwunuma nima-yangbi-juwa “Makarta” nakina. Biya kembirra n-andiyaya nakina akana ni-rringka ariba akwa ngawa makarta a-lirraku-kwilyibana-kiy-eka alakina da.
11 Biya ngarningka kembirra nakina God ni-yangbina ayakwa. “Ariba ak-arrangbina eka amini-miniyngka akwa ngawa amarta amini-miniyngka,” ni-yama nakina. “Akina amarta kuw-arrangbinama amadidira a-manhinga imba ngal-ajukwaba eka amini-miniyngka kuw-arrangbinama a-mamamuwa a-manhinga,” ni-yama nakina. 12 Ngalaja kembirra akina ariba nuw-arrangbama arakba eka-mirrya akwa ngawa amarta-mirrya. Biya nakina God n-andiyaya akana ni-rringk-eka amirntak-akina eka-mirrya akwa ngawa amarta-mirrya a-wurraku-kwilyiban-eka. 13 Biya na-lyarrngwalyilya-da arakba akina. Bi...ya m-abiyakarbiya marrnga nimi-jarrida arakba makina da.
Biya kembirra na-ykbada arakba. Wurtarrya-wiya akina. 14-15 Biya ngarningka kembirra nakina God ni-yangbina ayakwa. “Aki-jadiya aki-larradiya angwubina-manja alarr-adada,” ni-yama. “Aki-larrk-abarraka-jiya enena-manja angalya, kajungwa m-ayabijabi yada malakina-kiya maningilida akwa ngawa m-aning-alyarrngwalyilya akwa kajungwa m-ayabijabi yada maningilida m-ababirna-langwa. Kimi-yuwayinama malakina-kiya maningilida akwa ngawa m-aning-alyarrngwalyilya mu-wilyu-wilyaba-wiya ma-mirntak-akina. Akwa ngarningka aki-larrk-abarraka-jiya enena-manja angalya, kajungwa ayabijabi yada akilarrki-mamariyka akwa ngawa akilarrk-inungkwura. Ka-yuwayinama alakina-kiya akilarrki-mamariyka akwa akilarrk-inungkwura a-wilyu-wilyaba-wiya ngawa amirntak-akina ngal-ajukwaba,” ni-yama nakina God.
16-18 Biya kembirra nakin-eka God ni-lirraki-ngekbirakama ambilyuma-kiya alarr-adada adurrngwarna-kiya. Nima-ngekbirakama mamawura akwa nim-akimarnuma makina karrawara angwubina-manja, kajungwa kimi-larrk-abarrirra-kini yada makina enena-manja angalya akwa kimi-bungkawa-dini yada maningilida-manja makina. Biya kembirra nakina ni-ngekbirakama yakina yimawura akwa n-akimarnuma ngal-ajukwaba yakina angwubina-manja kajungwa kini-bungkawa-dini yada yakina m-aning-alyarrngwalyilya-manja. Biya ngarningka nanga-ngekbirakama du-wurra-kwilyimid-eka dakilyingajanga nakina. Ni-lirraki-ngekbirakama nakina alakina-kiya alarr-adada adurrngwarna-kiya kajungwa ayabijabi yada alarradada-langwa yiya alarri-mirda-langwa. Biya kembirra n-andiyaya nakina akana nima-rringka mamawura yiya yimawura yiya dakilyingajanga-mirrya a-wurraku-kwilyiban-eka akina. 19 Biya na-lyarrngwalyilya-da arakba akina. Bi...ya m-abiyarbuwa marrnga nimi-jarrida arakba makina da.
Biya kembirra na-ykbada arakba. Wurtarrya-wiya akina. 20 Biya ngarningka kembirra nakina God ni-yangbina ayakwa. “Akwalya ababirna amini-miniyngka aki-lyangburrkwa-jiya makarta,” ni-yama. “Imba ngalaja abalkaya angwubina-manja wurrajija ab-angkirrayina,” ni-yama nakina. 21 Kembirra ni-ngekbirakama nakina adi-durrngwarna akwurrangina yiya dinungkwulangwa yiya alyakilya-mirrya, akwa ngarningka akwala engka yiya engka akwalya ebina na-lyangburrkwa-juwama makarta. Akwa ngarningka wurrajija-mirrya abirr-ajukwaba nani-ngekbirakama nakina. Biya n-andiyaya nakina God akana ni-rringka amirntak-akina a-wurraku-kwilyiban-eka akina. 22 Biya ni-yangbinuma ayakwa aningaba nakina God akwalya-mirrya-manja akwa wurrajija-mirrya-manja. Ni-yama akwalyu-wa, “Wurr-arrangbi-jayina akwa wurrima-lyangburrkwa-jiya makarta,” ni-yama. Imba ni-yama wurrajija-wa, “Nungkwurr-ajukwaba wurr-ababirna-dina,” ni-yama nakina. 23 Biya na-lyarrngwalyilya-da arakba akina. Bi...ya m-amangbala marrnga nimi-jarrida arakba makina da.
Biya kembirra na-ykbada arakba. Wurtarrya-wiya akina. 24 Biya ngarningka kembirra nakina God ni-yangbina ayakwa. “Aki-jadi-jiya ajiringka yi-mini-miniyngka yinungwungwangba yiya yingarna-mirrya, y-adi-durrngwarna akwa ngawa ngal-ajukwaba yi-yukwayuwa,” ni-yama nakina. 25 Kembirra ni-ngekbirakama nakina yi-mini-miniyngka yinungwungwangba yiya yingarna-mirrya, yu-kwala y-adi-durrngwarna imba yu-kwala yi-yukwayuwa. Biya kembirra n-andiyaya nakina akana ni-rringka yi-mirntak-akakina yinungwungwangba-mirrya yu-kwu-kwilyibana-eka yakina da.
26 Biya ngarningka kembirra nakina God ni-yangbina ayakwa. “Ngakwurruw-eka ngarna aka-ngekbirakinama warni-mamalya,” ni-yama. “Imba ngakwurruwa wubirra ka-yaminama wurrakina. Akwa ka-bungkawa-dinama wurrakina akwalya-mirrya-manja yiya wurrajija-mirrya-manja yiya yinungwungwangba-mirrya-manja akwa yingarna-mirrya-manja wurrakina warni-mamalya,” ni-yama God nakina da.
27 Biya kembirra arakba nani-ngekbirakama nakina warni-mamalya. Nani-ngekbirakama wurrakina warni-mamalya wubirra anuwa God. N-anungkwarba akwa didarringka nani-lirraki-ngekbirakama nakina. 28 Biya kembirra ni-yangbinuma nakina akwala ayakwa aningaba. Ni-yama abirruwa-wa, “Wurr-arrangbina wurri-yukwayuwa, akwa kembirra ambaka-mirra abirr-ajukwaba kuw-arrangbi-jayina, kajungwa kuw-ambilyi yada angalya-manja akwa ka-bungkawa-dini yada ebina-manja angalya wurrakina,” ni-yama nakina. “Yiku-bungkawa-dinama kirrakina akwalya-manja yiya wurrajija-manja akwa yinungwungwangba-manja kirrakina.
29 Ngarra-mini-ngekbirakama ngayuwa engka yiya engka anhinga-mirrya, ebina amadidira nuw-arrangbinama amarta, akwa ngarningka ebina a-manhinga nuw-arrangbinama eka yik-alyibarini yada kirrakina. 30 Imba ngayuwa ninganu-kwama amarta yinungwungwangba-mirrya akwa ngarningka wurrajija-mirrya abirra-langwi yada anhinga,” ni-yama God.
31 Biya n-andiyaya nakina God akana ni-rringka amirntak-akina ni-ngekbirakama nakina aning-iningaba a-kwu-kwilyiban-eka akina. Biya na-lyarrngwalyilya-da arakba akina da. Bi...ya m-amangbala mu-wilyaba marrnga nimi-jarrida arakba makina da. Biya ngarningka na-ykbada arakba. Wurtarrya-wiya akina da.