Janjana
1
Niybina-mirrada ngarrani-min-abilyarri-ka-mulangwa God ngakwurra-langwi yada
Adinu...ba-wiya arakb-irakba-kiya-wiya n-ambilyu-mirra anaja nakina Jesus Christ niybina ngarrani-min-abilyarri-kama n-abuwarrka-jungwunu-mulangwa God ngakwurra-langwa. Nara-wiya ambaka nakina God kini-ngekbiraka a-mirntak-enena angwubina yiya angalya, akini yada ngawa nakina-mirrada n-ambilyu-mirra arakba God-manja. Biya nakina-mirrada akwa God wunalakina wuni-di-dirrbira-kiya ngawa da.
A...rakba-wiy-eka adinu...ba-wiya n-ambilyuma nakina-mirrada God-manja. Anaja nakina God ni-ngekbirakama angwubina-mirrya yiya angalya-mirrya yiya warni-mamalya akwa an-ajukwaba nakina-mirrada ni-ngekbirakama a-mirntak-enena nanu-ngwunyirrkwa-juwama wunalakina wuni-di-dirrbira. eng-kwilyimida-langwa aduwaba ngakwurraja ngarri-rringkinama ngarna ngarni-mamalya, wunalakina nani-ngekbirakama nakina-mirrada ngawa akwa God.
Nakin-eka kani-min-abilyarri-kinama n-abuwarrka-jungwunu-mulangwa God warni-mamalya-langwa akwa kan-anibi-kinama warning-angkawura wurrakina. Wubirra-kiya wurrakina nani-min-abarraka-jinama bajananga alarr-mirda-manja warni-mamalya-langwa warniki-rringki yada dirrbira, ngalaja ana-langwa ayakwa nuw-abilyarri-dinuma warniki-muringki yada ngawa dirrbira anuwa-langwa. Wubirra-kiya bajananga ebina nuw-abarraka-jinama ngawa akina-manja alarr-mirda, nakina-mirrada-bina ngawa ni-yaminjamama nani-min-abilyarri-kama God warni-mamalya-langwa. Abirraja wurru-kwala narrima-ditanguma abirra-langwa mada akana wurrakina mirrada ngawa nara kani-ngwanja-juwa nakina kani-min-abilyarri-ka n-abuwarrka-jungwunu-mulangwa God wurru-kwala-langwa.
Imba anaja nakina God nani-larrkama nu-wilyaba n-anungkwarba enenu-wa angalya. Nani-miykirra nakina Janjana. Biya ni-likanuma nakina ngarni-mamalyu-wa naniki-maki yada a-mamalya alyangmandukwuna ayakwa Jesus-langwa niybina-langwa nani-miykirra Naniki-larrk-abarraka. Biya ngarrani-makama ayakwa kajungwa ngarr-ababirna-langwa ngarni-mamalya aku-werrik-ambilyi yada nakinu-wa Naniki-larrk-abarraka. Nar-eka nakina Janjana Naniki-larrk-abarraka imba niybina nani-larrkama God yangkwurrangwa naniki-mini-yangbi yada ayakwa nakina-langwa Naniki-larrk-abarraka. Nakina Naniki-larrk-abarraka ni-yirrbiyirrba ngawa ni-yangbi-yangbinama alyangmandukwuna ayakwa akwa ni-likanuma ngarni-mamalyu-wa enenu-wa angalya, kajungwa kuw-abilyarri-dini yada ana-langwa ayakwa ngarniki-miringki yada ngawa dirrbira God-langwa ngarri-mirntak-ayina.
10 Abirnaja wunalakina nakina-mirrada akwa God nani-ngekbirakama ababirna-langwa. Biya nakina-mirrada ngawa ni-likanuma yangkwurrangwa enenu-wa angalya, biya ngarni-mamalya-manja arakba n-ambilyuma nakina. Akana nara ngakwurraja akini-mi-miringka. 11 Ni-likanuma nakina ena-langwu-wa ngarni-mamalya Ngarningi-Judiya, akana ngarru-waranguma ngarrakina, nara akini-ngayindanga. 12 Imba abirraja wurru-kwala warni-mamalya nani-ngayindanguma nakina, nara ka-waranga imba na-werrik-ambilyuma anuwa-manja. Kembirra ni-yamama wurri-mirntak-iybina-manja warni-mamalya na-werrik-ambilyu-murru-manja anuwa-wa, “Amandangw-eka God-langwa kirri-yukwayuwa yiki-yamini yada kirrakina,” ni-yamama nakina-mirrada. 13 Akana abirraja wurrakina wurri-yukwayuwa, nara ka-yama ka-rukwularrina wubirra wurrakina narr-arrangbinama wurrangariya, akwa nara wurr-irnt-arringba akwa wurri-ngw-arringba karra-rukwularr-juwa wurrakina, imba anaja nakin-eka God, nakina-bina nani-rukwularr-juwama ena-langwi yada wurri-yukwayuwa.
14 Imba anaja niybina-mirrada ngarrani-min-abilyarri-kama n-abuwarrka-jungwunu-mulangwa God ngakwurra-langwa, nani-mamalyi-dinuma nakina wubirra ngakwurruwa. Ni-rukwularruma nu-wilyakama a-madangkwa yiya adidira akwa kembirra n-ambilyuma yalakwa yirri-yak-ayinuma yarni-mamalya-manja. Ni-minababirna akwu-lyalyingma ni-marngkirr-eka nakina akwa ni-yirrbiyirrba ngawa ni-yangbi-yangbinuma alyangmandukwuna ayakwa. Yirraja yirruwa yini-rringkama nakina n-arrbida nu-kwilyibana ni-lyangma, niybina nu-wilyaba-ma Nanukw-anikba ni-likanuma angaliba ena-langwa-langwa Nungw-anikba akwa yangkwurrangwa.
15 Imba anaja nakina Janjana nani-makama alyangmandakwuna ayakwa ena-langwa-langwa warni-mamalyu-wa akwa ni-yama, “Naka-langwa-bina niybina ngarra-makama ngayuwa. Ningi-yamama, ‘Nakina kin-ariji-dinama kini-likajama ngayuwa-manja arija-langwa n-ibukwaya. Narum-eka ni-lyangma nakina nani-mamalya imba nganja n-ingaba-kiya ningena mana nakina n-aning-adinakba arakba n-ambilyuma nara-wiya ngayuwa ki-rukwularrina,’ ningi-yamama,” ni-yama nakina Janjana.
16 Ni-minababirna akwu-lyalyingma ana-langwa akwa ni-marngkirra, kembirra arakba ni-yamama aningaba ngakwurruwa-manja ngarr-ababirna-manja akwa ni-yaminjaminama ngawa aduwaba da. 17 Anaja nakina God nanu-kwama aning-arum-uruma ayakwa ana-langwa nakinu-wa Mawijija. Akana nani-larrka-manja Jesus Christ nanik-animamalyidi yada, anaja kembirra ngarranu-wilyaka-juwama ni-lyalyingminu-mulangwa ni-marngkirra-dinu-mulangwa ngakwurruwa-manja akwa ni-yangbi-yangbinu-mulangwa alyangmandukwuna ayakwa. 18 Arakba-wiya, nar-eka warni-mamalya kani-rringka nakina God. Imba anaja yimbukwa Nanukw-anikba ana-langwa nani-rringkama nakina, mana wuni-di-dirrbira-kiya wunalakina akwa nan-arntaki-lyangba-dama Nungw-anikba-manja. Kembirra Nanukw-anikba ngarrani-min-abilyarri-kama n-abuwarrka-jungwunu-mulangwa Nungw-anikba ngakwurra-langwa ngarnik-aningmi-di yada. Janjana niybina Naniki-mingeki-ngambaja nani-maka-mulangwa ayakwa warni-mamalya-manja Jesus-langwa.
19 Abirraja warningi-Judiya wurru-bu-bungkawa narra-larrka wurri-mirntak-akina wurru-Minida warnungkwarba yiya wurri-Barija warnungkwarba akwa wurru-kwalawarnungkwarba abirra-langwa wurru-Libaya warni-mamalya. Akwa na-likanuma angerrba Janjanu-wa, akwa na-yama anuwa-wa, “Ningki-miyambana ningkena ningk-ani-mamalya?”
20 Anaja Janjana nara kinu-waranga imba nani-mini-lawurraka-ja ayakwa dirrbira abirruwa-wa akwa ni-yama nakina, “Nara ngayuwa ningena ningi-Majaya, ningiybina anaja God ngarrani-maka-mulangwa arakb-irakba-kiya-wiya, ningiybina nu-bungkawa n-aruma,” ni-yama Janjana.
21 Biya, “Ningki-miyambana kembirra ningkena? Elaya na?” na-yama wurrakina.
Anaja ni-yama Janjana, “Nara ngayuwa ningena Elaya.”
“Imba ningki-miyambana na? Jarrya ningkakina ningk-iybina ningk-iyngka-dangwa God-langwa ningk-aniki-maki-maka ayakwa niybina naniki-larrka ambaka-mirra?” na-yama wurrakina.
Anaja ni-yama ngawa, “Nara!”
22 Kembirra abirraja na-yama anuwa-wa, “Yirri-maka arakba! Ningki-miyambana ningkakina? Aba yiki-lawurraka-ji yada ayakwa angerrba wurri-mirntak-iybinu-wa warnungkwarba wurriybina yirrabi-larrkanu-murruwa yirruwa. Kembirra yangbi-ja-jungwuna ningki-miyambana ningk-ani-miykirra!” na-yama wurrakina Janjanu-wa.
23 Anaja ni-yama Janjana, “arakb-irakba-kiya-wiya nakina Ajaya, niybina naniki-maki-maka Goe-langwa, ni-yamama, ‘Nu-wilyaba nani-mamalya n-art-irtanama nakina alarrk-iyngbiringka-langwa angalya. Enena kembirra ayakwa ena-langwa da. Wurrima-dirrbira-kina mamirukwa kirrakina kajungwa naniki-liki yada nakina nu-Bungkawa makina-manja,’ ni-yamama nakina Ajaya. Ningakina-bina ngayuwa ningiybina ning-art-irtanguma ning-ani-mamalya da! Kembirra ningena arakba da!” ni-yama Janjana abirruwa-wa. 24 Abirraja wurri-Barija warnungkwarba na-yama anuwa-wa, 25 “Nara ningkakina ningk-iybina ningki-Majaya akwa nara ningkakina Elaya akwa nara ningkakina ningk-iybina God-langwa ningk-aniki-maki-maka ayakwa, imba miyambana-birra ningkena kembirra ningkarra-mingeki-ngamba-jinama warni-mamalya?” na-yama wurrakina.
26 Anaja ni-yama Janjana wurri-mirntak-akinu-wa warnungkwarba, “Akungwa-mirra ngayuwa ningena ning-arra-mingeki-ngamba-jinama warni-mamalya imba wurru-wilyaba warna ngarningka yalakwa warni-mamalya nuw-ambilyama karningbala ambaka nungkwurruwa. 27 Nakina-bina niybina naniki-lika ambaka-mirri-mirra arija-langwa ngayuwa-manja da. Akana ngayuwa ningena ning-aning-aningabama ning-aniku-warda-langwa ana-langwa warka akwa ning-anik-abirawa-ka-langwa ana-langwa aning-alika,” ni-yama nakina Janjana abirruwa-wa.
28 Akina-bina angalya Bedaniya na-yangb-ayinu-murri-manja a-mirntak-akina ayakwa Janjana akwa wurri-mirntak-akina warnungkwarba, ebina alyangmi-lyangma-langwa adalyuma a-miykirra Jardina, n-ambilyu-murri-manja Janjana nani-mingeki-ngamba-juwa-murri-manja warni-mamalya. Janjana ni-yangbinu-mulangwa ayakwa Jesus-langwa-langwa.
29 Miyngka-wiya mamawura Janjana nani-rringka nakina Jesus ni-likanuma anuwa-wa akwa ni-yama ena-langwu-wa warni-mamalya, “Kwurruwa! Kwuja! Wuni-rringka n-angaba n-anungkwarba! God-langwa nakina. Nakaka-bina wubirra ebina jiba narru-wartu-wartangu-mirra ni-yaminama. Naka-bina ngarniku-minu-wurri yada a-wurru-wurrariya ngakwurra-langwa da!
30 Akiyadibina-wiya ningi-yamama ngayuwa ngarra-makama, ‘Nu-wilyaba n-anungkwarba n-ibukwaya yangkwurrangwa kini-likajama kin-ariji-dinama arija-langwa. Akana n-arum-eka ni-lyangma nakina imba n-ingaba-kiya ningena mana n-aning-adinakba arakba n-ambilyu-mirra nara-wiya ngayuwa ki-rukwularrina nganjukwaba,’ ningi-yamama ningiybina adinakba-kiya. Kembirra naka-bina da ngarra-maka-mirrada da!
31 Akini yada ngawa ningi-yangbinu-manja a-mirntak-akina ayakwa ngayuwa, ning-aningbal-eka nganjukwaba nakina-langwa n-anungkwarba. Mama ning-aningbala nakina imba ningi-likanuma ngayuwa yangkwurrangwa ning-aniki-mingeki-ngamba-ji yada akungwa-mirra nungkwurruwa-wa karningi-Yijireyilu-wa karni-mamalya, karnik-aningmi-di yada nakina-langwa aduwaba,” ni-yama nakina Janjana ena-langwu-wa warni-mamalya. 32-33 Kembirra ni-yama nakina nani-maka-mirra, “Ning-aningbal-eka nganjukwaba nakina imba ebina-wiya God ngini-larrkama ning-aniki-mingeki-ngamba-ji yada karni-mamalya karna, akwa ni-yamama nakina God ngayuwa-wa, ‘Kini-rringkinama nungkwuwa nani-Mawurrna kini-jadanama kini-dirrirntama akwa kin-ambarrinama nu-wilyaba-manja n-anungkwarba. Nakina-bina n-anungkwarba naniki-mini-lyangburrkwaji yada Nungwurriyaka nani-Mawurrna nungkwurra-langwa yukwudukwuda,’ ni-yamama God ngayuwa-manja. Kembirra amandangwa ningani-rringk-eka nani-Mawurrna ni-jadinga abalkaya-langwa, biya ni-dirrirnta ni-mirnta-mirntirra n-ambirringa arakba niybina-manja n-anungkwarba, ning-aningbala-wiya nganjukwaba nakina. Wubirra laka dimirra ambaka-langwa ying-ambarrinama, ni-yamama an-ajukwaba nani-Mawurrna nakina, n-ambarrinuma niybina-manja n-anungkwarba. Ning-aningbal-eka amandangwa nakina, 34 imba nganyangwa-mirra manba ningani-rringkam-eka nakina nani-Mawurrna. Kembirra ngarra-makinama ningena nakina n-anungkwarba God-langwa Nanukw-anikba nakina da!” ni-yama Janjana ena-langwu-wa warni-mamalya. Wun-aning-adiniba-wiya nan-abirraki-yuwarnu-mulangwa Jesus-manja.
35 Miyngka-wiya mamawura Janjana nani-mingeki-ngamba-juwa-mulangwa Jesus, anuwa Janjana akwa wun-ambilyuma wun-anik-ab-ibirraki-yuwa ana-langwa na-bik-alk-ilkayanguma akwiyak-bijina adalyuma a-miykirra Jardina. 36 Biya nani-rringka Jesus nakina na-li-likana yakwujina. Biya ni-yama Janjana wun-alakina-kiya-wa, “Kwurnuwa! Kwuja! Wuni-rringka n-angaba n-anungkwarba! God-langwa nakina! Wubirra jiba ni-yaminama,” ni-yama.
37 Kembirra abirnaja wunalakina wun-anik-ab-ibirraki-yuwa Janjana-langwa nan-engkirrikana nakina ni-yangbinuma ayakwa. Kembirra nani-lalika nakina Janjana imba nani-likana wunalakina nani-yuwarna Jesus-uwa.
38 Anaja n-errkerra nakina Jesus akwa nani-rringka wunalakina nani-yuwarnuma anuwa-manja akwa ni-yama, “Miyambana kin-andiyama kin-alakina?”
Abirnaja nani-yama, “Rebaya, nga-manja ningkena ningki-mungkwu-mungkwulama?” nani-yama. Akin-eka ekirra Rebaya na-yaminama “Nanik-akakirumaka.”
39 Anaja ni-yama, “Kwa, ngarri-bukwurruwa ngarri-biki-likaja kajungwa yikini-rringkini yada ebina angalya ngayuwa ningu-mungkwu-mungkwula-murri-manja,” ni-yama Jesus. Kembirra na-biki-likana da. Akana na-larrwura-da arakba. Kembirra nan-ambilya wunalakina anuwa-manja makini yada m-aningi-larrwura.
40 Nu-wilyaba nakina n-anungkwarba Endiruwa nani-miykirra, wuni-mang-adiyarra-manja Jayumuna Bida-langwa. 41 Biya waranja-bawiya ngawa ni-likana nan-akbirranga ana-langwa n-arrkwuw-anikba Jayumuna akwa ni-yama anuwa-wa, “Yirruw-eka yarna yin-akbirrangama niybina ni-Majaya,” ni-yama Endiruwa. Akin-eka ekirra “Christ” na-yaminama akina da. 42 Kembirra nanu-wilyaka n-arrkwuw-anikba Jayumuna Jesus-uwa.
Anaja Jesus nani-rringka anuwa-wa, akwa ni-yama, “Nungkwuwa ningkena Jayumuna na? Ningk-iybina ningk-anukw-anikba Janjana-langwa na? Kembirra aduwaba-langwa ningkena kabi-yangbi-jinama nungkwuwa ningkena ningk-ani-miykirra Bida,” ni-yama Jesus anuwa-wa. Akin-eka ekirra na-yaminama “Angwarnta yinijirra.”
Jesus nu-wekbalyinu-mulangwa Biliba akwa Nedeniyela
43 Biya arakba ngarningka m-iyngka-manja mamawura nakina Jesus ni-lyangku-werri-bika-jungwunuma naniki-liki yada akinu-wa aruma angalya a-miykirra Keliliya. 44 Kembirra yakwujina ngawa nakina nan-akbirrangama Biliba niybina n-ambilyuma akina-manja angalya a-yukwujiya Bejeda, ebina-manja ngawa nan-ambilyu-murri-manja Endiruwa akwa ngawa Bida. Biya Jesus ni-yama Bilibu-wa, “Kwa! Likaja ngayuwa-manja!”
45 Anaja kembirra nakina Biliba ni-likana akwa nani-min-andiyaya Nedeniyelu-wa akwa nan-akbirranga akwa ni-yama anuwa-wa, “Ningk-aningma niybina n-anungkwarba ebina narr-arrkarrangu-mulangwa Mawijija akwa God-langwa warniki-maki-maka ayakwa? Naka arakba amandangwa yin-akbirrangam-eka. Jesus-eka nakina N-aningi-Najirida n-anungkwarba, Jawijiba-langwa nanukw-anikba,” ni-yama Biliba.
46 Ni-yama anaja Nedeniyela, “A-a! Nara ebina aningaba a-ngekbiraka-jungwuma a-likama akina-langwa angalya Nejirida!” ni-yama nakina.
Anaja Biliba ni-yama anuwa-wa, “Kwa! Likaja nungkwa-bakiya-ba andiya!” ni-yama Biliba.
47 Anaja Jesus nani-rringka nakina Nedeniyela ni-likanuma anuwa-wa akwa ni-yama Jesus wurri-mirntak-akinu-wa warning-akwijina warni-mamalya, “Nakaka-bina n-anungkwarba n-ibukwaya ni-likaja-mirra, ni-lyangmandukwuna ngarningi-Yijireyila-langwa! Naka nara a-ykadikama ngarni-mamalya-manja,” ni-yama Jesus abirrawa-wa.
48 Anaja Nedeniyela ni-yama anuwa-wa, “Nga-manja ningkena-bina ningk-aningmi-dinuma ngayuwa-langwa?”
Anaja Jesus ni-yama anuwa-wa, “Aybina-wiya Biliba n-artanga-wiya nungkwuwa-wa, ngayuwa yirra-rringkama nungkwuwa manyungwunya-manja,” ni-yama nakina.
49 Imba ni-yama Nedeniyela, “Mungkwa-ba, nungkwuwa ningkakina God-langwa Ningk-anukw-anikba akwa Ningki-mikbiyiya-dangwa Yarningi-Yijireyila-langwa,” ni-yama nakina.
50 Kembirra anaja Jesus ni-yama, “Wa! Jarrya ningku-werrik-ambilya kembirra ngayuwa-manja arakba yirra-maka-mulangwa ningena yirra-rringka-mulangwa nungkwuwa miybina-manja manyungwunya? Ambaka-mirra kembirra nungkwuwa ki-rringkinama engb-iyngbuda,” ni-yama nakina anuwa-wa. 51 Kembirra ni-yama ngarningka Jesus wurri-mirntak-akinu-wa warni-mamalya, “W-engkirrikiya! Yiki-rringkinama akina angalya God-langwa ka-ngwurdangminama karrawara akwa God-langwa warniki-mamirikaja ka-wurraku-wurtanama karrawaru-wa akwa ka-wurraki-dirrirntama ngayuwa-manja ningiybina-mirrada ningi-rukwularrinu-murri-manja enena-manja angalya. Amandangwa engbiringka ayakwa akina!” ni-yama Jesus abirruwa-wa.