Jawuna
Enena jurra ngarraki-makinama ayakwa nu-bungkawa-dina-mulangwa God wurr-ababirna-manja warni-mamalya. Ngarraki-makinama ngarningka God ni-lyalyingmina-mulangwa ngakwurruwa ngarni-mamalya akwa nu-marngkirra-dina-mulangwa ngakwurruwa-manja. Mama ana-langwa warni-mamalya narr-angmardanama wurru-kwala-manja warni-mamalya, imba anaja God ni-lyalyingminama nakina wurri-mirntak-akinu-wa warni-mamalya. Nar-eka nakina a-ngayinduma a-banijiminduma a-jungwa-juma wurrakina, imba nani-ngayindanama kani-mini-yakwabijinama a-wurru-wurrariya na-yama-mulangwa wurrakina.
1
Jawuna nani-mini-yarrku-wurrangu-mulangwa ayakwa Yaweya-langwa
Nakin-eka Jawuna nanukw-anikba Amidaya-langwa nakina. Anaja Yaweya ni-yangbinuma ayakwa anuwa-wa akwa ni-yama, “Jay! Likaja arakba engembu-wa Niniba-wa. Arum-eka akina angalya akwa aminu-wurra-kwilyimida alikira yiya warni-mamalya. Ki-likaja nungkwuwa yiki-mini-yangbina nganyangwa ayakwa wurri-mirntak-akinu-wa warni-mamalya wurri-min-akina angalya yakwijina Niniba-manja. Akwa ki-yama, ‘Yaweya n-awinyamba-dum-eka nakina nungkwurruwa-wa mana n-aningm-eka nakina karniniyarrya karni-mamalya kirrakina da,’ ki-yamina ka-makina nungkwuwa wurri-mirntak-akina-manja warni-mamalya,” ni-yama nakina Yaweya Jawuna-wa.
Anaja Jawuna nara kin-engkirrkana nakina akinu-wa ayakwa Yaweya ni-yangbinu-murruwa anuwa-wa. Nara kembirra kini-likana angerrba a-lyangmu-wa Niniba-wa, imba ni-lyangkarrnga-jungwa nakina m-iyngku-wa mamirukwa, ni-ngayindangu-mubaba naniki-lyumadi yada Yaweya-langwa. Biya ni-dirrirnta nakina angerrba mijiyalyu-wa ma-miykirra Jawuba makina.
N-alilikanu...wa. Yakwijina mijiyalya-manja ni-yarda. N-andiyaya nakina akana nima-rringka mu-wilyaba mijiyanga yakwijina num-ambilyuwardi-mirra. Mamiki-liki yada makina engku-wa akwabirrangarnu-wa engembu-wa Beyinu-wa. Biya kembirra ni-likana arakba nakina Jawuna akwa nani-yandabana ni-min-akinu-wa mijiyanga nu-bungkawa naniki-liki yada nakina makina-manja ngawa mijiyanga Beyinu-wa, akwa nanu-kwa angwarnta yakwijina. Ni-lyumadinum-eka nakina Jawuna Yaweya-langwa. Kembirra Jawuna akwa ngawa wurri-mirntak-akina wurru-kwala warningi-mijiyanga warnungkwarba na-wurra-jawudiyina arakba mijiyangu-wa. Biya na-mirntaki-likana arakba wurrakina da. 4-5 Imba anaja Jawuna ni-dirrirnta arakba akwa n-awiyaba memedirru-wa mijiyanga akwa ni-mungkwulinga marrnga arakba nakina da.
Nim-angki-dikarrina ngalaja makina mijiyangu...wa. Mabirringku-wilyarra. Akana anaja nakina Yaweya n-aningma nakina Jawuna ni-rijawudiyinuma makina-manja ngawa mijiyanga, akwa kembirra ni-larrka engbid-eka arrirra makinu-wa makarta. Akin-eka wiyarrirta na-wartanga arakba makina mijiyanga mabirringku-wilyarra. Ngalaja m-adi-durrngwarna arakba makarta nimu-waruma-jungwuna makina. Adiniba ka-birri-juwam-eka makina mijiyanga da.
Abirraja wurri-mirntak-iybina warnungkwarba wurri-min-akina mijiyanga na-mirntak-akbard-eka wurrakina, akwa nuw-artanga wurru-wilyu-wilyaba-wiya abirra-langwu-wa amalawudawarra, kajungwa karraki-mamirika-jini yada akwa karrak-anibi-kini yada wurrakina. Akana a-yirrbiyirrba ngawa ngalaja arrirra nuw-angkarrinuma nuw-arrbidi-dinuma yiya mi-yirrbiyirrba ngawa makarta nimu-waruma-jungwunuma m-aruma. Kembirra abirraja warnungkwarba narri-mirntaki-manga ababirna adi-durrngwarna bada yiya anhinga-mirrya akwa nuw-errikbayina amirntak-akina angerrba makartu-wa narrim-ekilyarrba-kama miybina mijiyanga da.
Anaja kembirra nimin-iybina nu-bungkawa mijiyanga ni-likana arakba nakina, n-awiyabana arrawu-wa, biya nan-akbirranga nakina Jawuna ni-mungkwu-mungkwuluma yakwijina marrnga. Biya ni-yama, “Mirajanga!” ni-yama. “Ningki-yaminjamarrkinama ningkena yalakwa ningki-mungkwu-mungkwulama? Mirajanga,” ni-yama. “Nungkw-ajukwaba ki-biriyaminama nungkwa-langwu-wa amalawudawarra. Dukwa kuw-errkwuliyama akina ngakwurruwa? Dukwa nara a-jungwa-juma akina imba akak-anibi-kinama ngakwurruwa?” ni-yama nakina nu-bungkawa nimin-akina mijiyanga Jawuna-wa.
Biya yadikina nani-jadinga wun-alakina errekbu-wa angerrba wurru-kwalu-wa warnungkwarba. Abirraja na-mirntaki-yama, “Ngarri-malyangkayina akimalyangka kajungwa ngarningmi yada ngarna nakina n-anungkwarba niybina ni-ngekbirakama awurrariya yalakwa,” na-yama. “Dukwa ni-miyambana n-anungkwarba ni-yamama yalakwa awurrariya? Nakina-langwa-bina ena wiyarrirta ngarraku-wartanama ena da,” na-yama. Biya kembirra na-malyangkayina arakba akina akimalyangka da. Biya narr-akbirranga Jawuna-langwa ekirra wurrakina da.
Biya na-yama wurrakina Jawuna-wa, “Yirri-makina kembirra! Ningkena-bina ningki-yamama awurrariya na?” na-yama. “Ningki-yaminjamarrkinama ningkena yalakwa memema-manja mijiyanga? Imba a-miyambana angalya nungkwa-langwa? Angamba-langwa angalya ningki-likanuma ningkena?” na-yama wurrakina Jawuna-wa.
“Ngayuw-eka ningena Ningi-Yibiruwa ning-ani-mamalya,” ni-yama anaja. “Ningani-yang-marngkwa-jinama ngayuwa Yaweya God, niybina n-ambilya-mirra ena-langwa-manja angalya abalkaya. Mem-eka makarta nima-ngekbirakama nakina akwa ngawa ababirna-langwa angalya ariba-manja ngal-ajukwaba ni-ngekbirakama nakina. 10 Akana nganja ngayuwa ningi-lyumadi-mirra Yaweya-langwa. Kembirra amin-akina-langwa ena ngarrak-akbirrangama wiyarrirta,” ni-yama nakina Jawuna.
Abirraja nuw-engkirrka-manja akina ayakwa Jawuna ni-yangbinuma nakina, na-mirntak-akbarda angwurra wurri-mirntak-akina warnungkwarba wurri-min-akina mijiyanga akina-langwa ayakwa. Akwa na-yama, “Akin-eka awurrariya ningki-yamama ningkakina,” na-yama. 11 Ngalaj-eka arrirra yiya makarta angwurra nimi-ngak-bidi-dina m-amakwilyimida mi-yirrbiyirrba ngawa. Kembirra abirraja wurri-mirntak-akina warnungkwarba na-yama Jawuna-wa, “Yiki-yamarrkinama yarna nungkwuwa-manja kajungwa kuw-errminji yada enena wiyarrirta?” na-yama.
12 “Yirri-kuwaku-wurriya angerrba makartu-wa,” ni-yama anaja Jawuna, “kajungwa enena arrirra akwa memema makarta ka-mirntak-errminjini yada,” ni-yama nakina. “Ning-aningm-eka ningena ngayuwa baba ningi-yarrku-wurrangu-mubaba God-langwa ayakwa akwa kembirra enena ngarraku-wartanama wiyarrirta,” ni-yama Jawuna.
13 Akana abirraja wurri-mirntak-akina warningi-mijiyanga warnungkwarba nara kani-min-engkirrkana akinu-wa ayakwa ni-yangbinu-murruwa Jawuna. Wurri-yirrbiyirrba ngawa na-mirntaki-midayina angwurra angerrba ariba-wa wurrakina, akana na-lyang-mirid-eka. Nara karr-akbirranga-rnwa angalya. Angwurra ngawa ngalaja arrirra nuw-angkarrina nuw-arumi-dina akwa makarta makina nimu-waruma-jungwuna m-amakwilyimida ngawa da.
14 Kembirra nuw-artanga arakba Yaweyu-wa wurri-mirntak-akina warnungkwarba wurri-min-akina mijiyanga. “Yaweya!” na-yama. “Yikinu-wartana-manja naka n-anungkwarba nar-eka ningkena a-jungwa-juma yirruwa,” na-yama wurrakina Yaweyu-wa. “Yarningm-eka yarna nungkwuwa-bina ena ningki-larrka-mirra wiyarrirta yangkwurrangwa da,” na-yama wurrakina da.
15 Kembirra nani-rntirrka Jawuna nani-ngkajika akwa nani-kuwaku-wurra wurrakina angerrba makartu-wa. Ngalaja akina-wiya ngawa nuw-ardarra akina wiyarrirta. Nara arakba kuw-angkarrina. Nim-errminja ngal-ajukwaba makarta, nimi-lyurrkwu-da makina da. Nara ngarningka arakba kimu-waruma-jungwuna da. Mi-lyurrkwa arakba kembirra makina makarta da.
16 Kembirra wurri-mirntak-akina warnungkwarba warningi-mijiyanga narrima-rringka-manja makina makarta nimi-lyurrkwu-duma, na-mirntak-akbarda angwurra wurrakina Yaweya-langwa. Akwa kembirra narri-manga a-wilyaba jiba akwa nani-minu-wartanga Yaweya-langwi yada akina. Biya na-yama anuwa-wa, “Yarningma yarna nungkwuwa Yaweya ningkakina ningk-iyngbida angwurra,” na-yama. “Kembirra yiki-yardiya-manja ngarningka yarna angalya-manja ka-minu-wartanama ngarningka a-wilyaba jiba akwa ka-yang-marngkwa-jinama nungkwuwa-wa yarning-angkawura, mana yarningma yarna arakba nungkwuwa ningk-iyngbida angwurra ningkakina da,” na-yama wurrakina da.
17 Imba ngalaja akina akwalya amakwilyimida nuw-ambilyuma arrawa makina-manja ngawa makarta. Anaja nakina ni-yangbina Yaweya akinu-wa amakwilyimida akwalya akwa ni-yama, “Jay! Likaja angerrba ni-rukwu-ngirdiya n-angaba n-anungkwarba,” ni-yama nakina akinu-wa akwalya. Kembirra ngalaja akwalya nuw-angkarra akwa nanaki-rukwu-ngirda angerrba arrawu-wa mulkwu-wa nakina Jawuna. Kembirra yakwijina ngawa akwalya-langwa-manja mulkwa anaja Jawuna n-ambilyuma arakba m-abiyakarbiya mamawura akwa marrnga nakina da.