Basef Ifimba Jon Nandaꞌafi Fagaliꞌi
Basef bandafi fagaliꞌi Jon nandaꞌafi
1:1-4 Jon naꞌi basef Godi nasaꞌma ukup asasipi ma sandagala
1:5-2:29 God anen nogogalaꞌi. Eaꞌ apaꞌ mondafeꞌ mogogalaꞌi ma mondaꞌ waf usiꞌifi ukup pigapigaila epes hiasi hiꞌindalas
3:1-24 Apaꞌ mape awasi Godi. Eaꞌ deiꞌ apaꞌ ukup pindapindaila sahin owan apeꞌisi. Apaꞌ epes awasi miniꞌap Seteni sandaꞌ waf awafi atapis.
4:1-6 Apaꞌ mowaloga ambagof hiagufi hiꞌindalagofa mogogawa agwafomba Godi aꞌa Satani.
4:7-5:21 God nasapaꞌ nogamana ananiai nafiꞌi itap apaꞌe nihimbaꞌmapa waf ukup pagapagailasafi. Eaꞌ mohapifana ma mogape sisihipama anen atona mogofaꞌ ambal namili.
1
Basef ambal namili lagapaifi
Afaꞌ wandaꞌ basef ifimba ma anona aman agilinama Basef, anen nagasoꞌapa ambal namili lagapaipai. Aman anamba fowaꞌ gani dambadamba nagapani. Afaꞌ wameꞌ basef ananifi eaꞌ, watolona naep afaꞌipi wahapilana lagof afaꞌigufi.* Jo 1:1-2,4,14; 1 Jo 2:13-14 Ambal alamba namili lataga eaꞌ afaꞌ watolol naep afaꞌipi. Isimba atis deiꞌ afaꞌ wawalipipa ma ambal alamba lagape dondol lifilafii. Ambal alamba fowaꞌ lape laloma Ahamapa eaꞌ deiꞌ lataga alihigima watolol. Hiahaom amamba afaꞌ watolom wagameꞌami deiꞌ waꞌipipam ipaꞌ wapani ma pegape nembel atotombel pegalomafa. Afaꞌ wape wambota atota waloma Ahamapa nagaloma Nogamana ananinai Jisas Krais.* Jo 16:24 Afaꞌ wandaꞌ basef ifimba ma atiasi dagala apeꞌini negataga luꞌwin siꞌina apaꞌ.* 1 Ti 6:16; Je 1:17
God anen nogogalaꞌ nandaꞌ waf buꞌwafi usiꞌifi atifi
Basef ifimba afaꞌ wameꞌanamef naꞌamba. God anen nogogalaꞌ afitinai. Ina anota akot tailana kwasakwasala, owaꞌatin endilisi.* 1 Jo 2:4 Iꞌi apaꞌ miꞌi mape nembel atotombel malomana, ama apaꞌ ataꞌ mape mandaꞌ waf awafi siꞌi magape akot atotai, apaꞌ mambasoꞌma apaꞌ atepa ma basef apeꞌifi faloma feꞌ apeꞌini.* Jo 3:21; Ais 2:5; Hi 9:14; Re 1:5, 7:14 Anen nogogalaꞌ afitinai. Iꞌi mope mogalaꞌ siꞌi anen waf awafi akapa, eaꞌ mope nembel atembel moloma sahin owan hiasi. Eaꞌ esimbel Jisasi Nogamana Godi basaꞌopa waf awafi apeꞌifi hiafi hiꞌalaf, eaꞌ mataga beꞌepa.* Sam 32:5; Pro 28:13 Iꞌi apaꞌ miꞌi waf awafi akapa, apaꞌ mambasoꞌma apaꞌ atepa eaꞌ basef endilisifi ina fapaepa, owaꞌatin. Iꞌi apaꞌ mowalapa waf awafi apeꞌifi alihif, atiasi anen nokwahomapa waf hiafi awafi apeꞌifi okom masoꞌanafa nosaꞌopapa mogataga beꞌepa hililiꞌ. Basef fowaꞌ nagalaꞌ lapafi eaꞌ nilif nondaꞌ waf usiꞌifi datima. 10 Iꞌi apaꞌ miꞌi, “Apaꞌ owaꞌ mondaꞌ waf awafia”, apaꞌ mofala God maꞌi anen aman nagaꞌi basef basoꞌafii. Eaꞌ basef ananifi ina fape opalef apeꞌilifi, owaꞌatin.

*1:1 Jo 1:1-2,4,14; 1 Jo 2:13-14

*1:3 Jo 16:24

*1:4 1 Ti 6:16; Je 1:17

*1:5 1 Jo 2:4

*1:6 Jo 3:21; Ais 2:5; Hi 9:14; Re 1:5, 7:14

*1:7 Sam 32:5; Pro 28:13