Basef Ifimba Pol Nandaꞌef Fagiꞌ Fagafeꞌma Korini
Basef bandafi Pol nandaꞌef fagiꞌ fagafeꞌma esis Korini
1:1-11 Pol nandabeten nanifela Goda esis
1:12-7:16 Pol naꞌipasa basefa waf apaꞌ Kristen mondaꞌafi faloma akafimi hiami apaꞌ mogofaꞌami
8:1-9:15 Otamba esis sakolasemba ma sogasoꞌ esis Kristen kwahusi
10:1-12:21 Pol naꞌipasa basefa waf ananifi faloma akafimi nagameꞌama maol Kraisi eaꞌ naꞌi Krais atona natopalopana dowaf nowaꞌ banagona
13:1-10 Basef solawaisafi
13:11-14 Basef akutaifi faloma dagala ananini
1
Aeꞌ Pol, God nandandepe aposel Krais Jisasi. Aeꞌ aloma owamapa Timoti wandaꞌago basef ifimba ma ipaꞌ amam nematawa Godi pagape Korini pelomago amam nematawa hiasi Godi siꞌisi sagape anamba hiagoma esis Grik sagapoma.* 1 Ko 1:1,3 Aeꞌ aꞌi God ahamapa apeꞌinai noloma Dembinai Jisas Krais motopalopepa dowaf mowaꞌ banagaipago mondaꞌ opalef ipeꞌilifi fepe awanelef.* Ef 1:3; 1 Pi 1:3; Ro 15:5
Pol nanifela Goda nagatopalopa anen
Apaꞌ mondasaꞌma agol Godi luꞌwagol, anen God ahama Dembinai apeꞌinai Jisas Krais. Anen ahamapa apeꞌinai, kofagonama okom magamagailapai nati apaꞌ uwahipipa. Anen God nandaꞌ opalef nimanilifi apaꞌ hiapaii fagape saꞌombel. Nimanimi hiami magatagamapai anen nandaꞌapa opalef fape awanelef. Ama deiꞌ apaꞌ ila ma mondaꞌ opalef epes isimba nimanimi mamimami mogatagamasi fegape awanelef siꞌi God naliꞌ nagatopalopapa.* Sam 34:19; Sam 94:19 Akafimi luꞌwami Krais naliꞌ nogofaꞌami deiꞌ apaꞌ wapani mofaꞌam. Eaꞌ naꞌamba atin opaf awanifi luꞌwafi ananifi deiꞌ fasoꞌalepa.* 2 Ko 4:15
Iꞌi deiꞌ anis daias sogasoꞌafa nimanimi, amamba motopalopepa mondaꞌ opalef ipeꞌilifi fepe saꞌombela atiasi God nokwahomepa waf awafi nofaꞌepa pigitanimai. Iꞌi God nondaꞌ opalef afaꞌilifi fegape saꞌombel, anen nondaꞌ opalef ipeꞌilifi awanelef wapani ma pilutu banagepama pegefaꞌ akafimi amambai siꞌi afaꞌ ogofaꞌami. Afaꞌ ogawa endilisi waꞌi ipaꞌ pigalutu banagepa. Deiꞌ main, afaꞌ ogawa ipaꞌ apefaꞌ akafimi palomafa eaꞌ naꞌamba atin atiasi pefaꞌ opalef awanilifi pelomafa wapani.* Ap 19:23; 1 Ko 15:32
Ipaꞌ alipipai, afaꞌ waꞌi ipaꞌ ataꞌ pegawa nimanimi akafimi anis epes sagasoꞌafam gani itap apamba luꞌupa Esiai. Akafimi amamba luꞌwami aꞌowaꞌ eaꞌ mahagofa afaꞌ, mikilaꞌ banagami afaꞌimi. Eaꞌ afaꞌ ukup pandandaꞌ paꞌi endilisi atiasi aꞌ ogaꞌ. Wamemeꞌma nimanimi luꞌwami eaꞌ ogawa waꞌi endilisi atis aꞌ ogaꞌ. Apaꞌ owaꞌ amamba matagamafa ma afaꞌ ina ukup pendandaꞌma banagami afaꞌimi atom, owaꞌatin. Afaꞌ ukup pendapoma banagami Godi atom, amamba magasaꞌma epes sagagaꞌii.* 2 Ti 4:18 10 Esis sasoꞌafa nimanimi luꞌwami sandaꞌafa aofa endilisi saꞌi sohafa ogaꞌ, owaꞌ God nofaꞌafa otanimai. Eaꞌ atiasi notopalopafa wapani. Ukup afaꞌipi banagep ohapifana endilisi ma atiasi nogatopalopafa ma anom nimanimi luꞌwami wapani. 11 Ama deiꞌ beten ipaꞌ pandaꞌmafani atin, nondaꞌmafas naꞌamba. Eaꞌ God atiasi nogwa beten amam nematawa hiasi sandaꞌani ma anen nofaloꞌmafa nogatopalopafa dowaf. Ama atiasi amam nematawa hiasi ukup pegapoma afaꞌ ma soganifela Goda hiahawes isimba anen nandaꞌasi.* Hi 13:18; 2 Ko 2:17; 1 Ko 1:17
Pol ina nambasoꞌma esis Korin, owaꞌ
12 Afaꞌ wandagala ma hiahawes isimba. Malagof fagape opalef apaꞌ nomoni fawalapa basef ifimba faꞌipafa wagafeꞌ waf usiꞌif hililiꞌi ma waf opalef buꞌwalififi God nagasoꞌafaf afaꞌi. Gawa epes itapasi ina nawalapa waf afambai ma afaꞌ, owaꞌatin. God nati uwahipifa aꞌowaꞌ natopalopafa dowaf deiꞌ wafeꞌ naꞌamba. Wafeꞌ waf afambai laꞌafena epes hiasi sagape itap apaꞌii eaꞌ wandaꞌas naꞌamba hiafi ma ipaꞌ.* 2 Ko 5:12; Fl 2:16 13-14 Afaꞌ ina wandaꞌ anif basef ahififi ma ipaꞌ, owaꞌatin. Wandaꞌ andipefi atif, ifimba ipaꞌ ila ma pitalifif pegegawafi. Deiꞌ ipaꞌ ina pegawa waf afaꞌifi andeandeꞌ, ataꞌ owaꞌ. Apaꞌ aeꞌ okom maꞌi ipaꞌ atiasi pegawa endilisi waf afaꞌifi hiafi hiꞌilaf. Nemaf afamba Dembinai Jisasi, ipaꞌ pendagalama afaꞌ naꞌamba atin siꞌi afaꞌ anaf ondagala ma ipaꞌ.
15 Aeꞌ egawef endilisi basef aliꞌ agaꞌipipafi ma waf buꞌwafi ipeꞌifi. Eaꞌ fowaꞌ aliꞌ andaꞌ okom maꞌi efeꞌmago ipaꞌ etopalopepa bifa ataꞌ pegegawa waf Godi wapani. Owaꞌ aeꞌ ina afoꞌo.* 1 Ko 16:5-6 16 Aeꞌ okom mandandaꞌ maꞌi ataꞌ iliꞌ efeꞌmepago ma main, ekwahipa efeꞌ itap luꞌupa Masedonia ma bola ekwaha Masedonia itanima ifiꞌmipai wapani ma petopalope pesapaꞌe egafeꞌ itap luꞌupa Juda. 17 Deiꞌ siꞌi main? Aeꞌ aꞌias eaꞌ ma endaꞌas naꞌamba, owaꞌ alambama basef ifimba andaꞌ dambaifi fahaꞌohef? O iꞌi aeꞌ okom miꞌi endaꞌ anin mae, iꞌi basef biafif “Ahoꞌ” neloma “Owaꞌ” wapani siꞌi epes itapasi sagaꞌi? Owaꞌatin endilisi.
18 God anen nandaꞌ hiahaom datimai, nagaꞌi endilisi atisi. Basef hiafi afaꞌ wagaseꞌepafi endilisifi atif naꞌamba atin. Afaꞌ ina waꞌi anif basef biafif, “Ahoꞌ” naloma “Owaꞌ” fandahapima atogon, owaꞌatin.* Ap 18:5 19 Nogamana Godi Jisas Krais, aeꞌi Sailas waloma Timoti wagawalapa basef ananifii, anen ina nagaꞌi naꞌambai nagaꞌi, “Ahoꞌ” i “Owaꞌ” atifi, owaꞌatin. Krais nagaꞌi ahoꞌ atini.* Re 3:14 20 Ahoꞌ, basefa lap mamahifa God nagaꞌiefi kofagefa fandawalap eaꞌ faꞌi Krais atona, anen nagaꞌi ahoꞌ atini. Isimba atis deiꞌ apaꞌ maꞌi agol Jisas Kraisi atogol eaꞌ maꞌi, “Endilisi” ma basef ifimba God nagalaꞌ lapafi masaꞌma agol ananigili luꞌwagol.* 1 Jo 2:27; Ef 1:13-14; 2 Ko 5:5; Ro 8:16-17 21-22 God atona nowaꞌ banaga afaꞌ, ipaꞌ wapani, eaꞌ mape sisihipama Krais. Anen nandaꞌmapa ametal ananini apaꞌ nosahoꞌapa ma mogape ananipai atepa eaꞌ nasoꞌapa Ambal buꞌunai ananinai nape nomon opalef apeꞌilifi. Ambal anamba God nagasoꞌapani naliꞌ ma hiahaom duꞌwanim hiami fasimi God naꞌi anaf nogasoꞌapami.* Ro 1:9; 2 Ko 11:31
Pol ina notanima nafeꞌma esis, owaꞌ
23 Aeꞌ aꞌi basef endilisifi atifa naep Godi. Aeꞌ andaiwaꞌ ma egaseꞌepa nimanimi ipaꞌ. Eaꞌ fowaꞌ ina itanima afoꞌo Korin, owaꞌ.* 1 Pi 5:3 24 Afaꞌ ina wape waliꞌma oganandona waf ipaꞌ pagahapifa Godafi, owaꞌatin. Deiꞌ main, ipaꞌ atipa palutu banagepa pahapifana eaꞌ. Apaꞌ deiꞌ afaꞌ wandaꞌ maol walomepa ma ondaꞌepa pendagala.

*1:1 1 Ko 1:1,3

*1:2 Ef 1:3; 1 Pi 1:3; Ro 15:5

*1:4 Sam 34:19; Sam 94:19

*1:5 2 Ko 4:15

*1:7 Ap 19:23; 1 Ko 15:32

*1:9 2 Ti 4:18

*1:11 Hi 13:18; 2 Ko 2:17; 1 Ko 1:17

*1:12 2 Ko 5:12; Fl 2:16

*1:15 1 Ko 16:5-6

*1:18 Ap 18:5

*1:19 Re 3:14

*1:20 1 Jo 2:27; Ef 1:13-14; 2 Ko 5:5; Ro 8:16-17

*1:21-22 Ro 1:9; 2 Ko 11:31

*1:23 1 Pi 5:3