1 Basef ifimba dokoꞌifi ipaꞌ paꞌi aeꞌ asaꞌma agol aeꞌagili atogol luꞌwagol wapani siꞌi anom amam mambasoꞌmepa mandaꞌam? O paꞌi aeꞌ owaꞌ banagewe endaꞌas siꞌi amoma egaseꞌepa anif basefa pas anis daias sandaꞌafi ma sogasaꞌma agol aeꞌagili? O ipaꞌ wapani atiasi pendaꞌ anif basef fil pepa ma pegatopalope? Owaꞌatin endilisi.*1 Ko 9:2; 2 Ko 5:12; Ap 18:27; Ro 16:1 2 Basefa pas sogasaꞌma agol aeꞌagili eaꞌ ipaꞌ atipa. Basef ifimba fail sisihif nomon okom aeꞌami. Ama epes hiasi sotalififa sogogawef.*Eks 24:12; Jer 31:33; Esi 36:26-27 3 Ipaꞌ pandawalap alihipa, pas isimba eaꞌ ipaꞌ atipa. Krais atona nandaꞌ basefa pas isimba. Anen nandandepe naseꞌe pas isimba afoꞌo aseꞌepas. Anen ina nandaꞌ ing nufagiꞌif, owaꞌatin. Anen nufagiꞌifa Ambal buꞌunai God nagape namunai. Anen ina nufagiꞌif fail anom otam waꞌami, owaꞌatin. Nufagiꞌif fail ukup ipeꞌipi nomon.*2 Ko 2:16

4 Basef ifimba kofagefa naꞌamba. Krais natopalope endilisi eaꞌ ahapifif banagewe ma God ape naꞌamba. 5 Endilisi aeꞌ atowe ina laꞌifiwi ma endaꞌ maol inimba, owaꞌatin. God atona nandaꞌe laꞌifiwi ma andaꞌ maol inimba ananini.*Jer 31:31; 1 Ko 11:25; Jo 6:63; Ro 7:6 6 Eaꞌ anen atona nandaꞌe laꞌifiwi ma andaꞌ maola ufiaꞌw basef dambaifi nagalaꞌ lapafi. Basefa muꞌuli inimba ina sandaꞌef fail pepa dowaf, owaꞌ. Ifimba Ambal buꞌunai ananinai nagawalapafi. Basef sandaꞌef fagail pepa dowafi faha epes sagagaꞌi, apaꞌ Ambal buꞌunai ananinai nandaꞌas sofaꞌ ambal namili sogape namisi.*Eks 34:30

7 God nufagiꞌ basef ifimba fowaꞌifi ma muꞌuli ananini fail otam. Maol Godi amom mandaꞌani, inimbai natagama gaꞌ naloma mogogalaꞌi ananimi fasimi wapani. Mogogalaꞌi amamba mandaꞌ amaga Mosesi gogogalaꞌi aꞌ mataga saꞌosaꞌom, apaꞌ owaꞌ, amamba banagem aꞌowaꞌ ma esis Israel ina laꞌifisa naep doꞌ sigati amaga ananigai, owaꞌ.*Ga 3:2,5 8 Apaꞌ mogogalaꞌi ma maol Godi Ambal buꞌunai ananinai nandaꞌani luꞌum aꞌowaꞌ mikilaꞌ amamba fowaꞌimi.*Diu 27:26; Ro 1:17, 3:21 9 Maol fowaꞌini nawaloga epes, higiligalasi inimba nawalapai mogogalaꞌi Godi. Apaꞌ maol inimba deiꞌini nandaꞌ epesa God nagaꞌi esis boꞌwes hililiꞌi, inimba deiꞌ nawalapai mogogalaꞌi ananimi luꞌum aꞌowaꞌ mikilaꞌ amamba magaliꞌi.*Eks 34:29 10 Endilisi, mogogalaꞌi fowaꞌimi ina mogalaꞌ naꞌamba atin siꞌi deiꞌimi, owaꞌ. Fowaꞌimi falafumi atom apaꞌ deiꞌimi luꞌum mikilaꞌ aꞌowaꞌ. 11 Maol inimba deiꞌ naꞌi aꞌ higiligalani, anin fowaꞌ nataga naloma mogogalaꞌi Godi. Apaꞌ mogogalaꞌi deiꞌimi ma maol inimba nagape lifilafii aꞌ luꞌum aꞌowaꞌ mikilaꞌ amamba magaliꞌi.

12 Afaꞌ wandaꞌ maol Godii ogawa basef ifimba dambaifi nagalaꞌ lapafi endilisifi eaꞌ wape ohafa mogogalaꞌi amamba atiasi mogatagamafa. Eaꞌ afaꞌ ina ombal mahafa kwasakwasala, owaꞌatin. Afaꞌ banagefa aꞌowaꞌ.*Eks 34:33-35 13 Ina wape siꞌi Moses, owaꞌ. Anen nawala lowaf napeteꞌaf amaga ananigai nambahoꞌwaga ma esis Israel ina siti mogogalaꞌi amamba mogafeꞌ saꞌosaꞌombela hiꞌigalam, owaꞌ.*Ro 11:25 14 Owaꞌ ukup asasipi pasoꞌas endilisi. Deiꞌ main, dondol esis sagatalifa basef fagail Baibeli fowaꞌ God nagalaꞌ lapafi. Nemaf mamahefa sagatalifa basef ifimba, lowaf afamba waꞌafi fagape amaga Mosesi ataꞌ fape atapif fasopama ukup asasipi fafiꞌi fafiꞌi fataga deiꞌ. Ina fandatagwah, owaꞌatin. Krais atona, daoꞌ God nahapeꞌ lowaf afamba. 15 Fowaꞌ sagatalifa basef Moses nandaꞌafi safiꞌi sataga deiꞌ, lowaf afamba ataꞌ fasoꞌala opalef asasilifi atapif.*Ro 11:23,26 16 Apaꞌ iꞌi epen ami nembema opaf nefeꞌma Dembinai, daoꞌ aꞌ fendatagwah.*Jo 8:32,36; Ro 8:2; Ga 5:1 17 Dembinai anamba anen Ambal buꞌunai Godi. Iꞌi Spirit Ambal Dembinaii nogape anin epen, ina ataꞌ anis maefah siliꞌama anin, owaꞌatin. Anin nape wahifin.*Eks 16:7, 24:17 18 Eaꞌ apaꞌ hiapai deiꞌ mape amagah wafigah, mogogalaꞌi buꞌwami Dembinai mogalaꞌma apaꞌ mogogaifa anis epes. Apaꞌ mape naꞌamba deiꞌ Ambal buꞌunai Godi nahoꞌofa waf apeꞌifi eaꞌ mandati siꞌi Dembinai ma mogogalaꞌi amamba mataga luꞌum atapim mafeꞌ atin mape. Amamba mataga Dembinai atona, anen Ambal buꞌunai Godi.