Basef Ifimba Fagafeꞌma Esis Hibrui
Basef bandafi fagafeꞌma esis Hibrui
1:1-3 Basef Godi fataga fandawalap alihifa Jisas Krais, Nogamana ananinai atona, anen nagape naꞌamba atin siꞌi Ahamana Godi
1:4-2:18 Jisas nikilaꞌ amom ensel hiami
3:1-4:13 Jisas nikilaꞌ Moses
4:14-6:20 Jisas anen Dembinai apeꞌinai nandaꞌ maol nondolalima Godi
7:1-28 Jisas Dembinai nandaꞌ maol nondolalima God nikilaꞌ Melkisedek
8:1-9:28 Jisas anen Dembinai nandaꞌ maol nondolalima Godi nape laꞌafen numafi basef dambaifi God nagalaꞌ lapafi. Eaꞌ esimbel ananimbeli balo bewaꞌ banaga basef ifimba
11:1-12:29 Hiasi sagahapifa Godi sihimbaꞌmapa waf buꞌwafi ma mogailaf
13:1-25 Waf buꞌwafi apaꞌ mogailafi ma mondaꞌ okom Godi boꞌoma apaꞌ
1
Deiꞌ Malogol Nogamana Godi naꞌipapa basef
1 Fowaꞌ gani God naꞌipa akusapa bafasapa apeꞌisi naꞌamba, naꞌipas nimaguf atef atin naꞌipa amom profeta ufiawa hiawai mawalapas maꞌipasas.*Sam 2:8; Mt 21:38; Jo 1:3 2 Apaꞌ deiꞌ nogota ataꞌe a siꞌi nogota atamba anaf tigiꞌ togatagai endilisi, nawalapa basef naꞌipapa malogol Nogamana ananinai. God nandandepana ma nemaf akutaifi anen aꞌ nope dembinaima hiahaom hiami ma itap anaꞌe moloma esis amam nematawa wapani. Anen atona nofaꞌas numafias. Fowaꞌ gani God naꞌi ahoꞌ ma nogamana ananinai nandaꞌ hiahaom hiami ambagof fagapaumi maloma ambagof akami magape ilif itapi hiꞌalam mataga magape.*2 Ko 4:4; Ap 2:33-34; Kl 1:20; Hi 8:1 3 Nogamana atona nogogalaꞌi luꞌunai Godi nahihimapa aꞌowaꞌ, anen eaꞌ naꞌamba atin siꞌi God endilisi. Basef ananifi banagafi ifimba atif nowaꞌ banaga hiahaom amamba hiami hiꞌalam. Anen atona nandaꞌ apaꞌ epes mataga beꞌepa hililiꞌ nandaꞌasa eaꞌ, deiꞌ nape lagol banagagili Godi waꞌol, God banagonai nugumafi hiahaom hiamii.*Fl 2:9
4 Isimba atis deiꞌ nataga Dembinai endilisi nikilaꞌ amom ensel hiami hiꞌalam. Deiꞌ main, agol agalemba nogofaꞌagola ahamanai gikilaꞌ agof amom enseli eaꞌ fasifasigil aꞌowaꞌ.*Ap 13:33; Hi 5:5; 2 Sml 7:14; 1 Kro 17:13 5 Deiꞌ main, fowaꞌ God ina naꞌipa anona ensel ananinai naꞌi,
“Inaꞌ nogame aeꞌinai, aeꞌ Ahamena ineꞌiwai endilisi,” owaꞌ. Basef ifimba naꞌipa Nogamana ananinai atona.
Eaꞌ God naꞌias wapani naꞌi,
“Aeꞌ atiasi etaga ahamana ananiwai, anen nope Nogame aeꞌanai.”
God ina naꞌipa anona ensela basef ifimba, owaꞌatin. Naꞌipa nogamana ananinai atona.*Ro 8:29; Sam 97:7
6 Afamba God nagaꞌipa nogamana ananinai nape nagaliꞌma hiahaom hiamii, naꞌias wapani naꞌi,
“Amom ensel hiami Godi mondandaꞌ lotu ma anen atona hiꞌindalam.”*Sam 104:4
7 Apaꞌ basef ifimba God nagaꞌipa amom enselafi naꞌamba naꞌi,
“Anen nandaꞌ amom ensel mataga siꞌi fufin, nandaꞌam mandaꞌ maol ananini mataga siꞌi nif ileliwa fagalilif.”*Sam 45:6-7
8 Apaꞌ Nogamana ananinai naꞌipana naꞌi,
“O God, inaꞌ nape banagonai Dembinai nugumafi hiahaom hiamii, eaꞌ anaf nepe atapina naꞌamba atin dondol lifilafi.
Waf usiꞌifi hililiꞌi atef inaꞌ deiꞌ nape Dembinai ma anamba inaꞌ nagalaꞌambemagoma. 9 Inaꞌ okom magaila waf buꞌwafi usiꞌifii nandafaꞌma waf awafi sogosambala muꞌuliefi. Eaꞌ deiꞌ God, anen God ineꞌinai siꞌina, nandandepena naseꞌena dagala luꞌunai aꞌowaꞌ. Apaꞌ epes hiasi hiꞌalas ina sandagala siꞌi inaꞌ, owaꞌatin.”*Sam 102:25-27
10 Eaꞌ God naꞌias wapani naꞌi,
“Dembinai, fowaꞌ dambadamba inaꞌ atina nandaꞌ itap pataga, lagol ineꞌigili atogol gandaꞌ ilif otaga wapani nataga nape. 11 Amamba anaf higililam, apaꞌ inaꞌ negape atapinai. Amom molomofeꞌ mofeꞌ anaf motaga apim siꞌi luwaguf apifi. 12 Anaf inaꞌ nilaꞌwatefam siꞌi sindiwa luwaguf sagakolasif, eaꞌ amom mohoꞌofam siꞌi luwaguf. Apaꞌ inaꞌ dondol atapina negape naꞌamba atini, eaꞌ ina anaf hagena nogota ineꞌitai, owaꞌatin.”*Sam 110:1
13 God ina naꞌipa anona ensel ananinai naꞌi,
“Inaꞌ nepe naꞌaꞌe lagol kwahisigili aeꞌagili waꞌol banagogoma,” owaꞌatin.
Anen naꞌipa nogamana atona naꞌi,
“Inaꞌ nepe atapina nefeꞌ nefeꞌma nemaf afamba aeꞌ endaꞌ bousi ineꞌisi sogafeꞌ lafela boꞌwagah ineꞌigahi.”
God ina naꞌipa anona ensela basef ifimba, owaꞌatin. Naꞌipa nogamana ananinai atona.*Sam 34:7, 91:11 14 Deiꞌ amom ensel mamahoma? Amom ambagof buꞌwagufi mandaꞌmana maol Godii. Anen nasapaꞌam mafiꞌi ma mogatopalopa epes isimba deiꞌ God nofaꞌas sogotanimai ma anaf sogofaꞌ poe buꞌwani.