3
Jon nagapisiꞌas embeli nawalapa basefa ufiaꞌw Jisasi
(Mt 3:1-12; Mk 1:2-8; Jo 1:19-28)
1 Anagol afagol anona gavman dembinai esis Romi Taiberius Sisar nagape dembinai ma itap luꞌupa hiagoma esis Romi afagof 14-pelaiguf hiꞌalagofa anagol wapani, gagafeꞌma 15-pelaigufi, Pontius Pailat ataꞌ nape dembinai gavmana walemb hielimbi agol Judia. Anona aman Filip nape gavman dembinai numafi itap apamba luꞌupa Ituriai Trakonitis walemb hielimbi. Eaꞌ owamana ananinai Herot ataꞌ nape dembinai numafi walemb hielimbi agol Galili. Anona aman Lisanias nape dembinai gavman numafi hiagoma agol luꞌwagola Abileneai.*Lu 1:80 2 Eaꞌ afagol agalemba atogol Anasi Kaiafas amom biam pris dembami mape magaliꞌma pris hiamii. Nogota atamba ma afagol agalemba basef Godi fafiꞌmai Jon, Sekaraia nogamana. Anen nape anep itap wafigima epes akagoma, nemaf afamba basef Godi fafiꞌmai anen.*Ap 13:24, 19:4 3 Eaꞌ nafeꞌ anamba hiagoma walemb Jordan naꞌipasa basef Godi amam ne matawa. Naꞌipasa sombema nelelemb sowaꞌ alafugaha waf awafi sofaꞌ baptais embela God nokwahomasa waf awafi asasifi okom mogasoꞌanaf.*Ais 40:3-5 4 Anen nawalapa basef ifimba Godi siꞌi profet Aisaia fowaꞌ nawalapef nandaꞌef fagail buk Baibeli fagaꞌi,
“Anep itap wafigima fataupigima, malogol anona amani anaf noga niꞌi, ‘Pendondomba ufiaꞌw Dembinaii, pendaꞌ ufiawa ofeꞌ usiꞌiwa. 5 Pesa anamba kwambiwah afogoma ma siꞌigin dondoꞌ atin, petopaꞌ halafutagw laumi bandami hiami ma mowala dondoꞌam. Dilindilaꞌma pendaꞌagon usiꞌigin. Eaꞌ ufiawa awamba wandaꞌ lotasilaꞌi sondaꞌawa andeandeꞌ. 6 Amam nematawa hiasi hiꞌilas anaf siti God nogatopalopa anis amam nematawa nofaꞌas nokwahomas waf awafi nowambelas sugutanimai.’ ”*Mt 12:34, 23:33
7 Hiasi amam nematawa safiꞌmai Jon ama saꞌi nogapisiꞌas embel. Eaꞌ naꞌipas naꞌi, “Ipaꞌ pandaꞌ waf awafii, siꞌi batawis ul aunaii logolaipai. Ami naꞌipipa ma paꞌi pefaꞌ pefeꞌ pindihiꞌama okom wandafunai Godi anaf naꞌi nogatagama ipeꞌi?*Jo 8:33,39 8 Apaꞌ deiꞌ aꞌipipa aꞌi pendaꞌ waf fasifi ma pigihimbaꞌmas ipaꞌ aꞌ pambema nelelemb endilisi paila waf buꞌwafi. Ipaꞌ ina aꞌ ukup pendandaꞌ piꞌi, ‘Abraham ahamapa apeꞌinai’, naꞌamba ipaꞌ eaꞌ fasipai, owaꞌ, hapaimi. Aeꞌ aꞌipipa endilisi, God anen laꞌifinai ma nondaꞌ otamba atemba begataga epes siꞌi awasi Abrahami.*Mt 7:19 9 Tamiaꞌw akwandandombol kwaꞌoha kogatopaꞌ lawah kofagah nombalefima. Lawah mamahogaha owaꞌ hil hogola saꞌutip buꞌwapia, agahemba atiasi solagah sotopaꞌagah hefeꞌma nif.”
10 Anen naꞌias eaꞌ, esis hiasi sahaliꞌana saꞌi, “Apaꞌ atiasi mondaꞌ maina mondaꞌ waf fasifi God nagaꞌiefi?”
11 Eaꞌ Jon naꞌipas naꞌamba naꞌi, “Epen ami siaogw biagw atogwi nekwahomana anota anin siot akani, eaꞌ ami gwaꞌaisi sagaꞌomani inimba nendaꞌas newalogas wapani.”*Lu 7:29
12 Eaꞌ anom amam awami mogofaꞌ takisi mafiꞌmai Jon maꞌi nupisiꞌam embel eaꞌ mahaliꞌana maꞌi, “Dembinai, atiasi afaꞌ ondaꞌ maina ogahapila basef fasifi Godi?”
13 Anen naꞌipam naꞌi, “Ipaꞌ pefaꞌ otamba bendahama siꞌi gavman nagaꞌipipambai atemba. Ipaꞌ ina pefaꞌ anemba wapani, owaꞌi.”
14 Eaꞌ anom soldia mafiꞌi mahaliꞌana maꞌi, “Afaꞌ atiasi ondaꞌ maina ogohapila basef Godi?”
Anen nagwamam naꞌipam naꞌi, “Ipaꞌ ina aꞌ pembasoꞌma epes piumbalis pendaꞌas ombel mohas pendaꞌmas kot pendelelaepasa moni asasini dowaf, owaꞌi. Nelelemb ipeꞌilimbi bendape awanelemba otamba ipeꞌimbai dondoꞌma ikwaf amom dembami mandandepafi.”
15 Eaꞌ deiꞌ nomonas esis amam nematawai mosafel banagem, eaꞌ hiasi ukup pandandaꞌma Jon saꞌi, “Jon anen Krais, maꞌuna God nandandepana nasapaꞌana nafiꞌii, aꞌa owaꞌ?”*Ap 13:25
16 Eaꞌ Jon nagwamasa basef naꞌipas naꞌi, “Aeꞌ apisiꞌipa embel atembal. Apaꞌ anona aman atiasi nigiꞌ nugafiꞌii, anen banagonai nikilaꞌ aeꞌ. Aeꞌ ina aman buꞌuwai ma egatagwaha mandelefa su ananimi, owaꞌatin. Anef nemaf anen neseꞌepa Ambal buꞌwali Godi nogape opalef ipeꞌilifi nomon eaꞌ neseꞌepa nif wapani. 17 Anen nahapila anol savol lagof ananigufi ma nigasimbaꞌ wit siꞌi rais amamba andeandeꞌ. Ama nofaꞌ wit buꞌwinai nuwis nembeꞌana ipat ananitai. Apaꞌ duꞌwaꞌwanimi awasimi nembeham nofam nif amamba luꞌwami fandom atapim magapani.”
18 Deiꞌ Jon nawalapa anif basef daif hiafi wapani ma nogasaꞌma ukup asasipi ma sondaꞌ waf buꞌwafi. Eaꞌ nawalipasa basef buꞌwafi.*Mt 14:3-4; Mk 6:17-18
Herot nandaꞌ kalabusima Jon
19 Owaꞌ Jon nandaꞌ megahaha aman anamba Herot, gavman dembinai asasinai, ma waf awafi hiafi anen nandaꞌafi. Anen nandalombana Herodias nemataꞌw sahomana nagasoꞌakwi, eaꞌ nandaꞌ anef waf awafi hiafi wapani. 20 Deiꞌ nowatani anef wapani ma nandaꞌ Jon nandaꞌ kalabus.
Jon napisiꞌ Jisas embel
(Mt 3:13-17; Mk 1:9-11)
21 Jon napisiꞌa amam nematawa hiasi ma eaꞌ, napisiꞌ Jisas wapani. Jisas nofaꞌ baptaisa eaꞌ, anen ataꞌ nandabeten atin owaꞌ, heven aꞌ nandawisiꞌ.*Jo 1:32; Mt 17:5; Lu 9:35 22 Eaꞌ Ambal buꞌunai Godi nisilaꞌi siꞌi amil alamba apaꞌ magaꞌi maꞌunai nufiaꞌ nisilaꞌmai anen. Eaꞌ anagol malagol gaꞌi gatagai heven gaꞌi anef basef gaꞌi, “Inaꞌ Nogame aeꞌinai endilisi. Aeꞌ okom mohafel maimailina aꞌowaꞌ. Okom aeꞌami fasima inaꞌ.”*Lu 4:22; Jo 6:42
Agofa miniꞌap bafapanai Jisasi
(Mt 1:1-17)
23 Afamba Jisas nagasefela maol, afagof ananigufi fataga 30-pelaiguf. Esis amam nematawa ukup pandandaꞌ dowaf paꞌi Jisas nogama Josepi. 24 Bafapana Jisasi agufuma amamba. Josep, Heli nogamana. Eaꞌ Heli, Matat nogamana. Eaꞌ Matat, Livai nogamana. Livai, Melki nogamana. Melki, Janai nogamana. Eaꞌ Janai, Josep nogamana. 25 Josep, Matatias nogamana. Matatias, Amos nogamana. Amos, Nahum nogamana. Eaꞌ Nahum, Esli nogamana. Eaꞌ Esli, Nagai nogamana. 26 Nagai, Mat nogamana. Mat, Matatias nogamana. Eaꞌ Matatias, Semen nogamana. Eaꞌ Semen, Josek nogamana. Josek, Joda nogamana.*1 Kro 3:17,19; Esr 3:2 27 Joda, Joanan nogamana. Joanan, Resa nogamana. Resa, Serubabel nogamana. Serubabel, Sealtiel nogamana. Sealtiel, Neri nogamana. 28 Neri, Melki nogamana. Melki, Adi nogamana. Adi, Kosam nogamana. Kosam, Elmadam nogamana. Elmadam, Er nogamana. 29 Er, Josua nogamana. Eaꞌ Josua, Eleasar nogamana. Eaꞌ Eleasar, Jorim nogamana. Jorim, Matat nogamana. Eaꞌ Matat, Livai nogamana 30 Livai, Simeon nogamana. Eaꞌ Simeon, Juda nogamana. Juda, Josep nogamana. Eaꞌ Josep, Jonam nogamana. Jonam, Eliakim nogamana.*2 Sml 5:14 31 Eliakim, Melea nogamana. Melea, Mena nogamana. Mena, Matata nogamana. Matata, Natan nogamana. Natan, Devit nogamana.*1 Sml 16:1-13; Rut 4:17-22 32 Devit, Jesi nogamana. Jesi, Obet nogamana. Obet, Boas nogamana. Boas, Salmon nogamana. Salmon, Nason nogamana.*Jen 29:35 33 Nason, Aminadap nogamana. Aminadap, anen Atmin nogamana. Atmin, Arni nogamana. Arni anen Hesron nogamana. Hesron, Peres nogamana. Peres, Juda nogamana. 34 Eaꞌ Juda anen Jekop nogamana. Jekop anen Aisak nogamana. Aisak, Abraham nogamana. Abraham, Tera nogamana. Tera, Nahor nogamana. 35 Nahor, Seruk nogamana. Seruk, Reu nogamana. Reu, Pelek nogamana. Pelek, Eber nogamana. Eber anen Sela nogamana.*Jen 11:10-26 36 Sela anen Kainan nogamana. Kainan, Arpaksat nogamana. Arpaksat, Siem nogamana. Siem, Noa nogamana. Noa, Lamek nogamana. 37 Lamek, Metusela nogamana. Eaꞌ Metusela, Enok nogamana. Enok, Jaret nogamana. Jaret, Mahalalel nogamana. Mahalalel, Kainan nogamana.*Jen 4:25–5:32 38 Kainan, Enos nogamana. Enos, Set nogamana. Set, Adam nogamana. Adam, God nogamana. Bafapana Jisasi eaꞌ maꞌum.