1 Jisas naꞌipa alipumi ananimi naꞌi, “Anona aman hiahaom hiamunai naoꞌwa anona ananinai nugumafi maol ananinii nape. Eaꞌ anis safiꞌmai aman anamba hiahaom hiamunai sasapaga anen nandaꞌmana maoli ma basef saꞌi, ‘Nugumafi maol ineꞌinii anen nakwaha otamba hiambai ineꞌimbai bafeꞌ dowaf.’

2 “Eaꞌ nofala aman anamba nugumafi maoli nafiꞌi naꞌipana naꞌi, ‘Deiꞌ maina basef ifimba aeꞌ agameꞌasefa ineꞌi? Inaꞌ nefeꞌ niamba hiahawes aeꞌasi sagape lagol ineꞌigili newalapas. Ina ataꞌ nepe nimafi maol aeꞌani wapani, aꞌowaꞌ.’

3 “Eaꞌ nugumafi maoli nomonas salasafeꞌ ma nembel ananimbili naꞌi, ‘Aeꞌ atiasi ataꞌ endaꞌas iꞌimama? Dembinai naꞌi niliꞌamone ma epe igimafi maol deiꞌ. Aeꞌ ina laꞌifiwi ma egawala itap. Eaꞌ ambal aola indaila anis epesa gwaꞌaisi mais. 4 Owaꞌ aeꞌ nomonas sandandaꞌma anis hiahawes eaꞌ ma endaꞌasa atiasi epes sofaꞌe efeꞌ ifagw asasigwi ma nemaf afamba dembinai nigaliꞌamone ma maol inimba deiꞌ andaꞌani.’

5 “Eaꞌ nofala amom hiami atona atin wialef figataomami mafiꞌmai anen. Anona aman naliꞌ nafiꞌmanai nahaliꞌana naꞌi, ‘Inaꞌ wialef maꞌulif fapoma dembinai aeꞌanai?’

6 “Eaꞌ anen naꞌi, ‘Darep wel luꞌwapi 100-pelaip.’

Eaꞌ naꞌipana naꞌi, ‘Inaꞌ kwafalis nepe niti tiketa wiaf nendaꞌ amefa darep 50-pelaip atip fil.’

7 Ama main, anona nataga nahaliꞌana naꞌi, ‘Wialef ineꞌimi maꞌufim?’

“Anen naꞌi, ‘Begah witigah 100-pelaigah.’

“Eaꞌ naꞌipana naꞌi, ‘Inaꞌ nefaꞌ tiket atamba wiaf ineꞌifi fagailatai eaꞌ nendaꞌ 80-pelaigah.’*Ef 5:8; 1 Te 5:5

8 “Eaꞌ aman dembinai nasaꞌma agola aman anamba aunai nugumafi maoli. Deiꞌ main, anen nandaꞌ waf gawaifi siꞌi aman nomonas sagapaunai. Epes ukup asasipi pagapagaila hiahawes mais sagape itap apaꞌii esis sandaꞌ maola waf gawaifi siꞌi epes nomonas sagapaisi sikilaꞌ epes sagape nogogalaꞌmai owaꞌ sogogawa andeandeꞌia.”*Mt 6:20; Lu 14:14

9 Eaꞌ Jisas naꞌi, “Aeꞌ aꞌipipa ma moni uga maim magaꞌoh itap apaꞌii, ipaꞌ pendaꞌ anis amam nematawa sotaga alipisi ipeꞌisi. Ama main, iꞌi nemaf esis sogahapila uga moniafi hiꞌigalaf, daoꞌ atiasi God niꞌi ahoꞌma nofaꞌepa pefeꞌ ifagw pegape andeandeꞌ lifilafiagwi.*Lu 19:17-26 10 Ami nimafi hiahawes saꞌwisi andeandeꞌ datima, anaf nimafi hiahawes luꞌwasi andeandeꞌ wapani. Apaꞌ epen ami nembasoꞌam, owaꞌ nendaꞌ maol andeandeꞌma hiahawes saꞌwisaꞌwisia, anaf anin ina nendaꞌ hiahawes luꞌwasi andeandeꞌ wapani, owaꞌatin. 11 Ipaꞌ iꞌi owaꞌ pimafi moni uga maim magape itap apaꞌea, anaf ami neseꞌepa hiahawes buꞌwasi endilisi pigimafias? Owaꞌatin endilisi. 12 Ipaꞌ iꞌi owaꞌ pimafi hiahawes anis epesia, ami neseꞌepa hiahawes ipeꞌisi atis pimafias? Owaꞌatin.*Mt 6:24

13 “Ina anin epen nandaꞌ maoli laꞌifin nihapila maol biafina amam dembami biam, owaꞌatin. Naꞌamba okom mila anona, anona aꞌ nesambalona. Eaꞌ naꞌamba atin ipaꞌ ina aꞌ laꞌifipa pepe lafela God noloma ugai moni wapani, owaꞌ.”*Mt 23:14

14 Ama amom Farisi magameꞌ basef ifimba hiafi Jisas nagaꞌiefi, amom mandaꞌmana waꞌap anen. Deiꞌ main, amom ukup pagapagaila moni atini.*Mt 23:28; Lu 18:9-14; Pro 6:16-17 15 Owaꞌ anen naꞌipam naꞌi, “Ipaꞌ pandaꞌ ipaꞌ patagama epes sandaꞌ waf usiꞌifi ma nogohnaep epesi. Apaꞌ God nogawa ukup ipeꞌimi nomon. Hiahaom epes sagasaꞌma agofami sagatalom otamba hiambaii, amamba falafumi atoma naep Godi.*Mt 11:12-13 16 Basef amom profet magawalipasafi basefa fagail muꞌuli God nagasoꞌ Mosesani ifimba amom mawalipasef atapif fape mafiꞌi metambel nogota Jon nagatagatai. Apaꞌ nogota atamba Joni tafiꞌi tataga deiꞌ basef fasifi ma epes sogawis nomona maol Godi nope Dembinai nugumafias, ifimba fape fafeꞌ fataga walemb hiagoma. Eaꞌ epes hiasi hiꞌalas dindinapis sandaꞌ maol luꞌwani aꞌowaꞌ ma sofeꞌ sogawis nomona maol inimba Godi.*Mt 5:18 17 Anif basef duꞌwanifa amef saꞌusaꞌufi feloma anif basef bandafi fagail nomona buk muꞌuli Godi ina anaf fefeꞌ higililif lamonef hiꞌilif, owaꞌatin. Fepe atapif fikilaꞌ itapi otaga anaf higiligalasi.

18 “Aman ami nagakwaha wauluꞌmana ananiꞌwi ma nogasoꞌ anoꞌw daiaꞌw wapanii, anen nandaꞌ soꞌa waola nemataꞌw akwamba naliꞌ nagasoꞌakwi. Eaꞌ aman ami nasoꞌ anoꞌw nemataꞌw fowaꞌ anona aman nagaliꞌamonaꞌwi aman anamba nagiꞌ nagasoꞌakwi wapani nandaꞌ waf awafi soꞌa waola nemataꞌw akwamba.

19 “Anona aman hiahaom hiamunai nape. Dondol anen nala siaogw fasifasigwi atogw a luwaguf buꞌwafi sagatalif otamba hiambaii. Eaꞌ nimaguf hiafi dondol nondofaꞌ gwaꞌaisi buꞌwasi atis nandape andeandeꞌ aꞌowaꞌ. 20 Apaꞌ felefeleꞌma ipat ananitai anona aman kwahunai nandailasa gwaꞌaisi moni maisi nape, agilinama Lasarus. Alop ananipi siꞌipa ilambeh.*Mt 15:27 21 Anis epes sofaꞌana safiꞌi naꞌoh felefeleꞌma ipat aman anambai. Anen naꞌi notatama gwaꞌaisi duꞌwaꞌwanisi sowa sagaꞌoh tebol lafelena aman anamba hiahaom hiamunai ma ataꞌ neaꞌas nogasoꞌ opaf. Eaꞌ anogw nombagw gwafiꞌi gwapaloꞌmana ilambeh ananimi afegah agwagugahi.

22 “Aꞌi owaꞌ main, aman anamba falafunai nagaꞌ, eaꞌ anom ensel mofaꞌana mafeꞌ mahaponana nape wambel buꞌwambili felefeleꞌma Abraham. Eaꞌ aman anamba hiahaom hiamunai anen wapani nagaꞌ, sawana. 23 Owaꞌ nafeꞌ wambel awambili hel nofaꞌ akef luꞌwami. Eaꞌ natologon nafeꞌ ilif, nati Abraham napani laogon aꞌowaꞌ, Lasarus nape nalomana. 24 Eaꞌ nofalana naꞌi, ‘Ahame Abraham, inaꞌ niti uwahipiwi nesapaꞌ Lasarus nufiꞌi nola faf ananifi duꞌwanif embel nupihiꞌmi afega aeꞌagai kwasakwasala. Aeꞌ ameꞌ akafimi awami endilisi ma nif ifiꞌi.’

25 “Owaꞌ Abraham naꞌipana naꞌi, ‘Nogame, inaꞌ okom mondandaꞌma fowaꞌ ataꞌ nagape namina itap nefaꞌ hiahaom fasimi atom. Apaꞌ Lasarus nofaꞌ hiahaom hiami awami. Owaꞌ deiꞌ wambel ambaleꞌe nembel ananimbili bape fasimbil, apaꞌ inaꞌ nefaꞌ akafimi awami. 26 Eaꞌ anis maefah wapani sape. Laꞌafena apaꞌ maloma ipaꞌ God nandaꞌ anona kwambiwag luꞌunai. Naꞌamba epes sagape naꞌai ma saꞌi sotopaꞌ kwambiwag anamba sogafoꞌo ma ipaꞌ, esis ina laꞌifis. Eaꞌ epes sagapani naꞌambai, esis ina laꞌifisa sotopaꞌi kwambiwag sigafiꞌmai apaꞌ, owaꞌatin.’

27 “Eaꞌ aman anamba naꞌi, ‘Ahame daoꞌ. Aeꞌ aꞌi inaꞌ nesapaꞌo Lasarus notanima nofoꞌo ipat ahame aeꞌanai. 28 Aeꞌ anom owape wanom biam mapani. Ama Lasarus niꞌipama banagafi amom. Naꞌamba amom wapani mufiꞌi wambel ambaleꞌe mofaꞌ akafimi luꞌwami.’

29 “Owaꞌ Abraham naꞌipana naꞌi, ‘Owaꞌ. Owapena ineꞌimi mondameꞌago basefa Moses noloma amom profet fetopalopam. Amom mondameꞌago basef fafimba.’

30 “Eaꞌ naꞌipana naꞌi, ‘Ahame Abraham, owaꞌatin. Ina atiasi momeꞌam, owaꞌ. Apaꞌ iꞌi anin epen nagagaꞌi nesafel wandofa negafeꞌma amom, daoꞌ bola memeꞌan mombema nelelemb.’*Jo 11:44-48

31 “Owaꞌ Abraham naꞌipana naꞌi, ‘Owaꞌatina mogameꞌ basefa Moses noloma amom profetia, eaꞌ atiasi anin epen nagagaꞌi nitanima negesafel wandof, amom ina atiasi mohapifa inimba wapani, owaꞌatin.’ ”