22
Basef waminif atina esis safiꞌi sandaꞌ gwaꞌaisi luꞌwasi ma bias sandasoꞌamai
1 Eaꞌ Jisas nandaꞌ anif basef waminif atin wapani naꞌi, 2 “Epes sogawis nomona maol Godi nope Dembinai nugumafias siꞌi anona king dembinai itapnai. Nogamana ananinai naꞌi nogaoꞌwa akoꞌw, eaꞌ king anamba nandaꞌ anis gwaꞌaisi luꞌwasi. 3 Ama nemaf afamba sogaꞌasafi anen nasapaꞌ amam amamba mandaꞌ maola anini mafeꞌ mofalai epes isimba fowaꞌ nogofalasi ma sogafiꞌmai gwaꞌaisi isimba. Owaꞌ sandaiwaꞌma sogafiꞌi.*Mt 21:36
4 “Eaꞌ anen nasapaꞌ anom wapani mandaꞌ maola anini motambel mafeꞌ, eaꞌ naꞌipam naꞌi, ‘Ipaꞌ foꞌmago epes isimba aeꞌ eaꞌ andandepas sagapani eaꞌ piꞌipas naꞌamba piꞌi, “Pemeꞌ, aeꞌ andandomba gwaꞌaimi aeꞌami eaꞌ. Mafis bulmakau suwafumi a mafis amamba luꞌwami aeꞌami, apaꞌ maham. Eaꞌ hiahaom hiami mandandombol maꞌoh eaꞌ. Ipaꞌ pifiꞌmai gwaꞌaisi isimba endaꞌasa nogame nogasoꞌ akoꞌwi.” ’
5 “Owaꞌ amom ukup iwanipa momeꞌefa mogafeꞌ eaꞌ mandambema mandafeꞌ daindai ma maol amamini. Anona nafeꞌ aof, anona nafeꞌma bisnis ananisi.*Mt 21:35 6 Apaꞌ amom magapani mombaloꞌ amamba mandaꞌ maola kingi mandaꞌam kwapeteꞌam maham afum. 7 Eaꞌ king anamba nembel wandafuna nasapaꞌ soldia ananimi mafeꞌ maha amom mandaꞌ maola anini afum hiꞌalam. Eaꞌ makata maofa wambel amamimbili wapani. 8 Eaꞌ king naꞌipa amom mandaꞌ maoli naꞌi, ‘Gwaꞌaisi endaꞌasa nogame nosoꞌ akoꞌwa sogaꞌasi eaꞌ sandandombol saꞌoh, apaꞌ epes isimba aeꞌ igifalasi, ina sandaꞌ waf andeandeꞌma sogafiꞌi, owaꞌ. 9 Naꞌamba deiꞌ ipaꞌ pefeꞌ ufiawa awamba hiawai dawalegefa pigati isimba epes hiasi piꞌipas pefalas sifiꞌmai gwaꞌaisi isimba luꞌwasi dasoꞌamaisi.’ 10 Anen naꞌias naꞌamba ma main, amom mandaꞌ maoli mafeꞌagon gani gani ufiawa dawalegef matamai epes isimba magatilisi, epes buꞌwasi saloma awasisi. Eaꞌ safiꞌi sape ipat atamba sondasoꞌama ma aꞌ siꞌita kwaef endilisi.
11 “Esis sape eaꞌ dembinai king nawis nomona nigatilis. Eaꞌ nati anin epen atitin, ina nala klos sagalasa nemaf afamba dasoꞌamaifii, owaꞌ. 12 Eaꞌ king naꞌipana naꞌi, ‘Alipunai, deiꞌ maina inaꞌ owaꞌ nila klos isimba sandasoꞌamaisi nifiꞌi niwisi naꞌaea?’ Owaꞌ, anen ina naꞌi anif basef, owaꞌatin.*Mt 8:12, 25:30; Lu 13:28
13 “Eaꞌ king naꞌipa amom mandaꞌ maoli naꞌi, ‘Ipaꞌ piwasiꞌ lagof boꞌwagaha epen inimba pikwahin nefeꞌ niwis nepe akot andoꞌ. Akot atamba atiasi anin nelef nendaꞌ nalelef tilili talalaꞌ kwapeteꞌ nepe.’ ”
14 Eaꞌ Jisas naꞌipas naꞌi, “Ahoꞌ, God nogofala epes hiasi naꞌamba atin siꞌi king anamba nandaꞌas. Anen nofala hiasi, apaꞌ owaꞌ nandandepa atona atin sufiꞌi suwis sope sogalomana.”*Mk 3:6
Amom mahaliꞌ Jisasa nogasoꞌana takis gavman dembinai Sisar Romunai
(Mk 12:13-17; Lu 20:20-26)
15 Eaꞌ amom dembami Farisi mafeꞌ mandaꞌ basef maꞌif mandameꞌmaefa mogowaꞌ Jisas. Amom maꞌi memeꞌ anif basef ananifi owaꞌ andeandeꞌia ma mondaꞌmana basef mogowaꞌana siꞌi sogapaloꞌ agof anembeh. 16 Eaꞌ masapaꞌ alipumi magaila amomi maloma amam amamba anep miniꞌap Heroti amom mafeꞌma Jisas maꞌi, “Dembinai Tisa, afaꞌ ogawena, inaꞌ aman nagaꞌi endilisii. Ina ombel magahinai, owaꞌ. Owaꞌ nigaꞌipasa anif basef isimba anis agof luꞌwagufisia a anif basef daifa isimba agof akasi falafisia, owaꞌatin. Inaꞌ nagaꞌipas basef atifif endilisifi atif Godi amam nematawa hiasi dondoꞌ atin hiꞌagalasi. 17 Eaꞌ daoꞌ inaꞌ niꞌipafa. Deiꞌ inaꞌ okom mandandaꞌ maꞌimama? Muꞌuli apeꞌini naꞌi andeandeꞌma apaꞌ mogasoꞌana takis Sisar gavman dembinai esis Romi aꞌa owaꞌ?”
18 Owaꞌ Jisas nogawa eaꞌ ma waf awafi amamifi eaꞌ naꞌi, “Ipaꞌ amam pagaꞌi malogof biagufi, deiꞌ maina ipaꞌ pagagwamba aeꞌ? 19 Ipaꞌ himbaꞌme anin moni takisini ma ataꞌ itilin.”
Eaꞌ mofaꞌmanai anin moni ma natilin 20 nahaliꞌam naꞌi, “Ambal laloma agol isimba sagaili amisi?”*Ro 13:7
21 Eaꞌ maꞌi, “Isimba Sisari gavman dembinai.”
Eaꞌ nagwamam naꞌipam naꞌi, “Daoꞌ hiahawes dembinai Sisari, isimba peseꞌanas Sisar. Apaꞌ hiahawes Godi, peseꞌanas God.”
22 Amom mameꞌanama basef ifimba eaꞌ gogolalasom kwapeteꞌam makwahana aꞌ mafeꞌ.*Ap 23:8
Amom mahaliꞌ Jisasa epes sagagaꞌi sotanima sogosafel wapani
(Mk 12:18-27; Lu 20:27-40)
23 Nemaf afamba atef anom amam anep miniꞌap Sadyusi, mafiꞌmai Jisas. Amom miniꞌap apamba magahapifa sagagaꞌi ina atiasi sotanima sosafel wapani, owaꞌatin. Eaꞌ amom mafeꞌ mahaliꞌ Jisas*Diu 25:5 24 maꞌi, “Dembinai Tisa, Moses naꞌi, ‘Iꞌi anona aman nogaꞌ ma anen awasi akana, eaꞌ owamana nosoꞌ wauluꞌmana ananiꞌwi nola anis awasi ma sogahaꞌofana.’ 25 Eaꞌ fowaꞌ anom amam apeꞌimi ambep atetep mape laꞌafena apaꞌ, amom 7-pelaim. Nagaliꞌi sahomam nasoꞌakw awani akaꞌw nagaꞌ, nakwahoꞌw kwape. Eaꞌ owamana nasoꞌakw nagaꞌ nakwahoꞌw kwapani awani akaꞌw.
26 “Eaꞌ owamana nandatuꞌunai wapani nandaꞌas naꞌamba atin, eaꞌ anona nandatuꞌumi nasoꞌakw mandaꞌas naꞌamba atin mafeꞌ mafeꞌma matagama owagufunai akutainai. 27 Amom amamba ambipim eaꞌ mandagaꞌ atin hiꞌandalam. Ama main, nemataꞌw wauluꞌmam kwagiꞌmam kwagiꞌ kwagaꞌ. 28 Anaf esis sagagaꞌi sogosafel wapani, nemataꞌw akwamba kwagasoꞌ amom 7-pelaimi anaf mamahonama nosoꞌakw? Amom 7-pelaim aꞌ masoꞌakw atin hiꞌalam.”
29 Eaꞌ Jisas nagwamam basef amom naꞌi, “Ipaꞌ owaꞌ pegawa basef Baibel nagaꞌiefia, eaꞌ owaꞌ pagawa banagami Godia. Eaꞌ ipaꞌ deiꞌ ina paꞌi basef andeandeꞌ, owaꞌatin. 30 Nemaf afamba sagagaꞌi sokwaha wandelef sotanima sogosafel wapani, amam nematawa ina ataꞌ sondasoꞌama wapani, aꞌ owaꞌatin. Sope dowaf siꞌi ensel magape heveni. 31 Apaꞌ basef ifimba esis amam nematawa sagagaꞌi sogosafel wapani, ipaꞌ patalifa basef ifimba God naꞌif fagape Baibeli eaꞌ. Anen nagaꞌipipa naꞌamba naꞌi,*Eks 3:6; Mt 8:11 32 ‘Aeꞌ God Abrahami, Aisaki a Jekopi.’ Basef ifimba faꞌi God ina Dembinai ma epes isimba sagagaꞌii, owaꞌatin. Anen God epes isimba ambal lapais sagape namisii.”
33 Esis amam nematawa sameꞌ naꞌamba sosafel gogolalasisa basef ananifi.
Muꞌuli nagaliꞌi Godi
(Mk 12:28-31; Lu 10:25-28)
34 Jisas aꞌ nasopama malogofa amam amamba dembami Sadyusi ma basef ifimba. Naꞌamba anom amam dembami Farisi mameꞌ basef ifimba a mandakolasi mafiꞌi felefeleꞌma anen. 35 Eaꞌ anona nagaloma amomi nogogawa muꞌuli Godi naꞌi nogwamba Jisasa nigaꞌi anif basef owaꞌ andeandeꞌa ma nondaꞌmana basef sogowaꞌana siꞌi sogapaloꞌ agof anembeh. Eaꞌ nahaliꞌana naꞌi, 36 “Dembinai Tisa, muꞌuli Godi mamahina luꞌwin nikilaꞌ muꞌuli daian hiani nape nagaliꞌi?”*Diu 6:5
37 Eaꞌ Jisas naꞌipana naꞌi, “Nomonas ipeꞌisi sehafel Dembinai God ipeꞌinai sisilana naꞌamba. Ukup ipeꞌipi pipilana hiꞌindalep, peseꞌana ambagufi nelelemb ipeꞌisi pendasoꞌanas hiꞌindalasa Dembinai God atona.*Lev 19:18 38-39 Muꞌuli inimba luꞌwani, nagaliꞌ endilisii. Eaꞌ muꞌuli nagagiꞌi inimba, ‘Ipaꞌ ukup pipila anis epes sagape felefeleꞌma ipeꞌi, siꞌi ukup pagapagaila ipaꞌ atipa.’*Mt 7:12; Ro 13:10; Ga 5:14 40 Basef kofagefa ma muꞌuli hiani Godi faloma basef amom profet mandaꞌafi hiafi hiꞌalef fape nomona muꞌuli inimba biafin.”
Jisas nahaliꞌ amom dembami Farisi ma Krais, anen God nasapaꞌana nagafiꞌii
(Mk 12:35-37; Lu 20:41-44)
41 Amom Farisi ataꞌ munduwaꞌanima malutu atin, Jisas nahaliꞌam*Jo 7:42 42 naꞌi, “Ipaꞌ ukup pandandaꞌ paꞌimama ma Krais anen God nandandepana eaꞌ ma nosapaꞌana nogafiꞌii? Anen nogama amii?”
Eaꞌ maꞌipana maꞌi, “Devit nogamana.”*Sam 110:1; Mt 26:64
43 Eaꞌ nahaliꞌam naꞌi, “Deiꞌ maina Ambal buꞌunai Godi nagasaꞌma nomonas Deviti ma nagaꞌi Krais anen Dembinai? Devit fowaꞌ naꞌi,
44 ‘Dembinai God naꞌipa Dembinai aeꞌani naꞌi,
“Inaꞌ nepe lagol kwahisigili aeꞌagili atapina nefeꞌ netagama anaf aeꞌ endaꞌ bousi ineꞌisi sogafeꞌ lafela boꞌwagah ineꞌigahi.” ’
45 Devit fowaꞌ nofala Krais naꞌi Dembinai. Isimba atis deiꞌ Krais ina aman atona falafunai, owaꞌ. Anen Dembinai.”
46 Eaꞌ ina anona aman laꞌifina ma nogagwamana basef Jisas, owaꞌatin. Aꞌi owaꞌ nemaf afamba owaꞌ, amom hiami ombel mahama mogahaliꞌanama anif basef wapani. Owaꞌatin nafiꞌi nafiꞌi nataga deiꞌ wapani nafeꞌ atin.