1 Nasi ö muenoꞌe God-hu ëhi mae vaejavuoröhëni uövuadohuni ëhuni mu sisë ahoꞌobëhe vaeꞌamego ëhuro sino hahoꞌo dë vövöbajoꞌo sisërëjavuajoho ëꞌego no ëho goroꞌi God gemu börömoho hö uehorovoromo mu mae gemu vaeromo avoho raromoꞌiro.

2 Jemesi dë vövöbajoꞌe ahoꞌo nosi öroro bojamuire. Nomë aho bogo sisëꞌioho vaejëvëꞌe javue. Aho bogo ijumëvëꞌe javue. Jemesi bövioho biseꞌoho bogo sarerisareriëmiromo ujuohëhëꞌe javue. 3 Ëjöho na bogo uëromo ëꞌe: Jemë a sisë jëvajëjo. Na mamiꞌe uëvodeje: Jemë nosi dë vövöbajoꞌere jëvajëjo ëhuro no biririvoromo raromëꞌoho o vuovavuëꞌoho jemëꞌo noꞌo gemuoro javuoröhego. 4 Na jemesi örire mae uehorovëvo avohajeje. Jemesi jöëni sisë maro nimoroheve. Iae no huë vavaene ahoꞌo javue röhu na herove nasi dë vövöbajoꞌere huë sanue rue avohoromo sasohevoꞌego.

5 Iae no Macedonia saꞌare rueromo uvareje: Nosi dë vövöbajoꞌoho sanuovavuoꞌajëjo röhu bogo. Aꞌi huë vavaene ahoꞌo nosi örire ruenövohijo. Gahijo anaguo biraguoꞌe vaeꞌi ariꞌego. Nosi uhure juhuone rojomohijo. 6 Röhu God-hu huë vavaeni sanuamuijaje ahuro jiëꞌëro Titus nugöꞌöjamu rovadohuro ëhuro no sanuamuamu biririvavuadeje. 7 Röhu bogo huhu rueromo sanuamuijadohuremu jioꞌi aꞌi Titus-hu jemesi örire huë sanu baejade jöho no hejamu ëhuro God-ro nosi dëho sanuamuijadeje. Huro rueromo uövuadeje: Corinth ariböviohuro nörö gaꞌi nimohijajo. Jabesi sisëni vavaenimohijajo. Nöruare örire ajamiꞌi nimohijajo. Iae ëhuni avevejöꞌoho na nimorohevo avohe.

8 Naro urimëꞌi uruꞌö jöho jajivoromo nugöꞌöjamu jemëro garomo huë vavaene baejarijeje. Iae ëhi ëꞌodeje röhu na bogo uehore gö baeromo uvajeje: Uruꞌö jöho rabëni jajivode höjo. Röhu urimo na uvodeje: Na rabëni jajivode höjo. Na gavajoho jemë huë vavaeni baejarijoho ëho majae ma-bisemu baeromo barëjadeje. Ëhi jie röhu iae baejarijeje. 9 Aꞌi jaruvo na jö jajivodoho dë mae jeve bogo vavaeni bojëmijodohuni aꞌi jemëhu vavaeni baeromo ëhuni huotorovoromo avoho uehorovarijohuni. God-hu nimaje ëhi jiëꞌe vavaenoho baejarijeje. No bogo ëhuro jemë sisë vaejëvareje. 10 Ae rahu God-hu nimaje ëhi jiëꞌe vavaeni baejëꞌohuro ëhuro ja huotorovoromo avoho uehorovoromo maro hiꞌaꞌanue. Avoho uehorovoromo avoho hijëꞌoho bogo ë hesi jöënioho vavaenimoꞌanue. Aꞌi sinemu uehorovoromo vavaeni baejëꞌohuro ëhuro ma-guomoꞌaꞌanue. 11 Röhu gare. God-hu nimaje ëhi jiëꞌe vavaeni baejarijohuro ëhuro ave mu maho rovadeje. Jemesirire jiade mu sisë ma-nunëremu gavarijoho vuonugoromo ahoꞌi uehorovarijeje. Övo unoꞌe ma-maemu jëvajoho röjehiꞌi nimarijeje. Mu sisëhuni dë vörönëgadeje. Ëhesi iꞌuohuni juhuonivarijeje. Nasi jöëni vavaenimarijeje. Muoho avohoꞌi nimarijeje. Sisë vaejade aho iꞌue mana bojamiꞌi nimarijeje. Iae no gavö jemë ë mu sisë avoharijoho ma-mabëhe jioꞌego.

12 Ëhuꞌëro jiëꞌëro iae na uruꞌö jöho jemëni jajivodeje röhu na mu sisë vaejade aho bogo uehorovoromo sisë baejade aho bogo uehorovoromo jajivoꞌi aꞌi naehu jajivode hesi bëhoho jemëro God-are nunire riravoromo garomo uvoꞌirarijego: Iae no Paul-mesi jöëni uehorovo avoharue höjo. 13 Jemëhu nosi jöëni uehorovarujohuro ëhuro no sanuamuijamu birire baejëꞌe javue.

Birire baeromo gavare Titus nimorohamu gagorovo noꞌo nimoroho avohareje ë hesi bëhoho jemë ae ahoꞌo hu ajamamu hesi dë sasohahadohuni. 14 Ëhesi bëhoho urimëꞌi naro jemesi jöëni nimorohëꞌi jöe bisemu Titus-are örire majahiromo uavodeje: Corinth aribövioho mu mae vaejarue höjo. Ëhi uavamu hegorovo Titus-ro öꞌoromo gavade jemë mu mae vaejamu gagorovo vuonoröꞌö rueromo uevadeje: Paul ja Corinth amo rajo jabesi jöho mae uevane höjo. Jaehu uevanëhi Corinth aribövioho ëhi jiëꞌe mu maho vaejamu gëvode höjo. Ëhi uevamu hegorovo na javojoho bogo baeꞌi mae jevadeje. Noehu Corinth amo rajo jemesi örire jöe ahoꞌo ma-maemu majëhinövarëhi ëhi Titus-are örire jö mae majahijareje. 15 O Titus-ro jemesi örire dë vövöbajoꞌe ahoꞌo uehorovëvajeje. Ëhesi bëhoho hu jemë gëromo simanoro vaejëꞌëro uvajeje: Naro Corinth amore vaꞌamu amo rajohuro juhuonivoromo butubutumoromo jejemiromo ae ahoꞌobëhe nasi jöho gemu ejehare höjo. 16 Ëhuꞌëro jiëꞌëro na uvajeje: Naehu nimaje muoho ae ahoꞌobëhe jemëro majae ëhi vaejaruje hö uvoromo nimoroheve.