17
Jisas Ananihw Yegenyihw Hwanubu Hwohiyatik Nape Anagun Sik
(Mak 9:2-13; Luk 9:28-36)
1 6-poleih nyumneh hanak hadiyuk ali Jisas nalumu Pita nanu Jems hanu Jems ananinu owaninu Jon ali nalikam amam atum hanak halto ananu nanubu lounali maunten. 2 Hanak hakih ali hatik Jisas nanubu nenek senis napeik anagun sik. Ananin domanyu nyanubu nyehiyatik nyape kobi nyumnahinu aun umu. Nehloluli luseh douk hanubu hatoglu chogolihwih kobi anatu lait umu. 3 Hape hatik Jisas, wakuli ahudak atuh hatik Moses nanu Ilaija hatoglu heyotu hape hanu Jisas heagwleh.
4 Douk Pita natik namudak ali naklipu Jisas nakli, “Diginyali, enyen douk kalbu apak mape agundak. Sapos nyak nyukli wosik umu, yek eke iwemumepu biou otuk chomeguhwiyu. Nyak onok ali biou umu Moses uli Ilaija.”
5 Pita watak nape neyagwleh ati ali onog gwanubu gwaglak uli olug gwanaki gweyawiyomuk. Ali anagu nigu ganaki ogudak olug uli gakli, “Anabuk nanubu yekinu Nuganinu. Yek douk ulkum manohwanu ali yenehilau-manu. Ipak douk pumnek ananin balan.”
6 Amam disaipel hemnek enyudak balan ali hanubu elgeim. Elgeim ali habih hogohwebil wahegas satik atap hakus namobuk. 7 Jisas nanaki halakati nowemeyom wis ali naklipam nakli, “Kitak, ipak kobi elgeipu, wak.” 8 Douk haitak hatulugun ali wo hutik anam alagun hiyotu e, wak. Hatik Jisas atunu.
9 Douk hatukemaguk iluh maunten wata hape hagluk ati ali Jisas naklipam dodogowinyi balan nakli, “Kobi punak puklipu enech umu enyudak dokwechuk patulin uli, wak. Nyulomaguk ipak atipu aliga chubo Yek Anudak Alman yatoglu aduligeinyi elpen uli igak wata itak ipe ali ipak adakio puklipech-umen.”
10 Ali amam disaipel hasalikanu hakli, “Ali namudak malmu, umu amam henek skulumech umu lo uli i save haklimu? Hakli Ilaija imas nuliki ali Krais eke adakio nutoglomu?”
11 Ali Jisas nebemom balan nakli, O adul. Ilaija imas nunaki ali wata nugabe ihechumali echudak umu yek inakumali. 12 Ali douk yaklipepu. Ilaija douk ananaki, wakuli echech nebemi wo chudukemanu e, wak. Chape chagipech echechin laik ali chenekanu anagu anagu. Ali namudak ati. Yek Anudak Alman douk yatoglu aduligeinyi elpen uli eke chuneke anagu anagu namudak ati imnek nyih.”
13 Amam disaipel hemnek ali hadukemech hakli anan douk naklipam umu Jon douk nenek baptaisumech uli.
Jisas Nagabe Ananu Owotu Tonoul Uli Nuganinu
(Mak 9:14-29; Luk 9:37-42)
14 Jisas nanu amudak biom atunu disaipel hagluki maunten ali hanak hatoglomu wolobaichi elpech. Hatoglu ati, ananu alman nanak nabih noduk ohlubus natau agundak Jisas neyotumu. 15 Ali naklipu Jisas nakli, “Diginyali, yek yakli nyak nyunelek yekinu nuganinu ali nyugabeyanamu yopunu. Anan douk owotu tonoul ali nanubu nalau nebehi nyih. Wolobaihi i save tonoul nagak nagluk nyih hanu abal. 16 Yalawonamu nyakim disaipel ali wo dodogowim umu hugabeyanu e, wak.”
17 Ali Jisas nebemanu balan nakli, “Ipak doumeipali elpech douk panubu wo punek bilip umu yek e, wak. Ipak douk papemu penek yowenyi ali ipakin tinytin wo nyulu duldul e. Ipak pakli yek eke wata inepu mupe loubomu ipe igakamepu namudak ati isahumepu enenyi enen hevi, waka? Aliga laweyonomeli agundak anabuk nuganinu.” 18 Chalawonoli ali Jisas nahu enyudak nyapenyunali sagabu ali nyatuke-managuk. Ali banubu ababuk atubu nyultab anan nanubu yopunu.
19 Douk nenek enyudak nyanakuk ali amam disaipel atum hanakumali Jisas ali hasalikanu hakli, “Apak douk mabilak wo dodogowipamu muhiyahuk atudak owotu e umu monoken?”
20 Nemnek ali naklipam nakli, “Ipak douk panubu wo pugamu punek bilip umu yek e, wak. Aduligu atugu yaklipepu. Sapos ipakin bilip nyutoglu kwalowi nebenyi kobi onoh chokuhwi mastetih nahw umule, ipak deke puklipu atudak nukut pukli, ‘Aliga kitak kalemu gani,’ ali adul ati atat eke tunubu titak tunak. Adul, enechi enech echudak deke punekech uli atich. [ 21 Wakuli echudakmali sagabehas douk yah wak umu muhech chutoglamaguk. Apak douk atuh yah meyoh umu munek tabumu kakwich eneh nyumneh ali mupe munek beten umu atuh.]
Anah Alagun Jisas Naklimu Eke Chonu Nugak Ali Wata Nitakumali
(Mak 9:30-32; Luk 9:43-45)
22 Abudak nyultab hanatimaguk disaipel hanaki atugun enyudak provins Galili abali, Jisas naitak naklipam nakli, “Enech douk eke chugilapu yekim birua Yek Anudak Alman yatoglu aduligeinyi elpen uli ali amam eke huhwe hunak he igak. 23 Amam eke hunak he igak, wakuli hukli bieh atuh nyumneh umu, yek eke wata itak ipe.” Amam disaipel hemnek enyudak balan ali apaluh hlanubu yoweluh.
Jisas Nenek Tagis Nobuk Utabal Umu God Ananitu Nebetali Wilpat
24 Jisas nanu ananim disaipel hanak hatoglu wabul Kapaneam ali amam halau tagis umu God ananitu nebetali wilpat uli hanakumali Pita ali hasalikanu hakli, “Ipakinu tisa nenek tagis nobuk utabal umu God ananitu nebetali wilpat o wak?” 25 Ali Pita nebemom balan nakli, “O wosik nenek tagis.”
Douk aliga Pita nanak nawich wilpat ali Jisas nalik nasolikanu nakli, “Saimon, nyak nyakli malmu? Apudak atapimi nebemimu gavman uli douk meichi elpech i save chatal kastan chokom utabal o chenek tagis chokom? I save halau tagis kipahechi o amamich batowich?”
26 Ali Pita naklipanu nakli, “Kipahechi.”
Ali Jisas naklipanu nakli, “Namudak ali amamich batowich douk kobi chunek tagis chukom, wak. 27 Wakuli apak douk makli wak umu munek echudak elpech nyihihichich umu apak, wak. Namudak ali aliga nyunamu nebenyi raunwara nyunek huk. Susubeip nyutukapili yelbup douk nyuhwop nyichiglak yokwatu ali eke nyugwatu anam utam mani douk molu. Amabuk utam douk eke munoknumu ohwak biohu umu wunek tagis umu. Nyumahu ali nyunak nyunek tagis nyukomuk.”