Pagiguk Iri Shup Douk Pol Nenekap Panam Timoti Iri
Banenyi Baraen Um Enyudok Baraen Pol Nagiguk Neneken Nyanak Um Timoti Iri
1:1-2 Pol nenekuman baraen Timoti nakri Iruhin nini Krais Jisas hutauruman
1:3—2:26 Pol nakrip Timoti um nunek Iruhin ananin mour wosik abom
3:1�17 Eshesh Kristen ta shiyotu dodog shusah amaen abudok nyutob hugiguk iri nyumnah hukri hutogur obi nyutob arpesh ta shukri uwok um Iruhin ananin baraen
4:1-8 Pol dodogowin atun nakrip Timoti um nukripesh Iruhin ananin baraen wosik aria nishuhur um shunek yopihi aih
4:9-22 Enen baraen um Pol nenek kwot um nyani nyatuh iri baraen
1
1-2 O Timoti, eik kanak Pol yenek-umenyugu apudok shup um nyak. Eik douk urkum manawashamen abom. Aria nyak nyasuhw Iruhin ananin baraen nyagipeshen aria eik douk yahwaren nuganin. Eik douk Iruhin nagipesh ananim atum urkum aria Krais Jisas nagraehe um ipe ananin aposel aria inak ikripesh Iruhin ananin adurin baraen. Enyudok baraen um apak matukur Jisas aria morao agundok um mupe wosik abom ihih nyumneh um.
Aria eik yakri Yain Iruhin nini apakin Debeini Krais Jisas hutaurumen meyoh aria nyakihw apahw hwur wosik.
Apak Mare Munenek Abraen Um Mukripesh Iruhin Ananin Baraen Kupaishi Arpesh Um
3 Eik yenek tenkyu um Iruhin. Anan douk eik yenek ananin mour wosik iri. Eik yenek ananin mour um, eik urkum mor wosik aria madae urkum mur um ikri eik yenek enesh yoweishi inahos uwe, uwok. Eik yeneken wosik kabi seiwok eikim yakenyim babukenyim heneken um. Aria ihih nyumneh eik yenek beten um Iruhin um, eik yenek urkum um nyak aria yarigan nyumnah wab um nutaurumen. 4 Riguk ohwak douk wape atugun. Aria douk eik yenek urkum um nahudok nyumnah eik yakutinyukuk ba yanaki ahi, ohwak wonakom roguhw aria nyak nyareh abih nyapeik aria eik yanaki. Douk namudok aria eik yakri abom um wata shopunek itrin aria wata inadudarehumen. 5 Aria shopunek, yenek urkum um agundok nyak nyasuhw Iruhin ananin baraen dodog nyagipeshen abom um. Seiwok nyakik babukek Lois kwarik kwasuwen dodog kwagipeshen. Aria nyakik amakek Yunis shopunek kwasuwen dodog kwagipeshen. Douk namudok aria eik yadukemesh abom um nyak shopunek douk nyasuwen nyagipeshen kabi owo um. 6 Namudok aria eik yakri ikripen enyudok baraen aria nyak mare urkum mukenyaguk. Baraen enyudok. Riguk eik yowem wis um nyakig barag aria Iruhin neken enyudok presen um nyuneken dodogowin atin abom um nyunek ananin mour um. Douk namudok aria nyak ta nyunek urkum um enyudok presen anan nekenyen iri aria nyupe dodogowin atin abom nyunek ananin mour. 7 Um maresh? Iruhin ananin Mishin douk nyape apak ananipari douk madae nyenekap munogugur uwe, uwok. Enyen douk nyenekap morao enyenyin dodog matogur dodogowip aria apak urkwip panawasham sabaishi arpesh mataurumesh. Aria shopunek douk ananin Mishin atin nyenekap masuhw merik um apak kanak wosik.
8 Douk namudok aria nyak mare nyunenek abraen um agundok eik yakripesh Iruhin ananin baraen aria douk yonoweshik um, uwok. Aria shopunek, mare nyunenek abraen um nyukripesh apakin Debeini ananin baraen um. Nyak ta nyuni eik wiyotu atugun um ukripesh Iruhin ananin baraen. Ohwak mare unogugur um agundok arpesh shukri uwok um ukripesh Iruhin ananin baraen um aria shohw umnek eriger um, uwok. Anan ta nutaurumohw nunekohw wiyotu dodog. 9 Iruhin douk narap matanamori mape wosik aria nahwarap um mupe ananip atup abom aria mupe yopupari. Anan douk madae nutik eneh yopihi aih apak menekeh iri aria douk nuhwarap uwe, uwok. Anan nagipesh ananim atum urkum aria nahwarap meyoh. Um maresh? Seiwok baugos um, Iruhin urkum morum apak aria neshopoki Krais Jisas nanaki nataurumap narap meyoh. 10 Aria douk enyudok seiwok Iruhin nakriyen iri douk nyatogur. Krais Jisas douk nanaki aria narao apak matanamori mape wosik. Aria nabo agundok um apak mugok munak muwishuk abom um nabuhuk. Namudok aria apak ta mare mugok munak muwishuk abom, uwok. Apak ta mupe wosik ihih nyumneh kabi Iruhin ananin yopinyi baraen nyakripap um. 11 Aria Iruhin nagraeh eik aria neshopoke um inak ikrip arpesh um enyudok ananin baraen. Douk namudok aria eik douk yanak yakripeshen yenek skulum sabaishi arpesh. 12 Douk yenek skulumesh aria douk eik yape yemnek debeiri eriger. Aria eik madae inenek abraen uwe, uwok. Um maresh? Eik yadukeman wosik abom anudok eik yenek bilipuman iri aria yakan eik kanak abom yani eikin mour yor ananis wis. Aria eik yadukemesh abom um anan ta nutaurume nurukarube ipe wosik aria inek enyudok atin mour arigaha inak itogur um ahudok nyumnah anan nutanamori ahi.
13 Enyudok yopinyi baraen douk riguk eik yakripenyen iri nyak ta nyusuwen nyugipeshen aria nyukripesh enyudok atin kupaishi arpesh. Aria nyak nyukripesh Iruhin ananin baraen obi nyutob, nyak ta nyugipesh ehudok aih um nyusuhw ananin baraen dodog nyugipeshen um, nyuni ehudok um nyak urkum munawasham anan nini ihishmorim arpesh um. Ehudok biyeh aih, eheh douk Iruhin nako apak douk matukur Krais Jisas iri. 14 Aria nyak ta nyutaurumen wosik Iruhin ananin baraen douk anan nakri nyak wosik um nyukripeshen iri. Aria Iruhin ananin Mishin douk nyape apak iri ta nyutaurumen um nyunek nyak nyutaurumen wosik Iruhin ananin baraen. 15 Nyak nyadukemesh eshudok ihishmorim arpesh shape agudok shokugi nahobig Esia iri shani amudok biom Figelus iri Hermogenes. Eshesh douk shakri uwok um eik aria shakutuwe-iguk. 16 Aria Onesiforus atun nataurume. Sabaihi nyumneh anan nanaki nataurume aria nenek eikihw apahw hwor wosik. Eik showeshike senab yape aria anan madae nunenek abraen um agundok eik yonoweshik yape um uwe, uwok. Sabaihi nyumneh anan nanaki nataurume aria neneke yatogur dodogoiwe. Namudok aria eik yakri apakin Debeini nukri gihaum Onesiforus nini ananip awirop aria nutaurumesh. 17 Aria nubokadae sagomatin anan nanaki abrudok debeiburi wabur Rom um, anan nenek urkum um eik aria naurime nanak arigaha nanaki naparuge. 18 Aria nyak nyadukemesh um anan nenek sabainyi Iruhin ananin yopinyi mour gani Efesus um nataurum sabaishi arpesh aria nataurum eik shopunek. Douk namudok aria eik yakri enyudok. Hahudok nyumnah apakin Debeini Jisas nunaki ahi, anan ta nenek gihauman aria natauruman.