2
Jona Te Dangro Mini Takaa 1 Entorah Jona tedi le tsinen ik nong bi mwe dangro mini SUBU ah non Takaa, 2 bep nuhu,
“SUBU, entorah nat rong mwegapmwa bi nam deng vabem
ba kot rorongtani nana.
Nat teng vabem bwalken murun mete, nateura nom beebeetsikan,
bi kot walu nok tsineng.
3 Kot wonhi nana vale teh ah tavangan sosol,
bi lalang nan teh kapkawu lengleng te rori nana.
4 Natgam binhi nuhu kot wonhi nana naanong baiang dini lemtam,
ba nan git mwetak ngamwa vale nom val sangbak.
5 Sileng te rori nana,
bi tewelwel naa nama mat.
Teh tetpo daltsi nana bwera watnede
bi vilih nan teh rat vihvi butsuk.
6 Nat muu bi nam sip bwalken teh,
bi teh morori baavaata nana mulngan tebulong.
Ba SUBU nok Takaa,
kot lep dumre bamul i nok mwasan dini murun mete.
7 Entorah nat van uu goah nama ruhbodi
ba nat vinhi bamla kik SUBU
bi nam dangro mini kik, bi nok tangroan te saket bis bem
le nom val sangbak.
8 Goah rabuh baata rada i noo takaa getket
ba ran basla nom mweegololoan niah mulngan tebulong niah batei noo.
9 Ani nana, ba nan sasa bavatla i ham
bi nan neskani nok sekakan mini kik.
Apma ah nat watle ini ba nan lel rada naa ini.
Igo vaavaamwasan ba mwapma nante dini kik, SUBU.”
10 Bi SUBU mweleli bwera ik nong mwesak ut bi mwiliaut i Jona vale on.