1 Izyraeu tõ esetykõ tymerose, oxiekyry tõ maro, pape pokona, esety Izyraeu tõ Tuisary tõ Ehtopõpyry.

Juta tõ tarose toh kynexine Papironia pona Papironia põkõ namotome toto wãnohtohme iirypyryme toexirykõke. 2 Morarame apitoryme aepyry ropa exiketõ tosaka xine ropa ynara kynexine: ahno te, oturuketomo te, Rewi tomo te, Ritonõpo Tapyĩ poko erohketomo, enara. 3 Juta tomo te, Pẽjamĩ tomo te, Eparaĩ tomo te, Manase tõ maro toytose toto osesarise Jerusarẽ pona.

4-6 690me jũkomo tytapyĩ taõkõ maro, Juta ekyry tomo, Jerusarẽ po toh kynexine.

Juta mũkuru Pereze pakomotyã tuisary kynexine Utai, Amiute mũkuru, Onori pary. Itamuru tõ kynexine: Iniri te, Pani, enara.

Juta mũkuru Sera pakomotyã tosẽke toh kynexine Asaia, tyekyry tõ tuisary.

Juta mũkuru Zera pakomotyã tuisary Jeueu kynexine.

7-8 Jerusarẽ po ynara Pẽjamĩ tõ toehse toh kynexine:

Saru, Mesurã mũkuru, Hotawia pary, Hasenua mũkuru pary te;

Ipineia, Jeroão mũkuru;

Era, Uzi mũkuru, Mikiri pary te;

Mesurã, Sepatia mũkuru, Reueu pary, Ipinija mũkuru pary.

9 956me jũkomo tytapyĩ taõkõ maro Pẽjamĩ ekyry tõ moroto toh kynexine Jerusarẽ po. Mokaro emero esetykõ tymerose exiketõ oxiekyry tuisaryme toh kynexine.

10-12 Jerusarẽ po oturuketõ tosake toh kynexine:

Jetaia te, Jeoiaripe te, Jakĩ, enara. Moroto roropa tosake toehse Azaria Ritonõpo Tapyĩ tuisary. Hiukia mũkurume kynexine, Mesurã paryme, Zatoke mũkuru paryme, Meraiote paryme roropa, Aitupe paryme roropa.

Ataia, Jeroão mũkuru, Pasua paryme, Maukia mũkuru paryme.

Masai, Atieu mũkuru, Jazera paryme, Mesurã mũkuru paryme, Mexiremite paryme roropa, Imea paryme roropa.

13 1.760me oturuketõ kynexine, tyekyry tõ tuisaryme exiketomo. Emese kure toh kynexine toerohtohkõ poko Ritonõpo maro Oturutoh tao.

14-16 Jerusarẽ po ynara rewita tõ tosake toehse toh kynexine:

Semaia, Hasupe mũkuru, Azarikã pary, Hasapia mũkuru pary. Merari ekyry tõ maro kynexine.

Pakepakaa te, Here te, Karau maro.

Matania, Mika mũkuru, Zikiri paryme, Asape mũkuru paryme.

Opatia, Semaia mũkuru, Karau paryme, Jetutũ mũkuru paryme.

Perekia, Asa mũkuru, Eukana paryme, pata Netopa nonory po tosake toehse kynexine.

17 Jerusarẽ po Ritonõpo Tapyĩ omõtoh erase tõ tosake toehse toh kynexine:

Sarũ te, Akupe te, Taumõ te, Aimã, enara. Sarũ tuisame kynexine. 18 Moro ehtopõpyry poe tarona mokaro ekyry tuisa konõto omõtoh eraseme toh toehse, Tapyi omõtoh xixi tũtatoh wino. Apitoryme omõtoh eraseme toh kynexine rewita tõ esary tõ pona.

19 Sarũ, Kore mũkuru, Epiasape paryme, jekyry tõ maro, Kora ekyry tõ maro, tyrohmanohpose toto, Ritonõpo maro Oturutoh omõtoh eraseme ehtohme. Tytamuru tõ ehtopõpyry sã toh kynexine, toerohtoh poko toto ahtao Ritonõpo, Izyraeu tõ Esẽ ekahmaryhtao ona tonorẽ po. 20 Morara ahtao Pineia, Ereaza mũkuru - ah Ritonõpo Pineia maro nexino - toto tuisaryme kynexine.

21 Zakaria, Meseremia mũkuru roropa, Ritonõpo maro Oturutoh omõtoh eraseme kynexine.

22 Atapona 212me orutua kõ tymenekase omõtoh eraseme ehtohme. Esetykõ tymerose pape pokona tyekyry tõ esetykõ maro toto esary maro. Tuisa Tawi a urutõ Samueu maro, toto tamuru tõ tymenekase omõtoh eraseme ehtohme, amonohkara exiketõ se exiryke. 23 Naeroro ynaroro te, ipakomotyã roropa Ritonõpo Tapyĩ omõtoh eraseme toerohse toh kynexine. 24 Omõtoh nae kynexine 4me ẽmyty tõ poko: inikahpozakoxi te, ikurenaka te, xixi tũtatoh wino te, xixi omõtoh wino, enara. Toiro omõtoh, toiro erase tõ tuisary nae kynexine. 25 Mokaro erase tõ takorehmase jekyry tomo a. Typatary tõ poe tooehse toh kynexine erohse 7me ẽmepyry ae. 26 Mokaro 4me erase tõ tuisary tõ rewitame toh kynexine. Toerohtoh poko toehse toh kynexine te, osa tõ eneneme roropa toh kynexine Ritonõpo Tapyĩ tao, mõkomo kurã eneneme roropa tukurãkase aexihpyry moro tao. 27 Tytapyĩke toh kynexine Ritonõpo Tapyĩ pũto tyrohmanohpose toto exiryke Tapyi eraseme ehtoh poko te, omõtoh etapuruhmakaneme roropa ẽmepyry ae rokene.

28 Imehnõ rewita tõ tyrohmanohpose Ritonõpo eahmatoh kyryry kurãkatohme. Morohne poko exiketomo a morohne tapoise ahtao tuhke ehtoh tukuhse eya xine, te tonehse ropa morohne ahtao tuhke ehtoh tukuhse ropa eya xine. 29 Imehnõ rewita tõ tyrohmanohpose Ritonõpo Tapyĩ kyryry poko, tiriiku tapose aexihpyry te, uwa eukuru jehnahpyry te, azeite te, ixtaratu te, kanera tõkehko, enara. 30 Yrome oturuketõ rokẽ ixtaratu kehko zoximaneme toh kynexine.

31 Toiro rewita esety Matitia, Sarũ mũkuru apitorymano, Kora tõ ekyryme exikety, tyrohmanohpose pão kehko riry poko tynekarory tõme. 32 Imehnõ rewita tõ, Koate ekyry tõ tyrohmanohpose pão ritohme oserematoh ae rokẽ arotohme Ritonõpo Tapyĩ taka meza kurã pona tyritohme.

33 Imehnõ rewita tõ tyrohmanohpose eremiatoh poko Ritonõpo Tapyĩ tao. Mokaro tamuximãkõ tosake toehse Ritonõpo Tapyĩ tao. Moro poko rokẽ toh kynexine saereme koko, enara.

34 Mokaro kynexine rewita tomo, oxiekyry tõ tuisaryme, tytamurukõ esety ae ro. Tamuximãkõme toh kynexine Jerusarẽ po.

35 Jeieu a pata Kipeão tyrise, mame moroto esary kynexine. Ipyty kynexine Maaka. 36 Imũkuru apitorymã kynexine Apatõ, imehnõ imũkuru tõ kynexine: Zua te, Kixi te, Paau te, Nea te, Natape te, 37 Ketoa te, Ajo te, Zakaria te, Mikirote, enara. 38 Mikirote, Ximeia zũ kynexine. Ipakomotyã tosake toehse toh kynexine Jerusarẽ po oximaro, oxiekyry tõ maro.

39 Nea toemũkuase Kixime. Kixi toemũkuase Sauume. Sauu toemũkuase 4me: Jonata te, Maukisua te, Apinatape te, Exipaau, enara. 40 Jonata toemũkuase Meripe-Paaume. Meripe-Paau toemũkuase Mikame. 41 Mika toemũkuase 4me: Pitõ te, Mereke te, Tareia te, Akaze, enara. 42 Akaze toemũkuase Jaerame. Jaera toemũkuase oseruao: Aremete te, Azamawete te, Ziniri, enara. Ziniri toemũkuase Mosame. 43 Mosa toemũkuase Pineame. Pinea toemũkuase Repaiame. Repaia toemũkuase Ereasame. Ereasa toemũkuase Azeume.

44 Azeu toemũkuase 6me: Azarikã te, Pokoru te, Iximaeu te, Searia te, Opatia te, Hanã, enara.