1 Morarame toiro nuno taropose ahtao, Naasa, amonita tõ tuisary toytose soutatu tõ maro pata Jape põkõ poremãkapose, Kireate nonory po. Mame typatary zomye tooehse Naasa soutatu tõ ahtao ynara tykase Jape põkõ eya:

— Osepeme sehtone, mame opoetoryme exĩko ynanase, yna tuisaryme exĩko mase, tykase toto.

2 Yrome tozuhse toto Naasa a, ynara tykase:

— Ỹ, ypoetoryme matose exĩko, yrome ynara se rokẽ ase oya xine: oenurukõ posohkãko ase ãpotunurukõ wino Izyraeu tõ hxirotohme emero porehme, tykase.

3 Ynara tykase pata Jape põkõ tamuximãkõ eya:

— 7me ẽmepyry ekaroko yna a, yna omiry aropotohme Izyraeu patary tõ punero. Mame yna pynanohne oehpyra ahtao yna akorehmase, osekarõko ynanase oya, tykase toto.

4 Mame mokaro omi aronanõ toeporehkase Kipea pona, Sauu patary pona. Mame Naasa omihpyry totase tyya xine ahtao tyxitapitose toto yronymyryme. 5 Morara ahtao Sauu oehnõko nexiase tutupi poe toky tõ, pui orutua kõ maro.

— Otara toehse? tykase Sauu. Oty katoh xitãko matou?

Mame Jape poe aehtyã omihpyry tokarose eya xine. 6 Mame morara kary etaryhtao Sauu a, tyjamihtanohse ynororo Ritonõpo Zuzenu a, zehno toehse ynororo. 7 Pui tapoise eya asakoro. Mame tysahsahkase toto eya aropotohme Izyraeu patary tõ punero tõmiry maro, ynara tykase:

— Sero sã oekykõ tysahsahkasẽme exĩko mana oehpyra awahtao xine Sauu tõ akorehmase Samueu maro etonatoh poko, tykase.

Mame Izyraeu tõ emero Ritonõpo kurũke oximõme tooehse toto Sauu ekahmase. 8 Mame oximõme tarose toto Sauu a Pezeke pona. Izyraeu tõ soutatu tõ 300 miume nexiase, Juta tõ soutatu 30 miume nexiase. 9 Mame ynara tykase toto Jape poe aehtyamo a:

— Ynara kahtoko apatary põkomo a: “Kokoro tãxiahtao ãkorehmatorỹko ynanase,” kahtoko eya xine.

Morara kary etaryke tyya xine tãkye toehse toto, Jape põkomo. 10 Morarame ynara tykase toto amonita tomo a:

— Kokoro osekarõko ynanase oya xine. Mame tyrĩko matose yna poko openetatohkomo, ise awahtao xine, tykase toto.

11 Mame yrokokoro Sauu a soutatu tõ tapiakase oseruao imoihmãkõ ehtohme. Ẽmehsasaka ahtao toytose toto amonita tõ esaka, osetapase. Totapase toto eya xine, tonahkase toto tãxiahtao emero exisasaka. Mokaro orihpyra exiketõ toepase toto sapararahme rokẽ rahkene.

12 Morarame ynara tykase toto Samueu a:

— Onokãkõ mokaro: “Sauu kutuisarykõme exipyra mana,” kahpõkomo? Enehtoko toto xiaro aorihmapotohme kyya xine.

13 Yrome Sauu ynara tykase:

— Seroae imehnõ anaorihmapopyra sytatose, Izyraeu tõ typynanohse Ritonõpo a exiryke.

14 Mame ynara tykase Samueu eya xine:

— Ehmaropa Kiukau pona Sauu ekarotohme ropa kuesẽkõme Ritonõpo a Sauu se kuexirykõke.

15 Naeroro toytose toto emero Kiukau pona. Moroto tõsekarose toto Ritonõpo a: “Mose Sauu kuesẽkõme mana,” tykase toto. Mame tynekarorykõ tyahkase kehko Ritonõpo ẽpataka, osepeme toto ehtohme. Tãtãkyemase toto Sauu maro, Izyraeu tõ maro oseahmaryme, enara.